Cando hai un desastre

“O primeiro que sentimos foi unha desesperación moi grande. Un desprendemento de terra e unha inundación fixeron que perdésemos todo o que tiñamos” (Andrew, Serra Leoa).

“Despois do furacán, volvemos á casa. Non quedara nada. Estabamos en shock. A miña filla botouse ó chan de xeonllos e empezou a chorar” (David, Illas Virxes Británicas).

SE VIVICHES un desastre seguro que entendes o que sentiron estas persoas: shock, negación, confusión, ansiedade e pesadelos. Moitas persoas que sobreviven a un desastre séntense tan tristes e cansadas que case non encontran razóns para seguir vivindo.

Se o perdiches todo por culpa dun desastre, quizais sintas que xa non podes máis. Ó mellor pensas que xa non vale a pena vivir. Pero a Biblia explica que si vale a pena e que hai boas razóns para confiar en que haberá un futuro mellor.

CANDO SABEMOS O QUE DI A BIBLIA VALE A PENA VIVIR

Eclesiastés 7:8 di: “Mellor é o remate dun asunto có comezo”. Se estás empezando a recuperarte despois dun desastre, quizais sintas que non hai esperanza. Pero con paciencia e esforzo as cousas mellorarán.

A Biblia predí que chegará o momento no que “non se volverá a oír [...] ruído de choros nin ruído de berros” (Isaías 65:19). Isto cumprirase cando o Reino de Deus converta a Terra nun paraíso (Salmo 37:11, 29). Os desastres serán cousa do pasado. Calquera recordo triste ou calquera trauma serán borrados para sempre, porque o Deus todopoderoso promete: “Non serán lembradas as cousas vellas, nin pasarán á consideración de ninguén” (Isaías 65:17).

Pensa nisto: o Creador fixo todo o necesario para darnos “un porvir e unha esperanza”, é dicir, unha vida pacífica baixo o seu Reino perfecto (Xeremías 29:11). Saber isto pode axudarche a ver que vale a pena vivir. Como? Sally, de quen falamos no primeiro artigo, di: “Recordarte a ti mesmo tódalas cousas marabillosas que fará o Reino de Deus por nós no futuro pode axudarche a deixar atrás o pasado e a aguantar a situación pola que estás pasando”.

Gustaríache saber máis sobre o que fará moi pronto o Reino de Deus pola humanidade? Facer isto pode axudarche a estar convencido de que, sen importar o desastre polo que pasases, vale a pena vivir mentres esperas con ilusión a que chegue ese futuro no que xa non haberá máis desastres. Mentres tanto, a Biblia pode darche consellos prácticos que che axudarán a soportar as consecuencias dun desastre. Vexamos algúns exemplos.

Textos bíblicos que che poden axudar

Descansa o suficiente

“É mellor un puñado de descanso que dous puñados de traballo duro e perseguir o vento” (Eclesiastés 4:6, TNM).

Os estudos mostran que, despois dun suceso traumático, “durmir pouco e mal [...] pode empeorar os síntomas de trauma e que sexa máis difícil manter o equilibrio emocional”. Por iso é bo descansar o suficiente.

Fala de como te sentes

“A ansiedade no corazón do home angústiao, a verba agarimosa alégrao” (Proverbios 12:25).

Fala cun familiar ou cun bo amigo. Ademais de escoitarte, poden animarte coas súas palabras ou darche a axuda que necesitas.a

Pensa que virán tempos mellores

“Hai uns ceos novos e unha terra nova que esperamos de acordo co que [Deus] prometeu, e neles reinará a xustiza” (2 Pedro 3:13).

a Unha persoa que ten estrés ou ansiedade durante un tempo prolongado quizais necesite buscar axuda médica.