Titiraki Mairouia Taani Wareware
E kaotaki n te Baibara bwa e riai n iai uoman taani kakoaua ke e raka riki, ibukini kaetani bwaai. (WarIte. 35:30; TuaKau. 17:6; 19:15; Mat. 18:16; 1Tim. 5:19) Ma i aan te Tua, ngkana iai te mwaane ae taua te aine ae kabae “n te tawaana” ao e takarua neiei, e aki reke n te bure ni wene ni kimoa neiei ma e reke n te bure teuanne. Ngkai akea taani kakoaua ibukin te mwakuri n tautau aei, e aera bwa e aki reke n te bure neiei ma e reke n te bure teuanne?
Te rongorongo n Te Tua-Kaua 22:25-27 bon tiaki ibukini boutokaani koauan ae e reke n te bure te mwaane, ibukina bwa e teretere bwa e boni bure. E kaatuuaki riki n te tua aei boutokaan ae e aki reke n te bure te aine. Nora bwaninin te rongorongo.
Ni kiibu ake mai mwaina a taekina te mwaane ae wene ma te aine ae kabae “n te kaawa.” Ni karaoan anne, e bure ni wene ni kimoa teuanne, kioina ngkai e iangoaki te aine ae kabae bwa e a tia ni mare. Ma tera aron neienne? “E aki takarua n te kaawa.” Ngke arona bwa e takarua, a na ongo aomata ao a na tei ibukina. Ma e aki takarua. Ngaia are e karaoa naba te wene ni kimoa, ao a motikaki taekaia bwa a uaia n reke n te bure.—TuaKau. 22:23, 24.
Imwina, e a taekinaki n te Tua te bwai ae riki ae kaokoro: “Ma ngkana e kaitiboo n te tawaana te mwaane temanna ma te aine ae kabae, ao te mwaane aei e kakorakoraa n taumatoaa neiei ao e wene ma ngaia, e na tii mate te mwaane ae wene ma neiei, ao akea te bwai ae kam na karaoia nakon te aine aei. E aki karaoa te bure te aine aei ae e tau ni mate iai. Tii te arona te aekaki aei ma aron te mwaane ae kibara raona n aomata ao e tiringnga. Bwa e kaitiboo ma neiei n te tawaana, ao e takarua te aine ae kabae aei, ma akea ae e kamaiua.”—TuaKau. 22:25-27.
N te bwai ane riki anne, a kakoauaa te aine anne taani moti. N te aro raa? E iangoaki neienne bwa e ‘takarua, ma akea ae e kamaiua.’ Ngaia are e aki bure ni wene ni kimoa. Ma e bure n tautau ao ni wene ni kimoa teuanne, ibukina bwa e “kakorakoraa n taumatoaa [neiere kabae] ao e wene ma ngaia.”
Ngaia are e ngae ngke e kaatuuaki n te tua aei boutokaan ae e aki reke n te bure neienne, ma e bon eti te rongorongo aei ngkai e kabwarabwaraa ae e bure n tautau ao ni wene ni kimoa teuanne. Ti aki nanououa bwa a bae taani moti “ni karaoa te kakaae raoi i aona” ao ni karaoa aia moti ae boraoi ma ana kaetieti te Atua ae okioki ni kaotaki.—TuaKau. 13:14; 17:4; TeOti. 20:14.