A historia de Noé e o Diluvio. É só un mito?

O que di a Biblia

O Diluvio foi un suceso real. Deus causouno para destruír a xente mala, pero díxolle a Noé que construíse unha arca para que a xente boa e os animais puidesen salvarse (Xénese 6:11-20). Podemos estar seguros de que o Diluvio foi real porque está rexistrado na Biblia, que “está inspirada por Deus” (2 Timoteo 3:16).

• Realidade ou mito?

• Por que sucedeu o Diluvio?

• Sabía a xente que ía vir un Diluvio?

• Como era a arca de Noé?

• Canto tempo lle levou a Noé construír a arca?

• Contos, mitos e lendas sobre o Diluvio

Realidade ou mito?

A Biblia indica que Noé foi unha persoa real. Tamén explica que o Diluvio pasou de verdade, e que non foi unha simple lenda ou mito.

• Os escritores da Biblia crían que Noé foi unha persoa real. Por exemplo, os escritores Esdras e Lucas foron experimentados historiadores, e incluíron a Noé nas xenealoxías da nación de Israel (1 Crónicas 1:4; Lucas 3:36). Mateo e Lucas tamén incluíron nos seus Evanxeos as cousas que dixo Xesús sobre o Diluvio (Mateo 24:37-39; Lucas 17:26, 27).

  Ademais, o profeta Ezequiel e o apóstolo Paulo mencionaron a Noé coma un exemplo de fe e de xustiza (Ezequiel 14:14, 20; Hebreos 11:7). Tería sentido que eses escritores puxesen alguén que nunca existiu coma exemplo a seguir? Non moito. Noé e outros homes e mulleres de fe son exemplos que debemos imitar precisamente porque foron persoas reais (Hebreos 12:1; Santiago 5:17).

• A Biblia dá detalles específicos do Diluvio. O relato bíblico do Diluvio non empeza cunha expresión como: “Érase unha vez”, coma se fose un conto. Máis ben, a Biblia indica o ano, o mes e o día de varios sucesos relacionados co Diluvio (Xénese 7:11; 8:4, 13, 14). Tamén menciona as dimensións da arca que construíu Noé (Xénese 6:15). Estes detalles demostran que a Biblia fala do Diluvio coma unha realidade, e non coma un mito.

Por que sucedeu o Diluvio?

A Biblia di que antes do Diluvio “a maldade dos homes medraba na terra” (Xénese 6:5). Tamén di que “a terra estaba toda enviciada ós ollos de Deus” porque estaba chea de violencia e inmoralidade sexual (Xénese 6:11; Xudas 6, 7).

A Biblia di que moitos deses problemas estaban causados por anxos malvados que deixaron o ceo para ter relacións sexuais con mulleres. Eses anxos tiveron fillos, chamados nefilim, que lle fixeron moito dano á xente que vivía na Terra naquel tempo (Xénese 6:1, 2, 4). Deus decidiu limpar a terra de maldade e permitir que as persoas boas puidesen empezar de cero sen malas influencias (Xénese 6:6, 7, 17).

Sabía a xente que ía vir un Diluvio?

Si. Deus díxolle a Noé o que pasaría e deulle instrucións para que construíse unha arca para que el e a súa familia puidesen sobrevivir (Xénese 6:13, 14; 7:1-4) Noé advertiu ás persoas da destrución que se lles viña enriba, pero non lle fixeron caso (2 Pedro 2:5). A Biblia di: “Non fixeron caso ata que veu o Diluvio e os destruíu a todos” (Mateo 24:37-39).

Como era a arca de Noé?

A arca era coma unha caixa longa e rectangular. Medía uns 133 metros de longo, 22 metros de ancho e 13 metros de alto.a A arca estaba feita de madeira resinosa e cuberta por dentro e por fóra de betume. Tiña tres pisos e varios compartimentos. Había unha porta no lateral e posiblemente ventás na parte alta, ó longo de toda a arca. Parece probable que o teito fose un pouco máis alto no centro que nos bordos para que a auga escorregase e non se acumulase (Xénese 6:14-16).

Canto tempo lle levou a Noé construír a arca?

A Biblia non di canto tempo lle levou a Noé construír a arca, pero é probable que lle levase varias décadas. Noé tiña máis de 500 anos cando naceu o seu primeiro fillo e 600 anos cando veu o Diluvio (Xénese 5:32; 7:6).b

Deus díxolle a Noé que construíse a arca cando os seus tres fillos xa eran maiores e estaban casados, o que puido levar uns cincuenta ou sesenta anos (Xénese 6:14, 18). Se usamos esta posibilidade como base, parece razoable pensar que a construción da arca durase uns corenta ou cincuenta anos.