BUOKAN TE UTU
Aroni Kaotiotan te Tangira
Ni waakinakon te tai, ao e a moanna ni kekerikaaki kaotiotan te tangira irouia taanga aika a a tia ni mareaki. Ngkana aei te bwai ae e riki n tekatekam, ko riai n tabeaianga iai?
Te bwai ae ko riai n ataia
E kakawaki kaotiotan te tangira ngkana e na nakoraoi te tekateka n taanga. N aron te katoatai n amwarake ao ni moi bwa a kakawaki ibukin teimatoani korakoran ao marurungin te rabwata, e na nakoraoi ao ni korakora naba te tekateka n taanga ae teimatoa iai kaotiotan te tangira. E ngae ngke e a riaon tebwina te ririki tekatekaia taanga, ma a kainnanoa te katoatai buumwaane ao buuaine ni kaotia i marenaia ae a kaai n tangiriia ao n tabeakinia.
E aki bangaomata te tangira ni koaua. E uaiakina kakukureian are temanna. Te buu ae mwamwannano, e aki kaotiota tangirani buuna tii n te tai are e kani kaotia iai, ma e uaiakina karaoan nanon ana namakin buuna ni kaineti ma kaotan tangirana.
N angiin te tai, a kainnanoa riki buuaine kaotiotan te tangira nakoia. E boni bae n ae te buu te mwaane, e korakora tangirani buuna irouna. Ma ngkana e tii kaotiota anne n te moaningabong ao n te tairiki ke imwaini botakia n taanga, e na aki rangi n ataia raoi ngkanne te buu te aine bwa e tangiraki ni koaua irouni buuna, ke e aki. E raoiroi riki kaotiotan te tangira rinanon nako te bong teuana ma teuana.
Te bwai ae ko kona ni karaoia
Kaotiota am tangira n te taeka. Kibuntaeka aika uarereke n aron ae “I tangiriko” ke “Boni mamaten nanou ngkoe” e na kona ni kaira te buu bwa e na namakina iai nabeakinana.
Ana boto n reirei te Baibara: “E taetae te wi man onraken te nano.”—Mataio 12:34.
Te taeka n ibuobuoki: E aki tau tii kaotiotan am namakin n am taeka. Korei n te beeba ae uarereke, n am e-mail, ke ngkana ko text.
Kaota am tangira n te mwakuri. Te irabwati, te mbwa ke te taubai, a kaotia bwa ko nanona am taeka ngke ko kangai “I tangiriko.” Tabeakinan raoi buum e kona ni kaotaki n arom n ringnga, n taraia ma matam aika kaota tangirana, ke ni karekean am bwaintangira nakoina. Ao tera aroni mwakuri n ibuobuoki nakoni buum—tao n aron uotakini baeki, kaukan te mataroa ibukina, ireakini bwainnamwarake, te uaati, ke te kuuka? A mwaiti buuaine ake a iangoi baikai bwa tiaki tii mwakuri n ibuobuoki, ma boni mwakuri n tangira!
Ana boto n reirei te Baibara: “Ti aki riai n itangitangiri n tii te taeka ke n te wi, ma ti riai n itangitangiri n te mwakuri ao n te koaua.”—1 Ioane 3:18.
Te taeka n ibuobuoki: Kaotiota te mwamwannano nakoni buum n aron are ko karaoia ngke kam moani karekenano.
Karekea ami tai i bon ibukimi. Karekean ami tai tii ngkami uoman, e kakorakoraa nakoraoin tekatekami ao taekinna nakon buum bwa ko kukukurei ni menana i rarikim. E koaua bwa e na kangaanga karekean ami tai i bon ibukimi ngkana iai natimi, ke ngkana a bati baika kam na maroroakinna n te bong teuana ma teuana. Ma tao kam kona ni bairea te bwai ae bebete karaoana, n aron te kaai n nakonako ni kamarurung n tii ngkami uoman.
Ana boto n reirei te Baibara: “Koaua raoi bwa baikara bwaai aika kakawaki riki.”—I-Biribi 1:10.
Te taeka n ibuobuoki: Tabeman taanga aika a rangi n tatabetabe, a kakamwaawa te tairiki ke te wikeen teuana ibukin aia “kareketai” n tii taangaia.
Kinaa raoi buum. E kakaokoro kainnanon temanna ma temanna ni kaineti ma kaotiotan te tangira. Kaai ni maroroakinna bwa kam na kangaa ni kaotiota ami tangira i marenami ao e riai bwa e na kabatiaaki riki kaotiotana, ke e kangaa. Ao botumwaaka ni karaoa nanon te bwai are e kainnanoia temanna. Uringnga bwa e kakawaki kaotiotan te tangira ngkana e na nakoraoi tekatekami.
Ana boto n reirei te Baibara: “Te tangira . . . e aki ukera oini kabwaiana.”—1 I-Korinto 13:4, 5.
Te taeka n ibuobuoki: N oneani mwin are ko tatangiria bwa e na kaotiotaki te tangira nakoim, titirakiniko ni kangai: ‘Tera ae I kona ni karaoia ibukini buu bwa e aonga ni kai kaotiota riki tangirau?’