PREGUNTAS DA XUVENTUDE

Debería bautizarme? | Parte 1: O que significa o bautismo

Tódolos anos bautízanse moitos mozos que creceron en familias que serven a Xehová. Ti tamén estás pensando en bautizarte? Se é así, primeiro tes que entender o que significan a dedicación e o bautismo.

Que é o bautismo?

O bautismo do que fala a Biblia implica somerxerse completamente en auga, non simplemente botar ou salpicar un pouco de auga sobre a cabeza de alguén. Ademais, esta inmersión simboliza algo moi importante.

Cando te mergullas na auga ó bautizarte, demostras publicamente que xa non vivirás para facer o que a ti che guste.
Cando saes da auga, demostras que comezas unha nova vida centrada en facer o que lle gusta a Deus.

Cando te bautizas, recoñeces en público que Xehová ten autoridade para decidir o que está ben e mal. Ademais, prométeslle a Deus que sempre farás o que el quere que fagas.

Pensa nisto: Que razóns poderías ter para comprometerte publicamente a obedecer a Xehová para sempre? Mira 1 Xoán 4:19 e Apocalipse 4:11.

Que é a dedicación?

Antes de bautizarte, debes dedicarte a Xehová en privado. Como podes facelo?

Nunha oración persoal, dislle a Xehová que prometes servilo para sempre e que farás o que el quere sen importar o que pase ou o que decidan facer os demais.

O bautismo é a maneira de mostrar en público que te dedicaches a Deus en privado. Así os demais ven que xa non vives para ti, senón que agora a túa vida lle pertence a Xehová (Mateo 16:24).

Pensa nisto: Por que mellora a túa vida cando a dedicas a Xehová? Le Isaías 48:17, 18 e Hebreos 11:6.

Por que é importante bautizarse?

Xesús estableceu o bautismo como un requisito que os seus discípulos debían cumprir (Mateo 28:19, 20). Este segue sendo un requisito para os cristiáns da actualidade. De feito, a Biblia di que é necesario para obter a salvación (1 Pedro 3:21).

Con todo, os teus motivos para bautizarte deben ser que amas a Xehová e que a túa relación con el é moi importante para ti. Deberías ter a actitude do salmista, que escribiu: “¿Con que lle pagarei ó Señor todo o ben que me fai? [. . .] [Invocarei] o nome do Señor; cumprirei os meus votos ó Señor” (Salmo 116:12-14).

Pensa nisto: Que cousas boas fixo Xehová por ti, e como podes agradecerllas? Mira Deuteronomio 10:12, 13 e Romanos 12:1.

Ideas equivocadas e realidades

Idea equivocada: Só os adultos teñen a madurez necesaria para bautizarse.

Realidade: A madurez non depende da idade, senón de canto amas a Xehová e se estás disposto a obedecelo. Xosé, Samuel e Ioxías, aínda que eran novos, demostraron que eran maduros. Hoxe en día, moitos mozos demostran o mesmo.

O que di a Biblia: “Polos seus feitos mostra xa un rapaz se o seu proceder é limpo e recto” (Proverbios 20:11).

Idea equivocada: Se os teus amigos se bautizan, ti tamén deberías facelo.

Realidade: A elección de dedicarte e bautizarte é algo persoal e só deberías tomar esta decisión porque realmente desexas facelo. Non é un ritual ou unha cerimonia que teñas que facer cando chegas a certa idade, porque outros o fixesen ou porque penses que é o que outros esperan de ti.

O que di a Biblia: O pobo de Deus “ofrecerase voluntariamente” (Salmo 110:3, TNM).

Idea equivocada: Se non estás bautizado, non lle tes que dar contas a ninguén polas túas accións.

Realidade: Dende que sabes o que está ben e o que está mal para Xehová, tes que responder diante del e non só a partir do momento no que te bautizas.

O que di a Biblia: “O que coñece o ben que ten que facer e non o fai, comete pecado” (Santiago 4:17).

Consello: Paréceche que ser un cristián dedicado e bautizado é unha responsabilidade demasiado grande para ti? Por que non intentas facerlle fronte ós teus medos? Podes facelo lendo o capítulo 37 do libro Lo que los jóvenes preguntan. Respuestas prácticas (volume 2).