Ti Kunea ‘Moomin te Bwaeao ae Rangi ni Kakawaki’

Winston, karakina arom ngke ko ukoukora te Atua.

I kaikawaaki n te utu ae a aki taua te Aro kaaina ao ti maeka n te tabo n ununiki i Queensland, i Aotiteria. Ibukina bwa e tionako ara tabo, I aki bati n rereitaki ma aomata, ma tii au utu. I moana ukoukoran te Atua ngke tao 12 au ririki. I tataro ni bubutiia bwa N na ataa te koaua ibukina. Imwina riki, I a kitana mwengau ao e a reke au mwakuri i Adelaide, i Aotiteria maiaki. I kaitiboo ma Pam ngke 21 au ririki n au tai ni motirawa i Sydney, ao e tuangai taekan te koraki n Aro teuana ae te British-Israel, are a taku bwa a riki kaaini Buritan man aia baronga tibun Iteraera ake aongkoa a bua. A taku te koraki aei bwa aia baronga boni baronga aika tebwina n te tautaeka n uea mai meang are kataenikaiaki n te ka-wanua n tienture B.C.E. Ngke I okira Adelaide, I a maroroakina taekan aei ma raou ni mwakuri temanna ae reirei n te Baibara ma Ana Tia Kakoaua Iehova. Imwini marorora i nanon tabeua te aoa i aon aia koaua taani Kakoaua, I a ataia bwa e a kaekaaki au tataro ngke I uarereke. I a ataa te koaua ibukin au tia Karikiriki ao ana Tautaeka n Uea! E a reke irou ‘moomin te bwaeao ae rangi ni kakawaki.’​—Mat. 13:​45, 46.

Pam, ko moana naba ukoukoran te moomi anne ngke ko uarereke. Ko kangaa ni kunea?

I ikawairake n te utu ae a taua te Aro kaaina n te kaawa ae Coffs Harbour, i New South Wales. A kakoauaa au karo ao tibuu aia angareirei te koraki n Aro ae te British-Israel. I kaikawaaki ma mwaaneu ae uarereke riki, tariu ae ikawai riki, ao ai tariu ma ai mwaaneu aika bati bwa ti na kakoauaa ae te Atua e tangiriia riki naake aia bakatibu kaaini Buritan. Ma I teimatoa n aki kakoauaa anne, ao I namakinna bwa I aki kaan ma te Atua. Ngke 14 au ririki, I nanakon Aaro aika kakaokoro n au kaawa, n aron te Anglican, te Baptist, ao te Aro ni Kaitibong. Ma I bon aki kaaniaki naba ma te Atua.

A mwaing imwina au utu nako Sydney, ike I a kaitiboo iai ma Winston ngke e motirawa. N aron are e taekinna, mamaroroakinan te Aro iroura e a kairia bwa e na moana ana reirei ma taani Kakoaua. Imwin anne, a a roroko ana reta irou ma kanoana kiibu aika bati! Ni koauana, I bon raraoma n te moantai ao n un naba. Ma imwina riki, I a ataia ae bon te koaua.

N 1962, I a mwaing nako Adelaide bwa I aonga ni kaan riki ma Winston. E bairea au tabo bwa N na maeka i rarikia te taanga ae taani Kakoaua aika Thomas ma Janice Sloman, ake mitinare ngkoa i Papua New Guinea. A rangi n akoai. N te tai anne ai tibwa 18 au ririki ao a buokai bwa N na kinaa riki Iehova. Ngaia are I a moana naba reiakinan Ana Taeka te Atua, ao e aki maan, I a kakoauaa raoi bwa I a kunea te koaua. Imwini mareu ma Winston, ti a moana naba maiura ae kakukurei ni beku ibukin Iehova, ae te maiu ae e buokira bwa ti na ataa riki kakawakin te moomi ae tamaroa are ti kunea, n aki ongei kangaanga.

Winston, karakina aromi ngke kam moani waakina ami beku ibukin Iehova.

E aki maan imwini marera, e a kauka nakoira Iehova “mataroan te mwakuri ae bati” ibukini kabatiaan riki ara mwakuri. (1Kor. 16:9) E kaota nakoira te moani mataroa Brother Jack Porter, ae te mataniwi n te aono n ara ekaretia ae uarereke. (Raou naba ngkai ni kaaina te Komete n te Aobiti n Tararua i Aotiteria.) A kaungaira Jack ma buuna ae Roslyn bwa ti na beku bwa bwaiania aika katoatai, ae te mwioko ae ti kukurei ni karaoia i nanon nimaua te ririki. Ngke ai 29 au ririki, I a tuangaki ma Pam bwa ti na karaoa te mwakuri ni mwamwananga n aban te Betebeke Maiaki, aika mena i aan te aobiti n tararua i Biti. Aaba aikai bon American Samoa, Samoa, Kiribati, Nauru, Niue, Tokelau, Tonga, Tuvalu, ao Vanuatu.

N taai akanne, a aki rangi n ataaki Ana Tia Kakoaua Iehova irouia aomata n aaba tabeua aika tionako riki, ngaia are ti riai n taratara raoi ao ni bwaina te wanawana. (Mat. 10:16) A uarereke taian ekaretia ao ekaretia tabeua a aikoa kona ni karekea ara tabo ni maeka. Ngaia are ti a kakaaea ara tabo irouia kaain te kaawa, ao a rangi n akoira n taai nako.

Iai nanom Winston n te mwakuri n rairai. E kangaa n ueke anne?

Ngke ti moana ara beku i Tonga, tii tabeua turaeki ao boroutia aika uarereke aika a kabonganai taari n te taetae n Tonga, ae te taetae naba teuana n te aono ni Polynesia. N te mwakuri ni minita a kabongana te boki ae The Truth That Leads to Eternal Life n te taetae n Ingiriti n reirei iai ma aomata. Ngaia are n tain te reirei n unimwaane ae aua wikina, a kukurei unimwaane aika teniman aika aki rangi n rabakau te taetae n Ingiriti bwa a na raira te boki anne nakon te taetae n Tonga. E taibinna Pam ao e kanakoa nakon te aobiti n tararua n te United States bwa e na boreetiaki. Tao wanua te wiki maanin karaoan te boki aei. E ngae ngke e aki rangi n tamaroa te rairai, ma a a tia ni buokaki n reiakina te koaua mai iai aomata aika kabongana te taetae n Tonga. Bon tiaki taan raitaeka ngai ma Pam, ma imwin anne, e a ueke nanora ni kani karaoa te mwakuri aei.

Pam, tera aron te maiu n aaba aika uarereke ni kabotauaki ma te maiu i Aotiteria?

E rangi ni kaokoro! N taabo tabeua, e rangi ni bati te maninnara, te man ae te kimoa, e korakora te riringa ao te kabuebue, te aoraki, ao n tabetai e aki tau te amwarake. N te itera are teuana, ni banen ara mwakuri n tokin te bong teuana ma teuana, e rangi ni kamaiu ao ni kabebete tataraakin taari man ara auti te rau ae akea oona ke te fale n te taetae n Samoa. N tain te maama, ti kona n nori nuun taian ni ao taamnein namwakaina i taari. E reke ara tai n taai akanne ni kananoi ara iango ao n tataro, ao n iaiangoi baika raoiroi ao tiaki baika aki raoiroi.

E reke tangiraia ataei iroura ao e kaunga te memena i rarikia. A aki toki ni miiakinira ngkai ianena ngaira aika ti mainaina. Ni menara i Niue, e riringa bain Winston ae buraerae te teei ae te mwaane ao e taku: “I mataai ni buraeraeni baim.” E aki nonora te aeka ni bai ae buraerae mai mwaina ao e rangi ni mimi iai!

Ti nanokawaki n nora te maiu ni kainnano ao kangaangan te maiu irouia aomata n aia tabo. A rangi ni kan taraan aia tabo ma e aki nakoraoi te kuakua iai ao e aki tau te ran ni moi. Ma bon akea aia kangaanga iai taari. Anne bon aroni maiuia ae a taneiai iai. A kukukurei ibukina bwa iai aia utu i rarikia ao aia tabo n taromauri, ao a a kona n neboa Iehova. Ti buokaki n aia katoto bwa ti na moanibwai baika kakawaki ao ni kabebetea maiura.

Pam, n tabetai ko riai n itiran ao ni kuukana kanami n te tabo ae rangi ni kaokoro iai aron te maiu. Ko kangaa ni karaoa anne?

I kaitaua tamau ibukin aei. E reireinai baika bati aika manena, n aroni kauraan te ai i aontano ao te kuuka iai, ao aron te maiu ma am bwai aika tii tabeua. Ni menara i Kiribati, ti maeka n te auti te rau ae uarereke, ae e atamanaki nanona, ao e ooaki n te baa. Ibukini kamwaakini kanara, I kena aontano ni karaoa nnen au ai ao I kabwakai ewanin iai bwa aiana. Ngkana N na karekea te ran, I nakon te mwanibwa n tataninga i rarikia aine. Ibukin itian te ran, a kabongana te kai ae tao onoua te buuti abwakina ma te roobu ae irariki ae kabaeaki i tabona, kaanga tein te kai n roaroa. N oneani mwin are e kabaeaki te matau i tabon te roobu a kabaea te roa iai. A riai aine akanne temanna imwin temanna ni kabwakaa te roa anne ao ni kamwainga baia teutana ao e a tebonako naba te roa. I taku ngai bwa e bebete ma ngke ai au tai, e boni bati kabwakaan au roa ma e a bebeibeti naba! Ngke e toki ngareia aine ake raou, e a roko ni buokai temanna irouia. A rangi n ibuobuoki n taai nako ma n akoi.

Kam a rangi n tangiri aaba aika uarereke ake kam beku iai. Kam kan taekin tabeua baike kam ururingi riki?

Winston: E boni maan teutana ao ti a atai katei tabeua. N te katoto, n angiin te tai ngkana a katauraoa te amwarake taari, a a bon anganira naba ni kabane kanaia. N te moantai, ti aki ataia ae ti riai ni katuka teutana ibukia. Ngaia are ti a boni kabanei naba ni kang! Ma ngke ti a ataa te katei iai, ti a kakatuka kanaia. N aki ongei kairua ake ti karaoi ma a rangi n akoira taari. A rangi ni kukurei n nonorira ni katoa onoua te namwakaina ke e nako riki, ngkana ti a manga kawara aia aono. Bon tii ngaira taani Kakoaua aika a raka aika a nonorira i rarikia ake boni kaain aia ekaretia.

E riki rokora bwa te anga naba n uarongorongo ae tamaroa nakoia kaain te kaawa. A bati kaain te kaawa ake a taku bwa tarira n te onimaki aikai a boni katea oin aia Aro. Ngaia are ngke e roko te mitinare ma buuna mai aban tinaniku ni kawariia, a a tibwa ataia kaain te kaawa bwa bon te Aro ae bubura ae a tabeakinia i marenaia ao a anaaki nanoia iai.

Pam: Te bwai ae I aki kona ni mwaninga naba taekana bon te tai are I mena iai i Kiribati, ae iai te ekaretia iai ae tii tabeman taari mwaane ao aine iai. E kabanea ana konaa n tabeakinira Itinikai Matera, ae tii ngaia te unimwaane n te ekaretia. E kawarira n te taina ma te bwaene ae kanoana teuana te bunnimoa. E taku: “Kanam.” E aki rereke kanakin te bunnimoa n taai akekei, ngaia are ti rangi ni kukurei iai. E uarereke ma bon te mwakuri n akoi ae ringaki iai nanora.

Tabeua te ririki imwina Pam, ko rinanon te rawawata ni bwakan natim are ko bikoukoua. Tera ae buokiko n tokanikai?

I bikoukou n 1973 ni menau ma Winston n aonon te Betebeke Maiaki. Ti baireia bwa ti na okira Aotiteria, ao aua te namwakaina imwina e a kabuanibwai natira. E rotaki naba n te rawawata Winston iai. E a tabe ni kekerikaaki rawawatan nanou ma e aki bua te namakin anne ni karokoa are e a reke iroura Te Taua-n-Tantani ae bwain Eberi 1, 2009. N te kaongora ae “Titiraki Mairouia Taani Wareware,” e kangai te titiraki: “Iai te kantaninga bwa e na manga kautaki te teei ae mate i nanon ana kai tinana?” E karaui nanora te kaongora aei bwa a bane n tiku baikai i nanoni bain Iehova, are karaoi bwaai ni kabane n te aro ae riai n taai nako. E na boni katauraoi aanga aika a na kona ni kamaiuia aomata nako man rawawataia ake a taonaki iai imwin te maiu n te waaki ae buakaka ae ngkai, ngke e kanakoa Natina ma te tatangira bwa e na ‘urui ana mwakuri Tatan.’ (1Ioa. 3:8) E buokira naba te kaongora aei bwa ti na ataa riki kakawakini “moomin te bwaeao” ae iroura ngkai ana aomata Iehova ngaira! Ti na mena ia ngke arona bwa akea ara kantaninga ibukin te Tautaeka n Uea?

Ti a manga reita ara beku ni kabwanina ara tai mwini maten natira. Ti beku tabeua te namwakaina n te Betaera i Aotiteria ao imwina ti a manga okira te mwakuri ni mwamwananga. N 1981, imwin ara beku i buki i New South Wales ao i Sydney i nanon aua te ririki, ti a manga kaoaki nakon te aobiti n tararua i Aotiteria, ao ti a beku iai ni karokoa ngkai.

Winston, e buokiko baike ko rinanoi n aaba ake n aonon te Betebeke Maiaki n am beku ngkai kaain naba ngkoe te Komete n te Aobiti n Tararua i Aotiteria?

Eng, n aanga aika bati. Te moan, e mwiokoaki Aotiteria bwa e na tararuaa te mwakuri i American Samoa ao i Samoa. Imwina e a manga kamwaingaki te aobiti n tararua i Nutiran bwa e na ikotaki ma te aobiti n tararua i Aotiteria. Te aobiti n tararua i Aotiteria e a tararuaa ngkai Aotiteria, American Samoa ao Samoa, te Aono ni Kuuka, Nutiran, Niue, Timor-Leste, Tokelau, ao Tonga. A bati mai buakon aaba aikai aika I a tia ni kawari bwa te tia tei ibukin te aobiti n tararua. Ngkai I a tia ni mwakuri ma taari aika kakaonimaki n aaba aikai, I a rangi ni buokaki iai ngkai I a beku ibukia man te aobiti n tararua.

Ni kabanean au maroro, I kan taekinna bwa i nanon ririki aika bati, I ataia ngai ma Pam ae tiaki tii ikawai aika ukoukora te Atua, n aron ae ti a tia n rinanona. A ukoukora naba “moomin te bwaeao ae rangi ni kakawaki” rooro n rikirake, e ngae ngke a aki kaotiota te kan ongora kaain aia utu. (2Uea 5:​2, 3; 2Rong. 34:​1-3) Ni koauana, Iehova bon te Atua ae tatangira ae tangiriia aomata nako n ikotaki ma ataei ao kaara, bwa a na karekea te maiu!

Ngke ti moan ukoukora te Atua 50 tabun te ririki n nako, ti aki ataia bwa tera ae e na riki imwina nakoira. Te koaua ibukin te Tautaeka n Uea boni moomin te bwaeao ae rangi ni kakawaki! Ti motinnanoia bwa ti na taua ni kamatoaa te bwaeao anne!