Bwaina te Ninikoria Bwa Bon te Tia Buokiko Iehova!

‘Ko na ninikoria ao kangai: “Te tia buokai Iehova.”’—EBERA 13:6.

1, 2. Baikara kangaanga ake a kaaitara ma ngaai naake a mwaing nako ngke a okiri abaia? (Nora te taamnei ni moan te kaongora aei.)

E URURING rikaaki ni kangai Eduardo:a “I boni mwaing nako tinaniku bwa N na karekea au mwakuri ae onimakinaki ao au mwane ae bati. Ma ngke I moana te reirei n te Baibara ma Ana Tia Kakoaua Iehova, I a noria bwa iai riki tabeu ae rangi ni kakawaki ae tabeakinan aia onimaki ao tiaki tii baika a kainnanoi au utu. Ngaia are I a okira abau nakoia au utu.”—I-Ebeto 6:4.

² E ataia Eduardo bwa e kakukureia Iehova ngke e a manga ikotaki ma ana utu. Ma n aron Marilyn are e taekinaki n te kaongora are mai mwaina, e a riai naba ni moana ana waaki ae aki bebete Eduardo ibukini manga kaokan ana reitaki ma ana utu. E kaaitara naba ma kangaanga ibukini boutokaani buuna ao natina n ana karekemwane ae rangi n uarereke. E na kanga ni kamaiuia ana utu? Baikara ibuobuoki ake e kantaningai mairouia tabemwaang n te ekaretia?

KANAKORAOAN URUAKIN TE ONIMAKI AO TE MAIU N UTU

3. Tera aron rotakia naati n akean tamaia i rarikia?

³ E taku Eduardo: “I ataia ae I a tia ni kakeaa bongan te bwai ae a rangi n tangiria natiu aine ae au taeka n reirei ao au tangira. I a tia n aki mena i rarikia ni wareki karaki man te Baibara, n tataro, n rabwatiia ao n takaakaro ma ngaiia.” (Te Tua-Kaua 6:7) E ururing rikaaki ni kangai ana karimoa te aine ae Anna: “I namakinna bwa I aki kamanoaki raoi n akean tamara i rarikira ni mwengara. Ngke e a oki, ti bon tii kinaa n ubuna ao ni bwanaana. I boni mwerengau naba ngkana e rabwatai.”

4. E na kanga akean te karo i rarikia ana utu n rotakibuaka iai ana konabwai ibukini kakororaoani mwiokoana ae atun te utu?

⁴ E kona naba akean te karo i rarikia ana utu ni kamamaraa ana konabwai ibukini kakororaoani mwiokoana are atun te utu ngaia. E kabwarabwaraa ni kangai Ruby are buun Eduardo: “Bon uoua mwiokoau bwa I riki n tina ao n tama, ao I a taneiai ni kakaraoi angini babaire n te utu. Ngke e a okirira Eduardo, I a riai n reireinai te bae nanonaki raoi ibukin te aantaeka irouia Kristian. N taai aikai, I boni kaururingai n tabetai are e a maeka buu i rarikiu.” (I-Ebeto 5:22, 23) E reitia ni kangai Eduardo: “A taneiai natira n nakon tinaia ni bubutii kariaiakaia ni karaoi bwaai tabeua. Ngkai kaaro ngaira, ti ataia bwa ti riai ni kaota kakawakin te katiteuanaaki n ara iango nakoia natira ao I riai n reireinai ni kairiia n te aro ni Kristian.”

5. E kanga temanna te karo ni manga moana kanakoraoan te baere e riki n akeana i rarikia ana utu, ao tera mwina?

⁵ E motinnanoia Eduardo bwa e na kabanea ana kona ni manga kanakoraoa ana reitaki n ana utu ao ni karikirakea korakoraia n te onimaki. “Tiau bwa N na karina te koaua irouia natiu rinanon au taeka ao au katoto, tiaki n ae N na tii taekinna bwa I tangira Iehova ma N na boni kaotiotia.” (1 Ioane 3:18) E kakabwaiaaki ana onimaki Eduardo iroun Iehova? E kaeka ni kangai Anna: “N noran ana kakorakora ni kabane n rikina bwa te karo ae raoiroi ao ni kaania riki ma ngaira, e a rangi ni bubura te bitaki. Ti namakina te kimwareirei ngke ti noria bwa e uaiakin tiia n te ekaretia. E kataia te aonnaba ni katikiiranako mairoun Iehova. Ma ti noria bwa a kaatuui aia iango ara karo i aon te koaua, ngaia are ti kataia ni karaoa naba anne. E berita tamara bwa e na aki manga kitanira ao e boni kakororaoia. Ngke arona bwa e kitanira, N na bae n aki mena n ana botaki Iehova n te bong aei.”

BUTIMWAEAN TE MWIOKO

6. Tera reireiaia kaaro tabeman are a karekea n tain te buaka?

⁶ E kaotaki n rongorongo tabeua bwa n tain te buaka i Balkans ao a kukurei ataei aika Ana Tia Kakoaua Iehova ake a maeka iai, e ngae ngke a a mwengabuaka. Bukin tera? Bwa a aikoa kona n nako ni mwakuri kaaro bwa a a tiku i rarikia natiia ao n reiakinia, n takaakaro ao ni kakaraki ma ngaiia. Tera te reirei iai? A kainnanoaki riki kaaro irouia natiia bwa a na mena i rarikia nakon te mwane ke bwaai n tangira. Ni koauana, a na kakabwaiaaki naati ngkana a tabeakinaki irouia aia karo ke n reiakinaki ni kataneiaaki, n aron ae taekinaki n Ana Taeka te Atua.—Taeka N Rabakau 22:6.

7, 8. (a) Tera ae kona ni kananokawakia kaaro tabeman ake a okiria aia utu? (b) A na kanga kaaro ni buokiia natiia n tokanikai i aon aia namakin aika bubuaka?

⁷ E kananokawaki bwa a a tia tabeman kaaro ake a okiria aia utu ni kaeka n aron aei ibukini kaitaraaia ma te riribai ke a aikoa onimakinaki irouia natiia: “E aera ko aki rangi ni kakaitau n au anganano ni kabane ake I karaoi ibukim?” Ma e ngae n anne, tao e kona n reke aroaroia ae aki raoiroi natiia man akean aia karo i rarikia. Tera ae e kona ni karaoia te karo ni manga kanakoraoa te kangaanga?

⁸ Butiia Iehova bwa e na buokiko n ota n aia namakin ni koaua am utu ao arom ni kaotiota tabeakinaia. Imwina, ngkana ko maroro ma am utu kariaia ao butimwaea bukinam n te kangaanga anne. E kona ni buokiko am kabwarabure ni koaua. Kioina ngkai e noria buum ma natim bwa ko kataia n taai nako ni kanakoraoi bwaai ni kabane, ane a na ataia bwa ko kakaonimaki. Ko kona ni karekea tangiram ao karineam teutana imwin teutana irouia am utu man nanomwaakam ao am taotaonakinnano.

‘KAREKEANI BAIKA A KAINNANOI AM UTU’

9. Bukin tera bwa e aki kainnanoaki ara kakorakora n taai nako n ukoukoran te kaubwai ae bati ibukini ‘karekeani kainnanoia ara koraki’?

⁹ E koreia te abotoro Bauro bwa ngkana a aki kona Kristian aika kara ni karekei baika kainnanoi i bon irouia, a riai natiia ma tibuia “ni [kabwarai] baeia nakoia aia karo ke tibuia.” Ma e reitia Bauro ni kaumakia Kristian ni kabane bwa a na rau nanoia ni baika kainnanoi n aron te amwarake, te kunnikai ao mwengaia. Ti aki riai ni kakorakoraira n taai nako ni karekea te maiu ni kaubwai ke ni kaikoa ara mwane ibukin te tai ae na roko. (Wareka 1 Timoteo 5:4, 8; 6:6-10.) E aki riai te Kristian n ukoukora te kaubwai ibukini ‘karekeani kainnanoia ana koraki’ n te aonnaba aei are e na waekoa ni maunanako. (1 Ioane 2:15-17) Ti aki riai ni kariaia “tangiran te kaubwai” ke “raraomaeakinani bwain te maiu aei” bwa a na ruanikai aroia ara utu n “taua raoi te maiu ni koaua” n ana waaki ae boou te Atua i aon te aba ae mena iai te raoiroi!—Mareko 4:19; Ruka 21:34-36; 1 Timoteo 6:19.

10. Ti na kanga ni kaotiota wanawanan te Atua ni kaineti ma te taarau ae rangi ni bati?

¹⁰ E ataia Iehova bwa ti kainnanoa te mwane teutana. Ma e aki kona te mwane ni kamaiuira ao ni kateimatoaira n aron te wanawana mairoun te Atua. (Te Minita 7:12; Ruka 12:15) N taai aika bati, a aki ataia aomata bwa mwaitira ae a na kabanea ni mwaingia nakon te aba teuana. Ao a aki koaua raoi bwa e na bati aia mwane ikekei. Ni koauana, e kona ni karuanikai mwaingia anne. A bati ake a mwaing nako aika a okirikaki ma aia taarau ae rangi ni bati. N oneani mwin are a na bati aia tai ni beku ibukin te Atua, a a beku irouia te koraki ake a taarau irouia n te mwane. (Wareka Taeka N Rabakau 22:7) Te aroaro ae ti wanawana iai bon te rarawa n taarau n te moantai.

11. E na kanga babairean raoi te kataumwane ni buokiia utu bwa a na kauarerekea aia kangaanga ibukin te mwane?

¹¹ E ataia Eduardo bwa e kona n tokanikai ni karaoan ana babaire ibukin teimatoana n tiku i rarikia ana utu, ngkana e karaoa ana babaire ae riai ibukin te mwane. A karaoa aia kataumwane ngaia ma buuna i aoni baika a rangi ni kainnanoi riki. Ibukini karaoan nanon aia kataumwane, a aikoa kabooi baika bati riki n aron are a karaoia ngkoa ngke e bati aia mwane. Ma a bane ni boonnano iai ao n aki kabanemwane i aoni baika aki rangi ni kainnanoaki.b E taku Eduardo: “N te katoto, I kaotinakoia natiu man reirei aika bobuaka iai te roo ao ni karinia n reirei aika raraoi ibukia aomata.” E bon tataro naba ma ana utu ibukini karekean ana mwakuri ni kareketianti are e na aki uruana aia babaire ibukini maiuakinan te onimaki. E kanga Iehova ni kaekaa aia tataro?

12, 13. Baikara aanga aika manena ake e kabonganai te karo temanna ni boutokaia iai ana utu, ao e kanga Iehova ni kakabwaiaa nanomwaakana ni kateimatoa maiuna ae bebete?

¹² E ururing rikaaki ni kangai Eduardo: “E kuri n aki tau ara mwane ibukini maiura i nanon ririki aika uoua. E kerikaaki mwaitin au mwane, e a rangi n uarereke au karekemwane ni kabotauaki ma ara kabanemwane ao I a rangi ni kua. Ma ti kona ni kaei bobotaki nako ao te mwakuri ni minita.” E motinnanoia Eduardo bwa e na bon aki naba iangoa karekean ana mwakuri n te tai teuana ae e na raroanako iai ma ana utu i nanon namwakaina ke ririki. E taku: “N oneani mwin anne, I reiakini karaoani mwakuri aika kakaokoro n te aro are ngkana e aki tauraoi te aeka ni mwakuri teuana, I kona ni karaoa are teuana.”

¹³ Ibukina bwa e riai Eduardo ni kabwaraa ana taarau teutana imwin teutana, e riai naba ni kabwaraa bakaon ana taarau. Ma e kukurei ni karaoa aei bwa e aonga ni beku ibukin Iehova ma ana utu. E taku: “E uarereke ae I karekea ngkai ni kabotauaki ma are I karekea n au mwakuri i tinaniku bwa e kee i aan 10 te katebubua. Ma ti aki roko n te baki. ‘E bon aki kimototo bain Iehova.’ Ni koauana, ti boni baireia bwa ti na bwaiania. N te tai ae aki maan, e a rikirake ara karekemwane ao e a tabe ni bebete riki tabeakinan au utu.”—Itaia 59:1, BG.

KAITARAANI KANGAANGA N TE UTU

14, 15. Tera ae a kona ni karaoia utu ngkana a tangiraki irouia aia koraki bwa a na rinea te mwane ma ni mwinibwaia taromaurian Iehova, ao tera ae kona n riki ngkana ti katea te banna ni katoto ae raoiroi?

¹⁴ A namakinna aomata n taabo aika bati bwa bon tabeia te anga te mwane ao bwaai n tangira nakoia aia koraki ma raoraoia. E kabwarabwaraa ni kangai Eduardo: “Bon anne irian ara katei ao ti kukurei ni karaoia.” Ma e reitia ni kangai: “Ti bon tiatiana karaoan anne. I kabwarabwaraa nakoia au koraki ma te akoi bwa N na anga ae I kona ni karekea ma a na aki rotaki iai au utu ni kaineti ma ara onimaki ao ara babaire.”

¹⁵ A kona n un ana koraki tabeman te aomata are e rineia bwa e na aki mwaing nako n ikotaki naba ma ake a rineia bwa a na okiri abaia, ike a a kona iai n aranna bwa akea ana tangira ke e babakaine. Bukin tera? Ibukina bwa a kantaningaa te mwane mairouna. (Taeka N Rabakau 19:6, 7) E taekina ae kangai natin Eduardo te aine ae Anna: “Ma ngkana ti aki kariaia moanibwaian te kaubwai nakoni maiuakinan te onimaki ni koaua, a kona n ataia ara koraki imwina riki bwa e rangi ni kakawaki maiura ni Kristian. Ma ngkana ti aki karaoa anne, a na aki kona n ota iai.”—Kabotaua ma 1 Betero 3:1, 2. 

KAOTIOTAN ONIMAKINAN TE ATUA

16. (a) Tao e na kanga te aomata temanna ‘ni mwamwanaia n iango aika kewe’? (Iakobo 1:22) (b) Aeka ni motinnano raa aika e kakabwaiai Iehova?

¹⁶ N rokon temanna te tari te aine n te aba teuana ae kaubwai riki are e katuka buuna ma natina imwina ao e a tuangia unimwaane n te ekaretia iai ni kangai: “A bati baika ti taon nanora iai bwa I aonga n roko ikai. E boni kerikaaki naba buu man ana beku ae te unimwaane n te ekaretia. Ngaia are au kantaninga bwa e na boni kakabwaiaa mwaingiu aei Iehova.” E aki toki Iehova ni kakabwaiai motinnano aika boto i aon onimakinana, ma E na kanga ni kakabwaiaa te motinnano ae kauntaba ma ana kantaninga, ai moarara riki ngkana e irekereke ma katinanikuani mwioko aika tabu?—Wareka Ebera 11:6; 1 Ioane 5:13-15.

17. Bukin tera bwa ti riai n ukeri ana kaetieti Iehova imwaini karaoan ara motinnano, ao ti na kanga ni karaoa anne?

¹⁷ Ukeri ana kaetieti Iehova imwain ae ko karaoa am motinnano ao am berita, tiaki imwini karaoaia. Tataroakina te taamnei ae raoiroi mairouna, wanawanana ao ana kairiri. (2 Timoteo 1:7) Titirakiniko ni kangai: ‘N aaro raa ae I kukurei iai n ongeaba iroun Iehova? N na ongeaba naba ngkana I kaaitara ma te bwainikirinaki?’ Ngkana ngaia anne, ko kukurei n ongeaba irouna e ngae naba ngkana e na kerikaaki maiuraoim iai? (Ruka 14:33) Bubutiia unimwaane n te ekaretia ibukin taeka n reirei man te Baibara, ao kaotiota onimakinan ana berita Iehova bwa e na buokiko rinanon touani mwin ana reirei ni kairiri. A aki kona unimwaane n te ekaretia ni karaoi motinnano ibukim ma a kona ni buokiko ni karaoi am rinerine ake a na kairiko nakon te kukurei ae teimaan.—2 I-Korinto 1:24.

18. Antai tabena boutokaan te utu, ao baikara bwaai aika riiriki ake a kona ni karekea angaia tabemwaang n ibuobuoki?

¹⁸ E anganaki atun te utu ‘uotana’ n te bong teuana ma teuana iroun Iehova bwa e na boutokaia ana utu. Ti riai ni kamoamoaia ao n tataro ibukia te koraki ake a kakororaoi mwiokoaia n aki katikuia buuia ke natiia imwia, n aki ongei kangaanga ao kataaki ake a kaaitara ma ngaai. A reke angara ni kaotiota te tangira ni Kristian ao nanoangaaia raora i marenara mani bwaai aika riiriki aika aki kantaningaaki n aroni kabuanibwai ke aoraki aika karina. (I-Karatia 6:2, 5; 1 Betero 3:8) Ko kona n anga te mwane ibukin te ibuobuoki n taai ni kangaanga ke ni buoka raom ni Kristian bwa e aonga ni karekea ana mwakuri n ana tabo? Ngkana ngaia anne, ko kona ngkanne ni kauarerekea te kangaanga ni katukaia ana utu teuanne ke neienne ibukini karekean ana mwakuri n te tabo teuana.—Taeka N Rabakau 3:27, 28; 1 Ioane 3:17.

URINGNGA BWA IEHOVA BON TE TIA BUOKIKO!

19, 20. Bukin tera bwa a kona n rau nanoia Kristian n ataakin ae e na buokiia Iehova?

¹⁹ Ti kaumakaki n te Baibara ni kangai: “Kam na maiuakina te aro ae akea te bakimwane iai, ngkai a rau nanomi n ami bwai akana iroumi. Bwa e kangai ngkoa te Atua: ‘N na bon aki kaakiko ao N na bon aki kitaniko.’ Ai ngaia ae ti rangi n ninikoria ao ti kangai: ‘Te tia buokai Iehova, N na aki maaku. Tera ae e kona ni karaoia te aomata nakoiu?’” (Ebera 13:5, 6) Ti na kanga ni maiuakina te reirei anne?

²⁰ E taku te mwaane ae rangi ni maan n unimwaane n te ekaretia n te aba ae aki rangi ni kaubwai: “A aki toki aomata n taekinia Ana Tia Kakoaua Iehova bwa a rangi ni kukukurei. A noria naba bwa a aki toki taani Kakoaua ni kunnikainia n te aro ae raoiroi ao n taraa n rangi ni maiuraoi e ngae naba ngke a maiu ni kainnano.” E boraoi aei ma are e beritanna Iesu ibukia te koraki ake a moanibwaia te Tautaeka n Uea. (Mataio 6:28-30, 33) Eng, e tangira te kabanea n tamaroa ibukim ma natim Tamam ae i karawa are Iehova. “A biribiri matan Iehova ni kabuta aonaba ni kabane, ba E na kaotia ba E korakora i bukiia akana moa n eti nanoia nako Ina.” (2 Rongorongo 16:9, BG) E a tia n anganira ana tua n ikotaki naba ma ake a irekereke ma te maiu n utu ao baika ti kainnanoi ibukini kakabwaiaara. Ngkana ti kakairi iai, ti a kaotia bwa ti tangiria ao n onimakinna. “Bon aei tangiran te Atua, ae ti na kakairi n ana tua, ao a aki rawawata ana tua.”—1 Ioane 5:3.

21, 22. E aera ngkai ko motinnanoia bwa ko na kaotiota onimakinan Iehova?

²¹ E taku Eduardo: “I ataia bwa e aki kona ni kaokaki te tai are I katuka iai buu ma natiu imwiu ma I aki iaiangoia bwa N na uringaaba iai. A bati raou ni mwakuri ngkoa aika a a kaubwai ma a bon aki kukurei. Bon iai aia kangaanga aika kakaiaki n aia utu. Ma e ngae n anne, I rangi ni kukurei ma au utu! E anaaki nanou n noran aroia taari tabeman n te aba aei bwa e ngae ngke a maiu ni kainnano, ma a teimatoa ni moanibwai baika a irekereke ma te onimaki. Ti bane n nora koauan ana berita Iesu.”—Wareka Mataio 6:33.

²² Bwaina te ninikoria! Motinnanoia bwa ko na ongeaba ao n onimakina Iehova. E bia kairiko tangiran te Atua, buum ao natim bwa ko na kakororaoa mwiokoam ni bwaai n taamnei n am utu. N tokina, ko na nora koauan ae bon ‘te tia buokiko Iehova.’