BUOKAN TE UTU
Arom ni Buoka Natim ni Karaoiroa Ana Bwi n te Reirei
E taraa n aki tabe ma te reirei natim, e aki kakaraoi ana bwai n reirei ao e aki naba kakamatebwai. Tera mwina? A a bwaka i nano ana bwi ao e rikirake ni buakaka anuani maiuna. Ko na kangaa ni buoka natim ni karaoiroa ana bwi n te reirei?
Te bwai ae ko riai n ataia
E a kabatiaa riki te kangaanga te kairoro. Ngkana ko kairoroa natim ao ane e na kona n riki bwa raraomana n te reirei ao n te mwenga! Ibukini kakerikaakan ana kangaanga anne, ao ane e nang bae ni kewe, e na karabai ana bwi aika bubuaka, e na kabongana am tiaaina ni koreia i aon ana ribooti, ke e nang aki rereirei. E a bati riki iai te kangaanga.
E kareketaati te kaniwanga. “Ibukini kaungaan nanon natira te aine, ti karerekea kaniwangana ngkana a raraoi ana bwi,” e taekina anne te karo ae arana Andrew, “ma anne are e a kairia bwa e na tii kabotoa ana iango i aon te kaniwanga. Ngkana e aki raoiroi ana bwi ao e rawawata riki iai nanona ibukina bwa e aikoa reke kaniwangana mairoura.”
E aki uaana ae ko na bukinia taan reirei. E na bae n iangoia ngkanne natim bwa e aki kainnanoaki te kakorakoraa ibukini karekean te bwi ae raoiroi. Tao e nang reke ana mwaan are e na bukinia iai tabemwaang ibukin ana kairua, ao ni kantaningaiia naba tabeman bwa a na kanakoraoi ana kangaanga. Ni koauana, e na aki reke iroun natim te rabakau teuana are e na kainnanoia ngkana e a ikawai—ae te rabakau n tei i aoni waena.
Te bwai ae ko kona ni karaoia
Taotaona nanom. Ngkana e maraki nanom ibukin ana bwi natim ao bita am tai ni maroro ma ngaia iai. “E nanakoraoi riki mwin te maroro ma natira ngkana ngai ma buu, ti bwaina te rau ao te nanoanga,” e taku te karo ae arana Brett.
Ana boto n reirei te Baibara: “A riai aomata nako ni waekoa n ongora, a na iremwe n taetae, ao a na iremwe n un.”—Iakobo 1:19.
Ataa oin te kangaanga. Aikai bukina tabeua ake a karika aki raoiroin te bwi: mwakuri ni kakani maiubuaka, bibitakin te reirei, raraomaeakinan tain te ukeuke, kangaanga n te utu, te aki mamatu raoi, akean te babaire ae raoiroi, ke te aki kona ni kakauongo raoi n tain te reirei. Tai motikia bwa e taningaroti natim.
Ana boto n reirei te Baibara: “Ane e kaota te ataibwai n te bwai teuana ao e na nakoraoi arona.”—Taeka N Rabakau 16:20.
Kaungaa tangiran te kan reirei. Karaoa te babaire teuana ibukin te bwai n reirei ao te kamatebwai. Karekea te tabo teuana ike e na kona iai natim ni karaoi ana bwai n reirei n akea mangaongaon ana iango (n aron te TV ao te tareboon). Tibwatibwai baike e na kamatebwai i aona ni kauarerekei, bwa e aonga ni buokaki natim bwa e na kaatuui ana iango iai. E taku Hector, te karo temanna mai Tiaman, “Ngkana iai ana ukeuke natira ae e na karaoia n te reirei ao ti katoabong n rinanon teutana imwin teutana baike e riai ni kakamatei, n oneani mwin are ti na tataningaa te kabanea ni miniti.”
Ana boto n reirei te Baibara: “Iai te tai ae baireaki ibukini bwaai nako.”—Te Minita 3:1.
Kaungaa te nano ni kan reirei. Ngkana e atai natim kakabwaia aika a na reke man te reirei ngkai, ane e na unga riki nanona ni kan reirei. N te katoto, e kona reiakinan te numera ni buokia bwa e na rabakau ni kabongana raoi ana mwane.
Ana boto n reirei te Baibara: “Karekea te wanawana ao karekea te ataibwai. . . . Iangoia bwa te bwai ae kakawaki.”—Taeka N Rabakau 4:5, 8.
Te taeka n ibuobuoki: Buoka natim n ana bwai n reirei ma tai karaoia ibukina. E taku Andrew, “E kantaningaira natira te aine bwa ti na kammaraka atura ni karaoa ana bwai n reirei, ao ngaia e na aoaoria.” Reireina natim aroni karaoan ana bwai n reirei i bon irouna.