Albert Wright/iStock via Getty Images
DESEÑOUNO ALGUÉN?
O niño do faisán australiano
O faisán australiano mantén a temperatura do niño a uns 34 graos Celsius, cunha marxe de variación de tan só dous ou tres graos. Como pode manter esta temperatura día e noite durante todo o ano?
Cada inverno, estas aves escavan un burato grande de tres metros de ancho e dun metro de profundidade. Entón, o macho éncheo de herba, follas e outra vexetación. Despois de que as últimas chuvias do inverno empapen o montón da vexetación, fan outro burato dentro para os ovos e tapan o montón con terra areosa. Unha vez que a vexetación empeza a descompoñerse produce calor, o que crea unha incubadora natural.
Para incubar os seus ovos (A), o faisán australiano usa o calor do sol e o calor producido polo compost (B). Cando axusta o grosor da capa de terra (C), mantén os ovos a uns 34 graos Celsius durante moitos meses. Para conseguilo, o paxaro remove grandes cantidades de terra coas súas patas (D).
En canto a femia está lista para poñer un ovo, o macho quita a terra para que ela poida poñelo no burato. Xusto despois volve cubrir o montón con terra. Ela pode poñer uns 35 ovos entre setembro e febreiro.a
As aves meten o pico na area con frecuencia para comprobar a temperatura. En función da estación do ano, modifican o montón de vexetación. Por exemplo:
Na primavera, cando a fermentación da vexetación empeza a aumentar moito a temperatura do niño, o macho deixa que escape o calor quitando un pouco de terra que hai encima do burato. Máis tarde, volve cubrilo con terra máis fría.
Durante o verán, o macho pon máis terra encima do montón para protexer os ovos do sol. Quita a terra á primeira hora da mañá e volve poñela cando o niño e a area están fríos.
No outono, cando a vexetación deixa de fermentar, o macho quita case toda a terra deixando que o sol do mediodía quente os ovos e tamén a terra que quedou espallada. Despois, volve tapar o montón de vexetación coa terra quente para darlles calor ós ovos durante a noite.
Os machos traballan de media cinco horas cada día para transportar uns 850 quilos de terra. O movemento constante de terra permite que estea solta para que os pitiños poidan escavar e saír do montón de vexetación despois de que rompan a casca do ovo.
Mira como o faisán australiano escava terra para o seu niño.
Que dirías? É a habilidade que ten o faisán australiano para controlar a temperatura do seu niño resultado da evolución? Ou deseñouna alguén?
a Os pitiños saen dos ovos en sete ou oito semanas, o que significa que debe traballar ata abril para manter o montón.