Ko Kakaitau Ngkai E Rangi n Tabeakiniko Iehova?
“A memena matan Iehova n taabo ni kabane, N tararaiia akana buakaka ma akana raoiroi”—TAEKA N RABAKAU 15:3, BG.
1, 2. Tera kaokoron tabeakinara iroun Iehova ma te rawerawe n taiani kainrawetaamnei?
N AABA aika bati ao e korakora kabonganaani kainrawetaamnei i nanon te kawai ibukin tuoani butin bao ni mwamwananga ao raweani kabuanibwai aika riki iai. A kona n ibuobuoki kainrawetaamnei akanne nakoia bureitiman ibukini kakaaean ao kaburean te turaiua ngkana a riki kabuanibwai ni kaineti ma okinakoan te aomata. Ni koauana, e a rangi ni kangaanga riki birinakoia aomata man aia bure ngkai a kamanenaaki kainrawetaamnei aikai n taabo nako.
2 Ma, e riai butanakoni kabonganaani kainrawetaamnei n riki bwa te kauring nakoira ibukin Tamara ae tatangira ae Iehova? E taekinaki n te Baibara bwa a memena matana “n taabo ni kabane.” (Taeka N Rabakau 15:3, BG) Ma e nanonaki n aei bwa e taratarai baika ti karaoi n taai nako tii ngkana ti urui ana tua? E tii tarataraira te Atua bwa e na kamatoai ana tua nakoira ao n iangoa katuuaaeara? (Ieremia 16:17; Ebera 4:13) Ti aki ngaia anne! E tarataraira Iehova ibukina bwa e tangirira n tatabemanira nako ao e tabeakini marurungira.—1 Betero 3:12.
3. Baikara aanga aika nimaua aika ti na rinanoi ibukin tabeakinara iroun te Atua?
3 Tera ae na buokira bwa ti na kakaitau ibukin tabeakinara iroun te Atua ngkai e tangirira? Ti na rinanoi arona ni kaotiota aei. E karaoia ibukin (1) kauringara imwaini karaoan ae buakaka, (2) kaetakira ngkana ti tou mwaneka aika bure, (3) kairirara rinanoni booto n reirei n ana Taeka, (4) buokara ngkana ti aitara ma kataaki aika kakaokoro ao (5) kakabwaiaara n noran nanora ae raoiroi.
E KAURINGIRA TE ATUA AE RANGI N TABEAKINIRA
4. Tera raoi oin ana iango Iehova ngke e kauringa Kain bwa e ‘titiku i rarikin te mataroa’ te buakaka?
4 Te moan, ti na iangoa aron te Atua ni kauringira ngkana e a rikirake i nanora tangirani mwakuri aika bubuaka. (1 Rongorongo 28:9) Ngkana ti na kakaitau ibukin tabeakinara iroun te Atua, iangoa arona nakoni Kain are “e bati n un” ngke e aki butimwaeaki iroun te Atua. (Wareka Karikani Bwaai 4:3-7, BG.) E kaumakaki Kain iroun Iehova bwa e na manga “karaoa ae raoiroi.” Ngkana e aki kani karaoia, e kauringnga Iehova bwa e ‘titiku i rarikin te mataroa’ te buakaka. E kangai te Atua nakoina: “Ko riai n tokanikai i aona.” E tangiria bwa e na ongo Kain te kauring anne bwa e aonga ni manga ‘mutiakinaki.’ Ngkana ti mutiakinaki iroun te Atua, e na kateimatoaaki iai ara iraorao ae raoiroi ma ngaia.
5. N aanga raa are e kauringira iai Iehova ibukin iango aika aki raraoi ake a kona n reke iroura?
5 Ma tera arora ni boong aikai? E kona n nori nanora Iehova ao ti aki kona ni karabai baika ti tangiri ao ara iango mairouna. E tangiria Tamara ae tatangira bwa ti na karaoa ae raoiroi ao e aki kairoroira bwa ti na bitii aroarora. E kauringira rinanon ana Taeka ae te Baibara ngkana ti a karaoa ae buakaka. N te aro raa? Ti aki toki ni boo ma te kibu teuana n ara tai ni wareware n te Baibara ni katoabong, ae kona ni buokira bwa ti na tokanikai i aoni kani karaoan ae buakaka ao iango aika aki raraoi. Irarikin anne, a kona ara boki ao maekatin aika aanaki man te Baibara ni kamataataa te kangaanga ae ti tabe ni kabokorakora ma ngaia ao arora n tokanikai iai. Ti bane ni karerekei naba reirei ni kairiri ake a roko raoi n taia n taai ni bobotaki n ara ekaretia!
6, 7. (a) E aera e kona n taekinaki bwa te boki ao te maekatin ae katauraoaki ibukia mirion ma mirion, bon te bwai ni kakoaua bwa e tabeakiniko te Atua ae tatangira? (b) Ko na kanga ni kakabwaiaaki n aron Iehova n tabeakiniko?
6 Boni bwaai ni kakoaua kauring akanne ni kabane ibukin aron Iehova ae tatangira ae rangi n tabeakinira n tatabemanira nako. Ni koauana, a a tia taeka aikai ni mena i nanon te Baibara i nanon tienture aika bati, a katauraoaki ao ni koreaki booki ao maekatin aika aanaki man te Baibara n ana botaki te Atua ibukia aomata aika mirion ma mirion, ao e katauraoaki te reirei ni kairiri ni bobotaki n te ekaretia ibukia kaaina ni kabane. Ma e ngae anne, e kaira am iango Iehova n aanga aikai ni kabane nakon ana Taeka bwa ko kona ni bitii baika ko tangiri. Ngaia are e a kona n taekinaki bwa aio te bwai ni kakoaua ae e bon tabeakiniko Iehova ae tatangira.
7 Ngkana ti na kakabwaiaaki man ana kauring te Atua, ti riai moa n ataia ae e bon tabeakinira raoi. Imwina, ti riai ni maiuakina ana Taeka ao ni kakorakoraira ni kanakoi iango ni kabane ake e aki kukurei iai te Atua. (Wareka Itaia 55:6, 7.) E na aki rangi n uruaki nanora ngkana ti mutiakini kauring ake ti anganaki. Ma iangoia bwa aongkoa ti a irii nanora aika bubuaka. Tera ngkanne ana ibuobuoki Tamara ae tatangira ae e anganira?
E KAETIIRA TAMARA AE TABEAKINIRA
8, 9. E kanga te reirei ni kairiri are e anga Iehova rinanoia ana toro ni kaotaki iai bwa e rangi n tabeakinira? Kabwarabwaraa.
8 Ti riai n ataa raoi tabeakinara iroun Iehova ai moarara riki ngkana ti kaetaki. (Wareka Ebera 12:5, 6.) Ni koauana, ti aki kukurei ngkana ti anganaki te reirei ni kairiri ke ni kaetieti. (Ebera 12:11) Ma e ngae n anne, iangoa aron temanna are e anganira te reirei ni kairiri ae ti riai n rinanona. E riai n ataa raoi te bwai ae ti karaoia ae kona n rota ara iraorao ma te Atua ae Iehova ao e riai n tabeaianga n ara namakin. E na tauraoi naba ni kabanea ana tai ao korakorana ae kainnanoaki ni kaotia nakoira man te Baibara ae ti kona iai ni bitii aroarora bwa e aonga ni kukurei iai te Atua. E rangi n tabeakinira teuare Nibwan te aeka n reirei ni kairiri anne ae Iehova.
9 Ti na iangoa te katoto teuana n aroia aomata n anganira reirei ni kairiri ake e kona ni kaotaki iai tabeakinara iroun te Atua. E aki toki te tari te mwaane temanna ni matakuakina te bwaitingako imwain reken te koaua irouna ma e tokanikai i aon aroarona anne. Ma e ngae n anne, bon iai naba tangiran anne irouna kaanga aroni mwaakaron te ai ae tuai ni mate. Ngke e a reke ana tareboon ae uouotaki ae boou, e a manga rikirake i nanona tangirani matakuakinan te bwaitingako. (Iakobo 1:14, 15) E kabongana ana tareboon bwa e aonga ni matakuakina te bwaitingako n te Internet. N te bong teuana ngke e uarongorongo i aon te tareboon, e anganako ana tareboon nakon te unimwaane n te ekaretia temanna bwa e na kakaaei atureti tabeua iai. Ngke e kabongana te tareboon ngkekei naba te unimwaane anne, a a kaoti naba atureti tabeua aika kamimi. E a riki aei bwa kakabwaiaan te tari te mwaane ae ruanikai ana onimaki. E karekea te reirei ni kairiri n taina ae riai teuaei, e kakabwaiaaki ni kaetana are e anganaki ao n tokina e a tokanikai i aon tangirani baika bubuaka. Ai kakaitaura ngaira nakon Tamara are i karawa ae tabeakinira, are e nori naba ara kairua aika ti karabai ao e kaetiira imwain ruanikain ara iraorao ma ngaia!
TI KAKABWAIAAKI NI MAIUAKINANI BOOTO N REIREI MAN TE BAIBARA
10, 11. (a) N te aro raa ae ko kona n ukera iai ana reirei ni kairiri te Atua? (b) Tera aron te utu teuana n toua mwin ana reirei ni kairiri Iehova ma te wanawana?
10 E anene te tia areru nakon Iehova ni kangai: “Ko na kairirai n am taeka n reirei.” (Taian Areru 73:24, BG) Ti kona n ‘ataa’ Iehova ngkana ti reiakina ana Taeka ibukini ukeran ana iango ni kaineti ma ana kairiri n taai ake ti kainnanoi iai. E aki tii kakabwaiaaki ara onimaki mani maiuakinani booto n reirei n te Baibara, ma e ibuobuoki n taai tabetai ibukini tabeakinani baika ti kainnanoi ni maiura.—Taeka N Rabakau 3:6.
11 E kaotaki nakoira aron Iehova ni kaiririia tabemwaang n te katoto teuana n te bwai ae rinanona te tia ununiki are e riiti n te aono teuana ae maungaunga ae Masbate i Biribin. A a tia teuaei ma buuna ni beku bwa regular bwaiania ao n tararuaa naba aia utu ae bubura. N te bong teuana, a kubanako ngke a karekea te reta ni kanaanako mairoun te tia ababa. Tera bukini kanakoaia? A a tia n uaraoaki bwa a aki kakaonimaki. E ngae ngke e tabeaianga te tari te mwaane anne bwa e na kakaaea ia te tabo ae a na maeka iai ana utu, ma e taku: “E na boni katauraoia ibukira Iehova. E tabeakini baika ti kainnanoi n taai nako n aki ongea te bwai ae riki.” E aki kaingingaki ana onimaki te tari anne. Tabeua te bong imwina, a a oki nanoia te utu aei bwa a a ataia ae ngaia a aki riai ni kitana te tabo anne. Tera ae e a tia n riki? N aki ongei taeka ni bukibuki, e a tia te tia ababa n tarataraa aroaroia kaain te utu aika taani Kakoaua akanne bwa a teimatoa ni kaotiota te nano ae rau ao te karinerine mani kairaia ni booto n reirei man te Baibara. E rangi n ringaki nanon te tia ababa aei n te aro are e aki tii kariaia tikuia ma e a manga angania riki mwakoron abana bwa a na ununiki iai. (Wareka 1 Betero 2:12.) Eng, e buokira Iehova ni kairirira rinanon ana Taeka bwa ti na kaaitarai kangaangan nako n te maiu aei.
TE RAO AE BUOKIRA N NANOMWAAKA I AANI KATAAKI
12, 13. N aaro raa aika a kona iai tabeman n iangoa te Atua bwa e bon nora rawawataia ke e aki?
12 Ma e kona n riki n tabetai te kataaki i nanon te tai ae maan. Ti kona ni kabokorakora ma te aoraki ae wenemaan, taeka n totoko mairouia ara utu ni kaan ke te bwainikirinaki ae teimatoa. Ma tera aron te rawawata teuana ae rangi ni korakora ae ti na nanomwaaka iai ibukin te aki boraoi n iango ae kakaiaki ma temanna n te ekaretia ibukini kakaokoron aroarora?
13 N te katoto, ko kona ni maraki n te taeka ae ko iangoia bwa e ribuaka te aba iai. Ko kona ni kangai: ‘E aki riai n riki aei n ana botaki te Atua!’ Ma e ngae n anne, iai mwiokoan te tari are e taekina anne n te ekaretia ao e taraa n ae e raoiroi aroarona irouia tabemwaang. Ko bae n iango ni kangai: ‘E na kanga n riki aei? E aki noria Iehova? E na aki karaoa te bwai teuana?’—Taian Areru 13:1, 2; Abakuka 1:2, 3.
14. Tera bukina teuana ae e aki kani waekoa iai te Atua ni katoki ara kangaanga n tatabemanira nako?
14 A bati bukina aika kakawaki iroun Iehova ngkai e aki waekoa n ibuobuoki. N te katoto, e ngae ngke ko kona n iangoia bwa a bon riai ni bukinaki iai tabemwaang ma e kona ni kaokoro ana iango te Atua iai. Ko kona n aki ataia ae e kakaiaki riki am bure n taraakina irouna. Ko kona n iangoa te taeka are ko iangoia bwa e kammaraki ma ni koauana, bon te reirei ni kairiri ae tonuraoi are ko riai ni kananoa am iango iai. N rongorongoni maiun Brother Karl Klein are e beku n te Rabwata n Tautaeka ao e taekina iai te tai teuana ngke e boaaki n te aro ae mataata iroun Brother J. F. Rutherford. Imwina riki, e moangare Brother Rutherford ao ni butimwaea Brother Klein ma taeka aikai: “Ko na mauri Karl!” E ngae n anne, e teimatoa n tiku te nano ae aki raoiroi iroun Brother Klein imwini boaakina ngaia are e tii kabwarabae ni kamauria. Ngke e a ataia Brother Rutherford bwa e bon nanobuaka naba Brother Klein, e a kauringnga are e kona ni kai reke bwa konan te Riaboro. E korea ae kangai imwina riki Brother Klein: “Ngkana ti kaikoa unra iroun tarira ai moarara riki ngkai iai riaina n taekina anne ibukini mwiokoana, ti a bon angan te Riaboro iai ana tai bwa ti na mwane irouna.”
15. Tera ae ko riai n ururingnga ngkana ko aitara ma kataaki?
15 Ti kona n teimatoa n aki taotaon nanora ngkana ai akea tokin te kataaki. Ti na kanga ni kekeiaki ribuakona? Iangoia bwa ko kabuta te kaa ni kawain te botannaomata ae a uarerena iai kaa ao e a tii bae naba tangaroam iai. Ko aki ataia bwa e na maanra am tai n tataninga. Ngkana ko a moanna n un ao ni kataia ni kakaaea kawaim teuana, e na bae ni bua kawaim. N tokina ko na rimwi n roko n am tabo nakon are ngke ko taotaona nanom ao n teimatoa n tiku ni kawaim anne. Ai arona naba bwa ngkana ko teimatoa n toua te kawai are kairaki n Ana Taeka te Atua, ko na bon roko raoi n am tabo.
16. Tera bukina riki teuana ngke e taraa ni baenikai Iehova ni katoki ara kangaanga?
16 E taraa ni baenikai Iehova ni katoki ara kangaanga ibukina bwa e tangirira bwa ti na karekea te reirei ni kataneiai ae kakawaki. (Wareka 1 Betero 5:6-10.) E bon aki karikii kangaanga te Atua. (Iakobo 1:13) Bon “teuare kairiribai nakoimi are te Riaboro” ae karikii angiini karawawata. E ngae n anne, e kona te Atua ni kabongana te kangaanga ae kakaiaki ni buokira iai bwa ti na korakora n te onimaki. E nori rawawatara ao ibukina ‘bwa e mumutiakinira,’ e na bon taraia raoi bwa e na waakinako tii “i nanon tabeua te tai.” Ko kakaitau ngkai e rangi n tabeakiniko Iehova ngkana ko kaaitara ma kataaki ao n onimakinna bwa e na boni kakaaea te anga ae ko na nanomwaaka iai ni karokoa te toki?—2 I-Korinto 4:7-9.
KO NA KAKABWAIAAKI IROUN TE ATUA
17. Antai ae e ukoukora nanona Iehova, ao bukin tera?
17 Te kabanea, iai bukina ae rangi ni kakawaki iroun te Atua ngkai e ukeri nanoia aomata n noria bwa antai ake a tangiria ni koaua. E taekina aei te burabeti ae Anani nakon te Uea ae Ata: “A biribiri matan Iehova ni kabuta aonaba ni kabane, ba E na kaotia ba E korakora i bukiia akana a moa n eti nanoia nako Ina.” (2 Rongorongo 16:9, BG) Ngkai e noraki nanon Ata ae aki tabwanin raoi iroun te Atua, e na boni “kaotia ba E korakora” nakoim ngkana ko teimatoa ni karaoa ae eti.
18. Tera am namakin ngkana akea ae tabeakiniko, ao tera ae ko riai n ururingnga ibukin Iehova? (Nora te taamnei ni moan te kaongora aei.)
18 E tangirira te Atua bwa ti na “ukoukora te raoiroi,” ti na “tangira te raoiroi” ao ni “karaoa ae raoiroi” bwa e aonga ni ‘kaota te akoi’ nakoira. (Amota 5:14, 15, BG; 1 Betero 3:11, 12) E ataiia te koraki aika raoiroi Iehova ao e kakabwaiaia. (Taian Areru 34:15) Iangoa te katoto ni kaineti ma taani kabung ake kaain te baronga ae Ebera aika Tibera ao Nei Bua. N tautoronakia tibun Iteraera irouia kaain Aikubita ao a tuangaki aine aikai irouni Barao bwa a na tiringia naati mwaane ni kabane, aika kaain te baronga ae Ebera ake a a tibwa bungiaki ma a maaka riki te Atua nakoni Barao. Ni koauana, a kawakinaki maiuia merimeri mani mataniwin nanoia aine ake a mamaaka te Atua akanne. A anganaki naba te kona ni kariki Tibera ao Nei Bua imwina riki iroun te Atua. (Te Otinako 1:15-17, 20, 21. BK) A bane n noraki aia mwakuri aika raoiroi iroun Iehova. N taai tabetai, ti kona n namakinna ae akea ae tabeakin ara mwakuri aika raoiroi. Ma e bon tabeakin Iehova. E mutiakin ara mwakuri ni kabane aika raoiroi ao e na kakabwaiaira.—Mataio 6:4, 6; 1 Timoteo 5:25; Ebera 6:10.
19. E kanga n ataia te tari te aine temanna bwa e bon nori mwakuri aika raoiroi Iehova?
19 E ataia te tari te aine i Austria bwa e noraki ana mwakuri korakora iroun te Atua. Ngkai ana bakatibu kaain te aba ae Hungary, e a anganaki ana atureti te aine ae kabongana taetaen te aba anne bwa e na reitaki ma ngaia n te mwakuri ni minita. E waekoa ni kawara te tabo arei ma akea kaain te auti. E teimatoa n okiokira te auti anne. E namakinna n taai tabetai bwa titeboo ma iai kaaina ma bon akea ae e kaekaa. E katikui booki ao maekatin, ana reta, nambwan ana tareboon ao a a bati riki. Imwin teuana ma te iterana te ririki n okiokira te auti anne ao n tokina e a kaukaki te mataroa! E butimwaeaki te tari te aine aei iroun te aine ae momoaaomata are e kangai nakoina: “Nakomai riin. I wareki ni kabane baike ko katikui ao I teimatoa ni kantaningaiko.” Akea namakinan te kani mamaroro ma aomata iroun neiei bwa e tabe ni bwainnaorakiaki aorakina ae te kaentia. E a moanaki n te tai naba arei te reirei n te Baibara ma ngaia. Eng, e a tia ni kakabwaiaaki te tari te aine aei iroun te Atua man taningamarauna n ana mwakuri korakora!
20. Tera ae ko namakinna ibukin Iehova ae rangi n tabeakiniko?
20 E nori baika ko karaoi Iehova ao e na boni kakabwaiai. Ngkai ko a ataia ae e tarataraiko te Atua ko a namakinna bwa kaanga ko a mena i aan ana kainrawetaamnei te aomata temanna ae e aki toki n tutuo. Ma ko bia namakinna bwa ko a kaaniaki riki nakon te Atua ae rangi n tabeakiniko!