Titiraki Mairouia Taani Wareware

Ngke e tuanga Ewa Tatan bwa e na aki mate ngkana e kana uaan te kai n ataa te raoiroi ao te buakaka, e taekina nakon neiei te koaua ae taabangaki ni boong aikai ae e aki mamate te taamnei?

E aki tuanga Ewa te Riaboro bwa ngkana e kana uaan te kai are e katabuakaki iroun te Atua, e na mate rabwatana ma e na teimatoa ni maiu taamneina n te tabo teuana. E kamanena te naeta Tatan ao e taekinna bwa ngkana e kana uaan te kai anne Ewa, ‘e na bon aki mate.’ E nanonna bwa e na teimatoa ni maiu neiei ao ni karekea te maiu ae kakukurei riki i aon te aba, ae inaomata mairoun te Atua.​—KBwaai 2:17; 3:3-5.

Ngkana ngaia bwa e aki nako mai Eten te reirei ae kewe ae e aki mamate te taamnei, e a reke ngkanne mai ia? Ti aki ataia raoi. Ti ataia ae a kamaunaaki taromauri aika kewe ni kabane n te Ieka are n ana bong Noa. Akea reirei aika kewe man Aaro aika tiku imwin te Ieka, ibukina bwa tii Noa ma ana utu aika taan taromauri ni koaua, aika reke maiuia.

Ngaia are te reirei ae e aki mamate taamnein te aomata ae ataaki ngkai, e bae n reke imwin te Ieka. Ngke e kamangaoi taian taetae te Atua i Babera, ao a a maenako aomata “nakon te aonnaba ni kabutaa,” akea te nanououa bwa e iriianako te koaua are iai taamneia aomata ae aki mamate. (KBwaai 11:8, 9) N aki ongeia bwa e moan riki n ningai te reirei ane kewe anne, ma ti ataia raoi bwa “taman te kewe” ae Tatan te Riaboro, boni ngaia ae boutokaa te kewe aei ao e rangi ni kukurei ngkai e a butanako.​—Ioa. 8:44