REIREI 27
Ti na Kangaa ni Kamaiuaki ni Maten Iesu?
Ibukina bwa a aki ongeaba moan aomata ake Atam ma Ewa iroun te Atua, ti a rotaki n te bure, te rawawata, ao te mate.a Ma tiaki n ae ai akea ara kantaninga. E a tia Iehova ni katauraoa te anga ae ti na kamaiuaki iai man te bure ao te mate, rinanon Natina ae Iesu Kristo. E angareirei te Baibara bwa ni maten Iesu, e a katauraoa iai te kaboomwi. Te kaboomwi bon te boo ae kabwakaaki ibukini kainaomataan temanna. Ma te boo are e kabwakaa Iesu boni maiuna ae kororaoi. (Wareka Mataio 20:28.) E kona Iesu ni maiu n aki toki n te aonnaba, ma e kukurei ni mate ibukira bwa ti aonga ni karekei baike a kabuai Atam ao Ewa. E oti naba iroun Iesu korakoran tangirara irouna ao iroun Iehova. Ko na buokaki n te reirei aei ni karikirakea riki am kakaitau ni maten Iesu.
1. Ti na kangaa ni kakabwaiaaki ngkai ni maten Iesu?
Ibukina bwa taani bure ngaira, a bati baika ti kakaraoi aika e aki kukurei iai Iehova. Ma ngkana ti raraoma raoi ni koaua ibukin ara bure ao ni butiia Iehova rinanon Iesu Kristo kabwaraan ara bure, ao ngkana ti kabanea ara konaa n aki manga kakaraoi, ti na kona ni karekea te iraorao ae kaan ma te Atua. (1 Ioane 2:1) E taku te Baibara: “E mate Kristo tii te taina ibukini buure ma e manena n aki toki, ae te aomata ae raoiroi ae mate ibukia aomata aika buakaka, bwa e aonga ni kairingkami nakon te Atua.”—1 Betero 3:18.
2. Ti na kangaa ni kakabwaiaaki n taai aika imwaira mani maten Iesu?
E kanakoaki Iesu iroun Iehova bwa e na anga maiuna n aomata ae kororaoi “bwa e aonga n aki kamaunaaki ane e onimakinna, ma e na reke irouna te maiu are aki toki.” (Ioane 3:16) Ti kakaitau n te baere e karaoia Iesu, bwa e nang waekoa Iehova ni kaitiaka mwin ana aki ongeaba Atam. Nanon aei bwa ngkana ti onimakina ana karea Iesu, ti na kona ni karekea te maiu ae aki toki n te aonnaba ae bwaretaiti!—Itaia 65:21-23.
REIAKINA AE BATI RIKI
Reiakina ae bati riki bwa e aera ngkai e anga maiuna Iesu, ao noria bwa ko na kangaa ni kakabwaiaaki iai.
3. E kainaomataira maten Iesu man te bure ao te mate
Kaota te TAAMNEI, ao maroroakina te titiraki aei.
Tera are e kabuaa Atam ngke e aki ongeaba iroun te Atua?
Wareka I-Rom 5:12, ao maroroakina te titiraki aei:
Tera aron rotakini maium n ana bure Atam?
Wareka Ioane 3:16, ao maroroakina te titiraki aei:
E aera ngke e kanakoa Natina Iehova nakon te aonnaba?
Bon te mwaane ae kororaoi Atam, are e aki ongeaba iroun te Atua ao ni kairiia aomata nakon te kawai ae tiki nakon te bure ao te mate
Bon te mwaane ae kororaoi Iesu are e ongeaba iroun te Atua ao e kairiia aomata nakon te kawai ae tiki nakon te kororaoi ao te maiu n aki toki
4. A kona ni kakabwaiaaki aomata ni kabane mani maten Iesu
Kaota te TAAMNEI, ao maroroakina te titiraki aei.
A kangaa ni kakabwaiaaki aomata ni kabane ni maten te mwaane ae tii temanna?
Wareka 1 Timoteo 2:5, 6, ao maroroakina te titiraki aei:
Bon te mwaane ae kororaoi Atam ma ibukina bwa e bure, a a ituaki aomata n te bure ao te mate. Bon te mwaane naba ae kororaoi Iesu. N te aro raa ae katauraoa iai “te kaboomwi” ae boraoi raoi?
5. Te kaboomwi bon ana bwaintangira Iehova nakoim
A iangoa te kaboomwi raoraon Iehova bwa te bwaintangira nakoia. N te katoto, wareka I-Karatia 2:20, ao maroroakina te titiraki aei:
E kangaa ni kaotia te abotoro Bauro bwa e iangoa te kaboomwi bwa te bwaintangira nakoina?
Ngke e bure Atam, e a rotaki ma kanoana ni kabane n te mate. Ma e kanakomaia Natina Iehova bwa e na mate bwa ko aonga ni karekea te maiu n aki toki.
Ngkana ko wareki kiibu aikai, iangoa ana namakin Iehova ngke e karawawataaki Natina. Wareka Ioane 19:1-7, 16-18, ao maroroakina te titiraki aei:
Tera am iango n te baere a karaoia ibukim Iehova ao Iesu?
E KONA NI KANGAI TEMANNA: “E na kangaa ni mate te mwaane ae tii temanna ibukia aomata ni kabane?”
Ko na kangaa ni kaeka?
KAKIMOTOTOANA
Ni maten Iesu, e a kona iai Iehova ni kabwarai ara bure, ao ni karekea nakoira te maiu n aki toki.
Kauring
Bukin tera ngke e mate Iesu?
N te aro raa ae riki iai maiun Iesu ae kororaoi bwa te kaboomwi ae boraoi raoi?
Ko na kangaa ni kakabwaiaaki mani maten Iesu?
NORI NABA AIKAI
Nora te bae ti riai ni karaoia bwa ti aonga ni kamaiuaki.
“E Kamaiua te Aba Iesu—N te Aro Raa?” (Te kaongora n jw.org)
E kona naba Iehova ni kabwarai buure aika kakaiaki?
“Titiraki Aika Kaekaaki Man te Baibara” (Te Taua-n-Tantani, Mei 1, 2013)
Nora aron reiakinan ana angakarea Kristo ni buoka te mwaane temanna ae rotakibuaka n ururingan taai aika karawawata.
“I Nanomwaaka n Uringan te Tangira Are E Moan Reke Irou” (Te Taua-n-Tantani, Mei 15, 2015)
a Te bure bon tiaki tii te mwakuri ae buakaka. E kaineti naba te bure ma aroarora aika bubuaka aika riki man rikiara ae te bure.