Taai Aika Kamamate Aikai
E A KAMAN taekinna te Baibara bwa a na rinanon “tai aika kamamate” botannaomata. E arana naba te tai aio bwa “boong aika kaitira.” (2 Timoteo 3:1-5; 2 Betero 3:3-7) E taekina naba te tai aei Iesu Kristo ngke e kaekaa te titiraki are a tabekia taan rimwina ni kaineti ma ‘tokin te waaki ae ngkai.’ (Mataio 24:3) E koaua ae ti a maeka ngkai ni boong aika kaitira? Kabotaui baike e a kaman taekinna te Baibara ma ribooti ake a tibwa karaoaki akana a mwaneweaki i nano, ao iangoia bwa tera am motinnano iai.
Te bwai ae e a kaman taekinna te Baibara: te itabarara n te aonnaba—Ruka 21:10; Te Kaotioti 6:4.
Ribooti aika a tibwa taekinaki: “E birirake tenua te tai mwaitiia aomata ake a mate n te buaka i nanon te ka-20 n tienture, ni kabotauaki ma ake a mate ni buaka ake a riki mangke e bungiaki Kristo ni karokoa 1900.”—Worldwatch Institute.
Te bwai ae e a kaman taekinna te Baibara: taren te amwarake ao aoraki aika kamamate—Ruka 21:11; Te Kaotioti 6:5–8.
Ribooti aika a tibwa taekinaki: N 2004 ao e a katautauaki bwa 863 te mirion mwaitiia aomata aika aki tau kanaia, are e a raka iai te mwaiti are n 2003 n 7 te mirion.—United Nations Food and Agriculture Organization.
Tao e nakon teuana te birion mwaitiia aomata aika a maiu ni kainnano; 2.6 te birion mwaitiia ake a maeka ma te mweebuaka ibukin aki anaakin aia maange ao 1.1 te birion mwaitiia ake a maeka ma te ran ae e aki itiaki.—Worldwatch Institute.
A ituaki aomata aika 500 te mirion mwaitiia n te Malaria; 40 te mirion mwaitiia ake a reke irouia te man-aoraki ae te HIV-AIDS; ao a mate aika 1.6 te mirion mwaitiia man te aoraki ae te kangenge n 2005.—World Health Organization.
Te bwai ae e a kaman taekinna te Baibara: uruan te aonnaba—Te Kaotioti 11:18.
Ribooti aika a tibwa taekinaki: “A a ruanikai maiuia aekani maan ao aroka aika mwaiti man aia mwakuri aomata, n te aro are a aikoa kona ni manga riki.” “E noraki bwa e kaania uoua katenimwakoron bwain te aonnaba aei aika kateimatoaa te maiu ao a moanna ni kekerikaki mwakuria ni kabutaa te aonnaba.”—Millennium Ecosystem Assessment.
“Taiani kaeti ake a karika kabuebuen te aonnaba a karika bibitakini kanoan te bong n te aonnaba aei n te aro are a karekei kangaanga aika kona ni karuanikaia te buraneti aei.”—NASA, Goddard Institute for Space Studies.
Te bwai are e a kaman taekinna te Baibara: e na tataekinaki euangkerion uean te Atua i aonnaba ni bane—Mataio 24:14; Te Kaotioti 14:6, 7.
Ribooti aika a tibwa taekinaki: N 2007 ao 6,957,854 mwaitiia Ana Tia Kakoaua Iehova ake a kabanea te aoa ae 1.4 te birion n tataekina te rongorongo ae raoiroi ibukin Ana Tautaeka n Uea te Atua n aaba aika 236 mwaitiia.—2008 Yearbook of Jehovah’s Witnesses.
N aron ae e a tia ni kaotaki ao e a kaman taekinna te Baibara bwa bon iai bukina ae ti riai ni kaantaningaa te bwai ae raoiroi n aki ongei rongorongo aika bubuaka. E tataekina naba “euangkerion” Ana Tautaeka n Uea te Atua Iesu. Tera Ana Tautaeka n Uea te Atua? E kanga n irekereke ma aia kaantaninga aomata ibukin taai aika raraoi riki aika a na roko? Ao tera aron rotakim n Ana Tautaeka n Uea te Atua?
[Kabwarabwaraan n iteraniba 5]
E a kaman taekinaki n te Baibara baika ti nori aika riki ni boong aikai n te aonnaba aei