A Karekea Te Kukurei Man Te Beku Kristian

“E kakabaia riki te anga nakon te anganaki.”​—MWAKURI 20:35.

1. Tera te kaantaninga ae kairua ae taabangaki ni boong aikai, ao bukin tera ngkai e karuanikai?

NI KABANEAN ririkin te ka 20 n tienture, e bati n ongongo te aba te kibu n taeka ae “ngai moa.” Taeka aika “ngai moa,” a kaota te iango ae a botaki iai te nano n tabeakiniko moa, te mataai ni kanibwaibwai, ao aki-tabeakinaia aomata tabemwaang. Ti aki nanououa bwa n te ririki ae 2001, e bon tuai ni mauna bwainan te iango ae ngai moa irouia aomata. Mwaitira am tai n ongo te titiraki n aron aikai, “Tera kabwaiau mai iai,” ke “Tera kaniwangau mai iai?” Te nano ni kan tabeakiniko moa aei e bon aki karika te kukurei. E kaitara raoi ma te reirei are e taekinaki iroun Iesu are kangai: “E kakabaia riki te anga nakon te anganaki.”​—Mwakuri 20:35.

2. E a kanga n noraki bwa te anganga e karika te kukurei?

² Te koaua bwa e kabwaia riki te anga nakon te anganaki? Eng. Iangoa taekan Iehova ae te Atua. Bon iai irouna “koburaken te maiu.” (Taian Areru 36:9, Baibara ni Katorika) E katauraoi bwaai ni kabane aika ti kainnanoi ibukin karekean te maiu ae kakukurei mani uaana. Te koaua bwa boni ngaia nibwan “angabwai aika raraoi ma bwaai n tituaraoi aika moan raraoi.” (Iakobo 1:17) Iehova, ae “te Atua ae e kukurei,” e aki toki n anganga bwaai. (1 Timoteo 1:11, NW) E bon tangiriia aomata ake e karikiia, ake e angangania bwaai aika bati. (Ioane 3:16) Iangoa naba aron aia utu aomata. Ngkana te karo ngkoe, ko bon ataa korakoran te mwakuri ae kainnanoaki ibukin kaikawaan te ataei, ao mwaitin bwaai ake ko riai n anga iai, n ikotaki ma arom n anga am konaa ibukin te tei. Inanon ririki aika a mwaiti ni moan ririkin maiun te tei, ao e bon aki ataa moa aron korakoran am mwakuri ake ko karaoi ibukina. E a bon tii kabonganai naba bwaai aikai n akea ana iango iai! Ma e ngae n anne, ko na boni kukurei n nora maiun natim bwa e nakoraoi ibukin am mwakuri n tangira ake ko karaoi nakoina. Bukin tera? Ibukina bwa ko tangiria.

3. Bukin tera ngkai moan te kakukurei te beku ibukin Iehova ao raora n onimaki?

³ N aron naba anne, te taromauri ni koaua e reitaki naba ma te anga ae boto i aon te tangira. Kioina ngkai ti tangira Iehova ao raora n onimaki, ti kukurei ni beku ibukia, ma n anga korakorara naba ibukia. (Mataio 22:37-39) Aomata ake a taromauri i aan te kaantaninga ae a na tii karekea oin kakabwaiaia iai, a bon aki kona n rangi ni kimwareirei iai. Ma aomata ake a beku ma nanoia ni kan anga, ao a mutiakina riki te anganga nakon te anganaki, a kunea te kukurei ni koaua. E teretere te koaua aei ngkana ti iangoi taeka tabeua man te Baibara, aika iai irekerekeia ma ara taromauri ao aron kabonganan taeka aikai n te Baibara. Ti na maroroakin tenua mai buakon taeka aikai n te kaongora aei, ao are imwina.

Ana Beku Iesu Ibukia Aomata

4. Tera aron te “beku ibukia aomata” ae e waakinaki i Krititentom?

⁴ N te taetae n Erene, te taeka teuana ae kakawaki ae reitaki ma te taromauri, bon te taeka ae lei·tour·giʹa, ae e rairaki n te Baibara ae te New World Translation, bwa “te beku ibukia aomata.” I Krititentom, te taeka ae lei·tour·giʹa, e karika te taeka teuana n te taetae n Ingriti ae “liturgy.”a Ma waaki n taromauri ake a mwaiti katei iai ake a kakaraoaki i Krititentom, bon tiaki te beku ibukia aomata ae e na karekei kakabwaia ni koaua.

5, 6. (a) Tera te beku ibukia aomata ae karaoaki i Iteraera rimoa, ao baikara kakabwaia ake a reke mai iai? (b) Tera te beku ibukia aomata ae rangi ni kakannato riki, ae e onea mwin are e karaoaki i Iteraera rimoa, ao bukin tera?

⁵ Te abotoro Bauro e kabongana te taeka n Erene teuana ae reitaki ma lei·tour·giʹa ni kaineti ma ibonga ake i Iteraera. E kangai: “a bane ibonga n tei n te bong ae koraki ni karaoi nakoaia [ae aron rairan te taeka ae lei·tour·giʹa teuana] ma n okioki n anga karea aika ai uaia nako naba.” (Ebera 10:11) Ibonga aika tibun Rewi a karaoa te mwakuri ibukia I-Iteraera ae moan te kakawaki. A anga reirei i aon ana Tua te Atua, ao a anga karea ibukin aia bure aomata. (2 Rongorongo 15:3; Maraki 2:7) Ngke arona bwa a kakaonimaki ibonga ao aomata nakon ana Tua Iehova, a na boni karikiia bwa te botannaomata ae kimwareirei.​—Te Tua-Kaua 16:15.

⁶ Te beku ibukia aomata ae e katauaki i aan te Tua, bon te nakoa ae rine ibukia ibongan Iteraera, ma e toki manenan aia beku anne ngke e a kakeaaki Iteraera ibukina bwa a aki kakaonimaki. (Mataio 21:43) Iehova e bairea te bwai ae kakannato riki nakon anne​—ae te beku ibukia aomata ae e karaoaki iroun Iesu, ae te Mataniwi n Ibonga ae Rietata. Ti wareka taekana ae kangai: “Ao Teuaei, ngkae e aki toki maiuna, ao e aki nako mai Rouna nakoana n ibonga. Ma ngaia ae E kona ni kakororaoa kamaiuaia akana nakon te Atua i Rouna, ngkae E aki toki ni maiu ba E aonga ni bubuti i bukiia.”​—Ebera 7:24, 25.

7. Bukin tera ngkai ana beku Iesu ibukia aomata e karekei kakabwaia aika akea kabotauaia?

⁷ E reita nako ana mwakuri n ibonga Iesu n aki toki, n akea ae e na oneamwina. Mangaia are bon tii ngaia ae e kona ni kamaiuia aomata n te aro ae tabwanin raoi. E karaoa te beku ibukia aomata ae akea n ai arona aei, n te tembora are e aki karaoaki irouia aomata, ma te tembora aei ni kaikonaki, ae nanona ana babaire ae kakannato Iehova ibukin te taromauri, ae moanaki waakinana n 29 C.E. Ngkai Iesu e beku n te Ru ae Moan te Tabu n te tembora anne, are karawa. Teuaei bon “te tia makuri [lei·tour·gosʹ] n te tabo are tabu, ao n te uma ni koaua, are E kateia te Uea, ao e aki kateia te aomata.” (Ebera 8:2; 9:11, 12) E ngae ngkai moan te rietata nakoan Iesu, ma e bon teimatoa naba n riki bwa “te tia mwakuri” ibukia aomata. E kabongana mwaakan nakoana ae rietata bwa e na anganga bwaai, ao tiaki ibukin anaakin bwaai. Ao arona n anganga e karika te kimwareirei nakoina. Bon kanoan naba “te kimareirei are kamenaki i mwaina,” ae e kakorakoraa bwa e na nanomwaaka inanoni maiuna i aon te aonnaba.​—Ebera 12:2.

8. E kanga Iesu ni karaoa te beku ibukia aomata ae e onea mwin te berita n Tua iai?

⁸ Bon iai riki teuana iteran ana beku Iesu ibukia aomata. E koreia ni kangai Bauro: “Ao e a reke i Rouna ngkai te nakoa ae raoiroi riki; ngkai bon te Tia Raoi Ngaia n te berita ae raoiroi riki, ae kateaki matoa i aon taeka n akoi aika raoiroi riki.”(Ebera 8:6) Mote, bon te tia raoi n te berita ae e aanaki n aia iraorao Iteraera ma Iehova. (Te Otinako 19:4, 5) Iesu bon te tia raoi n te berita nabangkai, are e a kona iai ni bungiaki te botannaomata ae boou, ae “ana Iteraera te Atua,” ae kaainaki irouia Kristian ake a kabiraki ake a rineaki mairouia botannaomata aika kakaokoro. (I-Karatia 6:​16; Ebera 8:​8, 13; Te Kaotioti 5:9, 10) Ai raoiroira te beku ibukia aomata anne! Ai kukureira ngaira ngkai ti a reitaki ma Iesu, ae te tia beku ibukia aomata ae ti kona n rinanona n angan Iehova te taromauri ae boraoi ma nanona!​—Ioane 14:6.

Kristian Naba A Beku Ibukia Aomata

9, 10. Baikara aaro ni beku ibukia aomata tabeua ae a karaoia Kristian?

⁹ Akea te aomata ae e kona ni karaoa te beku ibukia aomata ae ai aron are e karaoia Iesu. Ma ngkana a anganaki kaniwangaia Kristian aika kabiraki i karawa, a na mena irarikin Iesu bwa taian uea ao ibonga, ma ni buokanibwai naba n ana beku ibukia aomata. (Te Kaotioti 20:6; 22:1-5) Ma Kristian ake a mena i aon te aonnaba a karaoa naba te beku ibukia aomata, ao a rangi ni kimwareirei iai. N te katoto teuana, ngke iai ngkoa te rongo i Baretain, te abotoro Bauro e uoti bwaintangira mairouia taari ake i Eurobe ibukin buokan rawawataia Kristian aika I-Iutaia ake a mena i Iuta. Bon te beku ibukia aomata anne. (I-Rom 15:27; 2 I-Korinto 9:12) Ni boong aikai, a kukurei naba Kristian ni beku n aron anne, n te aro ae a waekoa ni buokiia tariia ake a rootaki ni kangaanga tabeua, kabuanibwai aika a riki n te aonnaba, ao kabuanibwai riki tabeua.​—Taeka N Rabakau 14:21.

¹⁰ E taekina te beku ibukia aomata teuana riki Bauro ngke e korea ae kangai: “Ao ngkana e nurakinaki maiuu i aoni karean ami onimaki ma makuriana, ao I kakatonga, ao I kakatonga naba ma ngkami ni kabaneingkami.” (I-Biribi 2:17) Ana mwakuri korakora Bauro ibukia kaaini Biribi bon te beku ibukia aomata ae e karaoia ma te tangira ao te taningamarau. Te beku ibukia aomata n ai aron anne e tabe ni karaoaki ni boong aikai, ao e a moamoa riki irouia Kristian ake a kabiraki, ake a beku n ai aron “te toro ae kakaonimaki ae wanawana,” ae e kakatauraoi amwarake n taamnei n te tai ae riai. (Mataio 24:45-47) Irarikin anne, te koraki aei bon te “te koraki n ibonga ae raoiroi,” ake a mwiokoaki bwa a na “anga karea aika bwain te tamnei aika tangiraki iroun te Atua iroun Iesu Kristo,” ao ibukin ‘kaotan raoiroin nako Teuare weteia man te ro nakon ana oota ae kamimi.’ (1 Betero 2:5, 9) N ai aron Bauro, a kukurei ni kakabwaia aikai e ngae ngkai a ‘nurakina boni ngaiia’ ngkana a kakoroa bukin mwiokoaia. Ao raoraoia ake “tiibu tabemang” a airi ma ngaiia ma ni buokiia n aia mwakuri ni kaotiota taekan Iehova ao ana kaantaninga nakoia aomata.b (Ioane 10:16; Mataio 24:14) Ai raoiroira ma ni kakukureira te beku ae ibukia aomata aei!​—Taian Areru 107:21, 22.

Bebeku Ibukin te Atua

11. E kanga te burabeti ae Nei Ana ni karaoa te katoto ae raoiroi ibukia Kristian ni kabaneia?

¹¹ Te taeka n Erene teuana ae reitaki ma ara taromauri bon la·treiʹa, ae rairaki bwa “te beku ibukin te Atua” n te Baibara ae te New World Translation. Te beku ibukin te Atua e taekin mwakuri aika a reitaki ma te taromauri. N te katoto teuana, te aine ae te burabeti, ae e a tia ni mate buna ao 84 ana ririki ni maiu ae arana Nei Ana, e taekinaki bwa “e aki nanako mani maneaban te Atua, ma e taromauri [ae te taeka ae reitaki ma te taeka n Erene ae la·treiʹa] n aki mamatam ma n taatataro ni bong ao ni ngaina.” (Ruka 2:36, 37) E kakaonimaki Nei Ana n taromauria Iehova. Bon te banna ni katoto ae raoiroi neiei nakoira ni kabane​—ngkana ataei ngaira ke ikawai, mwaane ke aine. N aron Nei Ana are e tatataro ma nanona ni koaua nakon Iehova ao e kakaonimaki n taromauriia n te tembora, ara beku ibukin Iehova ngkai e nanona naba te tatataro ao kaean taiani botaki.​—I-Rom 12:12; Ebera 10:24,25.

12. Tera te mwakuri teuana ae moan te kakawaki ae reitaki ma ara beku ibukin te Atua, ao bukin tera bwa te mwakuri aei bon te beku naba ibukia aomata?

¹² Te abotoro Bauro e taekina te bwai ae kakawaki ae kanoan ara beku ibukin te Atua ngke e korea ae kangai: “Ba bon te tia kaotioti i bukiu te Atua, ae I toro i Rouna n tamneiu n euangkerion Natina, ba I aki toki n atoatongngkami, n aki toki ni butiia n au tataro.” (I-Rom 1:9) Eng, tataekinan te rongorongo ae raoiroi bon tiaki tii te beku ibukia aomata ake a ongora taekinana, ma bon te mwakuri ae reitaki ma taromaurian Iehova ae te Atua. Ngkana ti kuneia aomata aika a kan ongora ke ngkana ti aki, ma te mwakuri n tataekina te rongorongo bon te beku ibukin Iehova. Ara kekeiaki ni kaongoia aomata tabemwaang taekan aroaron Tamara are i karawa ae tatangiri baika raraoi, ao ana kaantaninga ibukin buokaia aomata, e karika te kimwareirei ae bati iroura.​—Taian Areru 71:23.

Iia te Tabo ae Ti Beku Ibukin te Atua Iai?

13. Tera aia kaantaninga aomata ake a beku ibukin te Atua ni bwarantan ana tembora n taamnei Iehova are i nano, ao antai aika a uaia ni kimwareirei ma ngaiia?

¹³ Bauro e korea ae kangai nakoia Kristian aika kabiraki: “Ma ngaia aei, ngkae e a reke i roura ueara ae aki konaki ni kamwaeieiaki, ao ti na taua akoara ae ti kona iai n toro iroun te Atua ni kakukureia ni karinea ma ni makua.” (Ebera 12:28) Kioina ngkai a aki nanououa n aia kaantaninga ibukin te ababa n te Tautaeka n Uea, e aki kona ni mwainging aia onimaki taani kabiraki ngkai a taromauria Teuare Moan te Rietata. Bon tii ngaiia ake a kona ni beku irouna n te Ruu ae Tabu ao n te bwaranta are inano n ana tembora n taamnei Iehova, ao a ingainga nanoia ni kani beku ma Iesu n te Ruu ae Moan te Tabu are boni karawa. Raoraoia aika tiibu tabemwaang a kimwareirei ma ngaiia n aia kaantaninga taani kabiraki ae moanibaan te raoiroi aei.​—Ebera 6:19, 20; 10:19-22.

14. A kanga ni kakabwaiaki te koraki ae uanao man ana beku Iesu ibukia aomata?

¹⁴ Ma tera aroia tiibu tabemwaang? N aron are e noria te abotoro Ioane, a kaoti ngkai bwa te koraki ae uanao inanon boong aika kaitira aikai, ao “a teboki niniraia, ao a kamainainai n raraan te Tiibutetei.” (Te Kaotioti 7:14) E nanonaki n aei bwa titeboo aroia ma raoraoia n taromauri aika taani kabiraki, n onimakina naba ana mwakuri Iesu ibukia aomata, ae ana karea are e anga ibukia aomata nako ae maiuna n aomata ae kororaoi. A kakabwaiaki naba tiibu tabemwaang man ana beku Iesu ibukia aomata n te aro ae a “tautaua bukin [ana] berita [Iehova].” (Itaia 56:6) Te koaua bwa tiaki kaain te berita nabangkai ngaiia, ma a tautaua n te aro are a ongeaba n taian tua ake a reitaki ma ngaia, ao a buokanibwai ma babaire ake a karaoaki rinanona. A iraorao ma ana Iteraera te Atua, ao a amwarake ma ngaiia n te taibora n taamnei ae tii teuana, ao a uaia ni mwakuri ma ngaiia ni karaoiroa te Atua imataia aomata ma n anga karea aika bwaai n taamnei ake a tangiraki irouna.​—Ebera 13:15.

15. E ngaa te tabo are a beku iai te koraki ae uanao ibukin te Atua, ao tera aron rotakiia n te kakabwaia anne?

¹⁵ Mangaia are a noraki te koraki ae uanao n “tei i nanoaan te kaintokanuea, ao i matan te Tiibutetei, ao a kunnikaiia n ninira aika mainaina.” Riki, “a memena i nanoaan ana kaintokanuea te Atua; ao a toro i Rouna ni ngaina ao ni bong ni maneabana: ao teuae tekateka i aon te kaintokanuea E na taakina umwana i aoia.” (Te Kaotioti 7:9, 15) I Iteraera rimoa, aomata ake a rairaki nakon te Aro n Iutaia a taromauri n te bwaranta ae itinanikun ana tembora Toromon. N aron anne, taan taromauria Iehova aika kaain te koraki ae uanao a mena ni bwarantan te tembora n taamnei are i tinaniku. A kimwareirei ni bebeku iai. (Taian Areru 122:1) A na teimatoa naba n riki bwa ana aomata Iehova ma ni bebeku irouna, ngkana a a tia n nako n ababa i karawa raoraoia aika taani kabiraki n tatabemania nako.​—Te Kaotioti 21:3.

Te Beku Ibukin te Atua ae Aki Butimwaeaki

16. Baikara reirei ake a taekinaki ni kaineti ma te beku ibukin te Atua?

¹⁶ N aia bong Iteraera rimoa, e riai ni karaoaki te beku ibukin te Atua n te aro ae boraoi ma ana tua Iehova. (Te Otinako 30:9; Nakoaia Ibonga 10:1, 2) N aron naba anne ni boong aikai, bon iai kaetieti ake a riai n iraki nanoia ngkana e na butimwaeaki ara beku iroun Iehova. Ngaia anne bukina are e kororeta iai Bauro nakoia kaaini Korote: “Ma ngaia ae ti aki toki naba n tataro i bukimi, . . . ao ti aki toki ni butiia te Atua ba kam na kaonaki n atakin nanona n te rabakau n tamnei ma te ataibwai ni kabanea, ba kam aonga n nakonako n te aro ae tau ma nanon te Uea ae e na karika te kukurei i Rouna ni bwaai ni kabane, ao kam aonga n uaa ni makuri nako aika raraoi, ao kam aonga n riki rake n atakin te Atua.” (I-Korote 1:9, 10) Bon tiaki tabera bairean ae tera ae e riai ni kaineti ma taromaurian te Atua. Te atatai ae eti man te Baibara, te atatai i aon bwaai n taamnei, ao te rabakau mairoun te Atua, boni bwaai aika moan te kakawaki. Ngkana akea bwaai aikai, ao e bati te kabuanibwai ae e na kona n riki.

17. (a) E a kanga ni kabuakakaki te beku ibukin te Atua n ana bong Mote? (b) E na kanga n aki nakoraoi aron waakinan te beku ibukin te Atua ni boong aikai?

¹⁷ Uringa taekaia I-Iteraera ake a maiu n ana bong Mote. Ti wareka ae kangai: “Ao E rairaki te Atua, ao E kanakoia ba a na taromauri itoini karawa.” (Mwakuri 7:42) I-Iteraera aikai a a tia n nora ana mwakuri aika kamimi Iehova ake e karaoi ibukin buokaia. Ma e ngae n anne, a bon rairaki naba nakoia atua tabeman ngkai a kaantaningaia bwa e na angaraoi riki ibukia. A bon aki kakaonimaki, ao te kakaonimaki bon te aroaro ae riai ngkana arona bwa e na kukurei te Atua n ara beku ae ti karaoia ibukina. (Taian Areru 18:25) Te koaua bwa bon tii tabeman n taai aikai aika a rairaki man taromaurian Iehova nakon taromaurian taian itoi ke kao aika koora. Ma iai riki aeka n taromauriani bouannanti aika kakaokoro. Iesu e reireinia aomata bwa a na aki beku ibukin ‘te Kaubwai,’ ao Bauro e arana te mataai ni kanibwaibwai bwa karean taiani boua. (Mataio 6:24; I-Korote 3:5) Tatan e boni kabirirakea ibon irouna n taku bwa te atua naba temanna ngaia. (2 I-Korinto 4:4) A taabangaki aekan taromauriani bouannanti aikai, ao a mwaiti aika a mwane iai. Iangoa taekan te aomata ae e taku bwa e kakairi iroun Iesu, ma tiana ni koaua are e uaiakinna inanoni maiuna, bon kabatiaan kaubwaina, ke e bon tii onimakinna ibon irouna man onimakina naba oin ana iango. N etina, e beku ibukin antai te aeka n aomata anne? Iai kaokorona ma I-Iutaia ake a maiu n ana bong Itaia ake a taetae n tuea n aran Iehova ma a bukinia bouannanti aika kammaira bwa aongkoa boni ngaiia ake a karaoi ana mwakuri Iehova aika kamimi?​—Itaia 48:1, 5.

18. Baikara aaro tabeua aika a kairua ae a wawakinaki n te beku ibukin te Atua, n taai ake ngkoa, ao ni boong aikai?

¹⁸ E reirei naba ni kangai Iesu: “E na bon roko te bong are e na taku iai ane kamateingkami, ba e anga karea nakon te atua.” (Ioane 16:2) Tauro, are e a riki bwa te abotoro Bauro, e taku bwa e beku iroun te Atua ngke ‘e kataua maten Tetebano’ ao e “ikeike naba n taeka ni kakamaku ao n te kamamate nakoia ana reirei te Uea.” (Mwakuri 8:1; 9:1) Ni boong aikai, a mwaiti aomata aika a boutokoa kamateaia aomata ni kabaneia aika kaain baronga tabeua ake a ribaaki, ake a taku naba bwa a bon taromauria te Atua. Eng, bon iai aomata aika mwaiti aika a taku bwa a taromauria te Atua, ma n te koaua ni koaua aia taromauri e kaineti riki nakoia atua aika te nanonnaba, kamoamoan oin aia baronga, te kaubwai, tangiran oin nanoia, ke aeka n atua riki tabeua.

19. (a) Tera ara kaantaninga ibukin ara beku ibukin te Atua? (b) Te aeka ni beku raa iroun te Atua ae e na karika te kimwareirei nakoira?

¹⁹ E kangai Iesu: “Ko na taromauria Iehova ae Atuam, ao ko na toro i Rouna n ti Ngaia.” (Mataio 4:10) E bon taetae nakon Tatan, ma ai kakawakira ngkai bwa ti na bane ni mutiakina ana taeka aei! Te beku iroun te Uea ae Moan te Rietata n te iuniweeti bon te kakabwaia ae rine ma ni kakamaaku. Ao tera aron ara beku ibukia aomata ae e reitaki ma ara taromauri? Karaoan aei ibukia raora n aomata bon te mwakuri ae kakukurei ae karika te kimwareirei ae bati. (Taian Areru 41:1, 2; 59:16) Ma e ngae n anne, te beku aei e karekea te kukurei ni koaua, tii ngkana e karaoaki raoi mai nanon te aomata, ao ngkana e karaoaki n te aro ae riai. Antai raoi aika a taromauria te Atua n te aro ae riai? E kukurei Iehova ni butimwaea aia beku antai? Ti kona ni kaekai titiraki aikai ngkana ti iangoa te katenua n taeka man te Baibara ae kabonganaki n reitaki ma ara taromauri. Ti na karaoa aei n te kaongora ae imwin aei.

[Kabwarabwara ae nano]

Tera Am Kaeka?

• Tera te beku ibukia aomata ae kakannato are e karaoia Iesu?

• Tera te beku ibukia aomata ae a kakaraoia Kristian?

• Tera te beku ibukin te Atua ae a waakinna Kristian, ao a karaoia n te tabo raa?

• Tera ae ti riai ni karekea iroura ngkana e na butimwaeaki ara beku iroun te Atua?

[Taamnei n iteraniba 22]

A karekea te kukurei ae bati kaaro man te anganga

[Taamnei n iteraniba 25]

A beku ibukin te Atua Kristian ngkana a buokia aomata tabemwaang ao ngkana a tataekina te rongorongo ae raoiroi

[Taamnei n iteraniba 26]

Ti kainnanoa te atatai ae eti ao te ataibwai bwa ti aonga ni kakoaua raoi ae e butimwaeaki ara beku iroun te Atua