Tera te Taromauri?

E kona ni kabwarabwaraaki te taromauri bwa “te mwakuri ae kaota iai te aomata karinean ao tangiran atuana.” Te moan taetae are kabonganaaki n te Baibara ae rairaki bwa “taromauri” e kona n nanona te aomata ae rangi ni karinerine ke e aantaeka nakoia aomata. (Mat. 28:9) A kona taeka akanne ni kabwarabwaraa naba te mwakuri n nebonebo nakon te Atua ke te atua temanna. (Ioa. 4:​23, 24) E oti n tein te rongorongo bwa tera raoi ae nanonaki n te taeka anne.

Bon tii Iehova ae te tia Karikiriki ao te tia Tautaeka i aoni Bwaai ni Kabane, ae tau n taromauriaki n tii ngaia. (TeKao. 4:​10, 11) Ti taromauria Iehova n arora ni kaota karineani mwaakana n tautaeka ao arana. (TaiAre. 86:9; Mat. 6:​9, 10) Booto n iango aika uoua aikai, aika mwaakan Iehova n tautaeka ao arana, a okioki n te boki ae Etekiera. E kabonganaaki te taeka ae “te Uea ae Moan te Rietata ae Iehova” 217 te tai n te boki ae tii Etekiera, ao 55 te tai kabonganaan ae “kam na ataia bwa bon Iehova ngai.”​—Etek. 2:4; 6:7.

Ngaia are ara taromauri tiaki tii te namakin, ma bon te taromauri ae koaua ae irianaki n te mwakuri. (Iak. 2:26) Ni katabuani maiura nakon Iehova, ti a taetae ni bau iai bwa ti na ongeaba irouna n iterani maiura nako, ngkai ngaia ara Uea ae Moan te Rietata, ao n rangi ni karinea ibukin arana. Uringnga are ngke e kaekaa katenuani kataakina Iesu, ao e kairekerekea te taromauri ma te “toro” iroun te Atua. (Mat. 4:10) Ngkai taan taromauria Iehova ngaira, ti a ingainga n toro irouna.a (TuaKau. 10:12) Ti toro iroun Atuara ngkana ti uataboi mwakuri aika irekereke ma ara taromauri, ao ae ko riai iai n anga boni ngkoe. Baikara mwakuri akanne?

Te toro iroun te Atua e nanoni aanga aika bati, aika bane n rangi ni kakawaki i matan Iehova. Ti toro iroun te Atua ngkana ti uarongorongo, ti kaeka n tain te taromauri, ao ngkana ti tararuai ao ni katei ara tabo n taromauri. Ti toro naba irouna ngkana ti anga ara ibuobuoki n te taromauri n utu, ngkana ti buokiia taari ake a kainnanoa buokaia, ngkana ti anganano n taiani bwabwaro, ke ngkana ti beku n te Betaera. (Ebera 13:16; Iak. 1:27) Ngkana e moanibwai n ara iango ao i nanora te taromauri ae itiaki, ti na ‘beku iroun te Atua ni ngaina ao ni bong.’ Ai kimwareireira ngaira n taromauria Atuara ae Iehova!​—TeKao. 7:15.