Ko Ataia?

E kangaa te tia borau ni bairea aroni mwanangana n te kaibuke n taai ake rimoa?

AKEA kaibuke ni bwatintia n ana tai Bauro. Ngkana a na mwananga taani borau, a riai n titirakinia tabeman bwa iai te kaibuke ni kaako ae a ataia bwa e na mwananga nakon te tabo are a na nako iai, ao e na bwatintia ke e aki. (Mwa. 21:​2, 3) E ngae ngke e aki nako te kaibuke n te tabo are e kan nako iai te tia borau, ma ngkana e roko ni matabaiawa ake tabeua, e kona ni manga tokara te kaibuke tewaana bwa e aonga ni kaan riki ma ana tabo are e na nako iai.​—Mwa. 27:​1-6.

Iai taai ake a mwamwananga iai kaibuke n te ririki, ma a kona naba ni bitaki. Irarikini buakan kanoan te bong, a kona n aki mwananga kaimoa aika taui katei aika irekereke ma maakakia taimonio ngkana a nora te kanikina ae buakaka, tao n aron ae a ongo tangitangin te mannikiba ae te reeben ae toka i aon te aneang, ke ngkana a nora te kaibuke ae koro. Ngkana a noria kaimoa bwa e a nakoraoi te ang, a a tauraoi naba ni borau. Ngkana e reke te kaibuke are e na mwananga, e a nako naba te tia borau ni kaania te uaabu ma ana bwai ao n tataningaa takaruaeani mwanangan te kaibuke.

E taku te tia korea rongorongon rimoa ae Lionel Casson: “Ni kaawan Rom, e bebete irouia aomata kakaaean te kaibuke are a na borau iai. E tei ana matabaiawa n te tabo are kaitiboo iai te karaanga ae Tiber ma taari. N te kaawa ae Ostia iai te tabo ae uakaan ae mwaawa ae bubura ae otabwaniniaki n taian aobiti. Angiin aobiti aikai bon aia bwai kambwana ni kaibuke mani matabaiawa aika kakaokoro, n aron te kambwana ni kaibuke mai Narbonne [ai Buranti ngkai], te kambwana ni kaibuke mai Carthage [ai Tunisia ngkai], . . . ao a a bati riki. Te aomata ae kakaaea te kaibuke are e na tokaria e a tii ongora naba n aobiti ake a mena i aana kaawa ake a mena i aoni kawaina.”

E baitii te borau n te kaibuke, ma iai naba karuanikaina. Ni mwamwanangani Bauro ni mitinare, iai taai ake e tokari iai kaibuke aika urubekebeke.​—2Kor. 11:25.