E A Uakaan Te Bwaretaiti N Te Aonnaba!
“Tamara are i karawa, E na tabuaki aram. E na roko ueam. E na tauaki am taeka i aonaba, n ai aron tauana i karawa.”—Mataio 6:9, 10.
TE TATARO ae taabangaki aei, e rangi n ataaki irouia aika a mwaiti n arana ae Tamara are i karawa ke Ana Tataro te Uea, are ngaia ae e karekea nakoia aomata nako te kaantaninga. N te aro raa?
E kaotaki n Ana Tataro te Uea aei bwa Ana Tautaeka n Uea te Atua e na kakoroa nanon ana kaantaninga te Atua n aron ae e a kakoroaki ngkai i karawa. Ao ana kaantaninga te Atua bwa e na manga kaoka te aonnaba aei bwa te Bwaretaiti. (Te Kaotioti 21:1–5) Tera raoi Ana Tautaeka n Uea te Atua, ao e na kanga ni kaoka te aonnaba aei bwa te Bwaretaiti?
Te Tautaeka ni Koaua ae Kateaki Iroun te Atua
Ana Tautaeka n Uea te Atua bon te tautaeka ni koaua. N aron ae bon te tautaeka raoi, e na riai n iai taan tautaeka, tuua ao aomata aika a na tautaekanaki. Iai baika a kainnanoaki aikai n Ana Tautaeka n Uea te Atua? Nora ana kaeka te Baibara nakon titiraki aika tenua aika i nano aikai:
Antai Aika A na Tautaeka n Ana Tautaeka n Uea te Atua? (Itaia 33:22) E a tia Iehova ae te Atua n rinea Natina ae Iesu Kristo, bwa e na mataniwi n te Tautaeka n Uea aei. (Mataio 28:18) Iaan ana kairiri Iehova, e a tia Iesu n rinea te mwaiti ae onoti mani “baronga nako ma taetae, ma natanaomata, ma botanaomata” bwa a na uea ma ngaia bwa taan ‘tautaekana te aonnaba.’—Te Kaotioti 5:9, 10.
Baikara tuua ake e katei Ana Tautaeka n Uea te Atua ake a na ongeaba iai aomata aika a na tautaekanaki? Tabeua tuua ke kaetieti a kainnanoaki iai karaoani mwakuri aika onoti. E katerea te tua ae moan te kakawaki mai buakon tuua akanne Iesu ngke e kangai: “Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea. Mooa te tua aei, ao e korakora. Ao ai aron naba are te kauoua, are kangai, Ko na tangira raom n ai aron tangiram i bon i roum.”—Mataio 22:37-39.
Tuua ake tabeua, a kainnanoaki iai aomata ake a na tautaekanaki n Ana Tautaeka n Uea te Atua, bwa a na rawa nakoni mwakuri tabeua. N te katoto, e anga te taeka ae mataata te Baibara ae kangai: “Kam na tai burebureaki: e aki reke uean te Atua irouia taani wene ni bure, ma taan taromauri boua, ma taani kimoa bun te aomata, ma mwaane aika baka ni kan aine, ao mwaane aika bo ma mwaane, ao taan ira, ma akana mataai ni kanibwaibwai, ma taan nim kamanging, ma taan taetaebuaka, ma taani babakanikawai.”—1 I-Korinto 6:9, 10.
Antai aika a na tautaekanaki i aan Ana Tautaeka n Uea te Atua? E kabotauia te koraki ake a na tautaekanaki i aan Ana Tautaeka n Uea te Atua Iesu ma tiibu. E taku: “A na ongo bwanau; ao a na ti te nanaina, ao ti temanna te tia kawakin-tiibu.” (Ioane 10:16) Ngkana ko kan tautaekanaki i aan Ana Tautaeka n Uea te Atua, e aki riai bwa ko na tii taku bwa ko kakairi iroun te tia Kawakin Tiibu ae Raoiroi ae Iesu, ma e riai bwa ko na karaoa naba are e tua. E taku Iesu: “A aki bane n rin n uean te Atua akana kangai nako Iu, Te Uea, Te Uea; ma e na rin iai ane taua ana taeka Tamau are i karawa.”—Mataio 7:21.
Mangaia are te koraki ake a na tautaekanaki i aan Ana Tautaeka n Uea te Atua, a riai ni kakabonganaa ao ni karinea aran te Atua ae Iehova, n aron naba are e karaoia Iesu. (Ioane 17:26) A ongeaba nakon ana kaetieti Iesu are a na reireinia aomata nako “euangkerion uean te Atua.” (Mataio 24:14; 28:19, 20) Ao a kaotiota naba te tangira ni koaua i marenaia.—Ioane 13:35.
“A na Tiringaki Iai Akana Urua Aon te Aba”
Baika a ririki n te aonnaba aei a kanikinaea bwa e a uakaan rokon Ana Tautaeka n Uea te Atua, ao e na karokoi bitaki aika korakora aika raraoi nakon te aonnaba aei. Ti kanga n ataa aei? Uanga te ririki n nako ao Iesu e taekin naba kanikina aika a rangi ni kakawaki ake a na katerea bwa e a “kaan uean te Atua.” (Ruka 21:31) N te kaongora are imwain aei ao a kaotaki iai kanikina aikai bwa a a tia n noraki ni kabutaa te aonnaba.
Tera ae na roko ngkanne imwina? E kaeka Iesu ni kangai: “Ba ane e na bati te rawawata iai, ae akea arona ma ngke a moa ni karikaki aonaba, ao bon akea arona naba rimwi.” (Mataio 24:21) Kabuanibwai aika a na riki aikai bon tiaki mairouia aomata. Ma boni mairoun te Atua ike a nang “tiringaki iai akana urua aon te aba.” (Te Kaotioti 11:18) A nang “teweaki nako . . . mai aon te aba” akana buakaka ake a urua te aonnaba aei n aia mwakuri ni bangaomata. Ma a “na maekana aon te aba” akana raoiroi ake a toro iroun te Atua n te aro ae riai.—Taeka N Rabakau 2:21, 22.
Iai bukina aika riai iroun Iehova ae te Atua are e nang karokoa iai te bitaki ae rangi ni karuanikai aei. Bukin tera? Iangoa te kabotau aei: Iangoia bwa iai am auti ae tau buburana ae kamanenaaki irouia aomata. Tabeman taani kamanenaa a raoiroi aroia ao a atataiaomata; a kakabwakaa boon tikuia ao a tararuaia raoi. Ma iai naba tabeman aika a rangi ni kakeru ma ni bangaomata; a rawa ni kabwakaa boon tikuia ao a urubwai naba. E ngae ngke a okioki ni kauringaki bwa a na katoki aroia aikai, ma a bon teimatoa naba ni kakaraoi. Tera ae ko na karaoia? Ngkai bon te tia bwaibwai ngkoe, ko na boni bae ni kakionakoia ake a rangi ni buakaka.
N aron naba anne, iai riain Iehova ae te Atua, ae te tia Karika te aonnaba ma bwaina nako, ni baireia bwa antai aika a na maeka n te aonnaba ao antai aika a na aki. (Te Kaotioti 4:11) E katereaki ana kaantaninga Iehova bwa e na kamwawaia aomata aika bubuaka ake a aki tabeakina ana kaantaninga ao ake a tuki naba inaomataia aomata ni karaoi baika raraoi.—Taian Areru 37: 9–11.
E na Manga Kaokaki te Bwaretaiti
N te tai ae waekoa, ao e nang tautaekanaki te aonnaba aei n Ana Tautaeka n Uea te Atua are kairaki iroun Iesu Kristo. E arana te moan tetere aei Iesu bwa “manga kaboouani bwaai.” (Mataio 19:28, New International Version) Tera aron te maiu n te tai anne? Nori ana berita te Baibara aikai:
Taian Areru 46:9. “E katoki buaka, ao tokina tabon aonaba.”
Itaia 35:1. “E na kukurei te raereke ma te tabo ae kamaroa; ao e na kimareirei te rereua, ao e na ue n ai aron te roti.”
Itaia 65:21–23. “Au koraki aika rineaki a na kamaania ni bwain aia makuri baiia. A na aki matebuaka aia makuri, ao a na aki bung ba a na reke kaiia natiia.”
Ioane 5:28, 29. “E na bon roko te aua, ae a na bane iai n ongo bwanana [Iesu] aomata ake a mena i nanon ruaia ni mate, ao a na oti nako.”
Te Kaotioti 21:4. “E na kabane rannimataia te Atua ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki.”
Bukini Kakoauaana
Ko kakoauai ana berita nako te Baibara? E a kaman taekinna te Baibara bwa a na mwaiti aika a na bon aki. E taekinaki ae kangai: “A na roko ni boong aika kaitira taani kakaniko . . . aika nang toua mwin oin aia kaibabaru, ao ane a na kangai, E nga rokona ae taekinaki? Ba, ma ngke a matu ara bakatibu, ao ai uan nako naba bwaai ni kabane ma ngke a moa ni karikaki aonaba.” (2 Betero 3:3, 4) Ma a bon rangi ni kairua taani kakaniko akanne. Iangoi bukina aika aua aika a na kamatoaa nanom bwa ko boni kona ni kakoauai baika taekinaki n te Baibara:
(1) E kaeti naba baike a riki n te aonnaba ngkoa te Atua. Te Ieka are n ana bong Noa, bon te katoto ae rangi n rianako.—2 Betero 3:5-7.
(2) A bon eti raoi baike e taekin Ana Taeka te Atua ni kaineti ma baika a riki ni katobibia te aonnaba.
(3) Bon tiaki “uan nako naba bwaai ni kabane ma ngke a moa ni karikaki aonaba.” N aron ae e tuai man nonoraki mangkoa ao e a ruanikai ara buraneti aio man aroia aomata n reitaki n aaro aika kakaokoro, n aroaroni maiuia, ao n aia mwakuri ake e a kakerikaka ana konabwai te otabwanin ni kateimatoaa te maiu.
(4) E a tataekinaki ngkai “euangkerion uean te Atua” i aonnaba ni kabutaa, are e a katereaki iai bwa e a ‘uakaan rokon te toki.’—Mataio 24:14.
A kaoko Ana Tia Kakoaua Iehova bwa ko na reiakina Ana Taeka te Atua ae te Baibara ma ngaiia, bwa ko aonga ni kona n reiakina iai te kaantaninga ni kaineti ma te maiu ae aki toki i aan Ana Tautaeka n Uea te Atua. (Ioane 17:3) Eng, e a mena ngkai imwaia aomata taai aika tamaroa. A bon uakaan ngkai taai aika a rangi n raoiroi! Ko na ooa naba te tai ae e a uakaan aei?
[Kabwarabwaraan n iteraniba 7]
A bon rangi ni kairua te koraki ake a taku bwa ai bon aroarona nako naba bwaai n ai aroia rimoa
[Taamnei n iteraniba 8]
Ko na ooa naba te tai ae e a uakaan aei?