AIA TITIRAKI ROORO N RIKIRAKE
E Kairua te Wene n Taanga i Marenan te Mwaane ma te Mwaane ao te Aine ma te Aine?
“N ikawairakeu ao teuana te bwai ae rangi ni kangaanga irou, bon arou n tataania raou ni mwaane. I taku i nanou bwa bon tii te namakin ae e na maunanako imwin tabeua te tai, ma a bon tuai n toki namakin akanne n taai aikai naba.”—David, 23.
Bon te Kristian David ae kani kakukureia nanon te Atua. E kona ni karaoa anne ao n teimatoa naba n taatania raona ni mwaane? Tera ana namakin te Atua ibukin te wene n taanga i marenan te mwaane ma te mwaane ao te aine ma te aine?
Tera ae e taekinna te Baibara?
E kakaokoro aia iango aomata n taabo ao n taai aika kakaokoro, ni kaineti ma te wene n taanga i marenan te mwaane ma te mwaane ao te aine ma te aine. Ma e aki tauaki aroia Kristian n iango aika a taabangaki ke “n uouotaki kaanga n naao ao ni katiotioaki n reirei aika ai aron taian ang.” (I-Ebeto 4:14) Ma a kabotoi aia iango ni kaineti ma te wene n taanga i marenan te mwaane ma te mwaane ao te aine ma te aine (ma aeka n aroaro riki tabeua n aron akanne) i aon ana kaetieti nako te Baibara.
E mataata ana kaetieti te Baibara ni kaineti ma te wene n taanga i marenan te mwaane ma te mwaane ao te aine ma te aine. E taku:
“Ko na tai wene n taanga ma te mwaane n aron ae ko wene n taanga ma te aine.”—Nakoaia Ibonga 18:22.
“E katikuia n aroia te Atua bwa a na karaoa ae kamwara n aron are e tangiria nanoia, . . . n aroia ni bwarua te wewene ni bure n te aro ae kammaira, bwa aia aine a onei aroia ni wene n taanga ae riai nakon te aro ae aki riai.”—I-Rom 1:24, 26.
“Tai burebureaki, bwa aomata aika taani wene ni bure, taan taromaurii bouannanti, taani wene ni kimoa, mwaane aika baka ni kan aine, mwaane aika wewene ni bure ma raoia ni mwaane, taan iraa, aomata aika nanonrang, taani kokoro ni manging, taani kabuakaka, ao taan aonikai ni kuribwai, a na aki karekea ana Tautaeka n Uea te Atua.”—1 I-Korinto 6:9, 10.
Ni koauana, a kaineti ana kaetieti te Atua aikai nakoia aomata ni kabane, n aki ongeia bwa iai nanoia ni kani wene n taanga ma raoia ni mwaane ke raoia n aine, ke ngkana bon iai nanoia ni kani wene n taanga ma temanna. A riai n rabakau ni kamatoai nanoia ngkana a roko iango ni kani karaoi mwakuri aika aki kakukureia te Atua.—I-Korote 3:5.
Nanona bwa . . . ?
Nanona bwa e kaungaa riribaakia aomata aika a tataaniia raoia ni mwaane ke n aine te Baibara?
Tiaki ngaia anne. E aki kaungaaki n te Baibara riribaakia aomata nako, aika—aomata aika a tataaniia raoia ni mwaane ke raoia n aine ke bon aomata nako. Ti tuangaki iai bwa “ti na ukoukora te raoi ma aomata nako,” n aki ongea aroaroni maiuia. (Ebera 12:14) Ai ngaia are e kairua bwa ti na bwainikirinia naake a tataaniia raoia ni mwaane ke n aine, ni karaoi mwakuri n riribai nakoia, ke ni karaoa ae aki riai nakoia.
Nanona bwa a riai Kristian ni kaaitarai tuua ake a kariaia mareakia mwaane ma mwaane ao aine ma aine?
E kaotia te Baibara bwa ana kaetieti te Atua ibukin te mare, e nanonaki raoi iai ieinin te mwaane ae tii temanna ma te aine ae tii temanna. (Mataio 19:4-6) Ma ngkana ti maroroakin aia tua aomata ibukini mareakia mwaane ma mwaane ao aine ma aine ao ti a kairekerekeira iai ma ana waaki te tautaeka, ae tiaki te bwai ae raoiroi karaoana. A tuangaki Kristian n te Baibara bwa a na tei i nuka ni kaineti ma ana waaki te tautaeka. (Ioane 18:36) Ai ngaia are, ti aki riai ni boutokai ke ni kaitarai ana tua nako te tautaeka ni kaineti ma aroaroia ke mareakia mwaane ma mwaane ao aine ma aine.
Ma tera aron . . . ?
Ma tera aron te aomata ae e wewene n taanga ma raona ni mwaane ke raona n aine? E kona ni bitaki te aomata anne?
Eng. Ni koauana, iai tabeman aika a karaoa anne n te moan tienture! Imwin taekinan are a na aki karekea Ana Tautaeka n Uea te Atua, te koraki ake a wewene ni bure ma raoia ni mwaane ke raoia n aine, ao e kangai te Baibara: “Bon akanne aroia tabeman i buakomi ngkoa.”—1 I-Korinto 6:11.
E nanonaki iai bwa e a toki tangiran aroaroia ake ngkoa, te koraki ake a aikoa wewene ni bure ma raoia ni mwaane ke n aine? E aki. E taku te Baibara: “Karina i aomi te aroaro ae boou, are e tabe ni kaboouaki rinanon te atatai ae eti.” (I-Korote 3:10) Karaoani bitaki bon te kakorakora ae reitinako.
Ma tera aron te aomata are e kani maiuakina ana kaetieti te Atua, ma e teimatoa n iai irouna namakinan te kani wene n taanga ma raona ni mwaane ke n aine?
N aron ae riiriki n namakin nako, ao e boni kona n rineia te aomata bwa e na aki kaatuui iangoaia ke ni karaoi. N te aro raa? E taku te Baibara: “Teimatoa n nakonako ni kairakimi n te taamnei, ao kam na aki ira iai nanoni kaibwabwarun te rabwata.”—I-Karatia 5:16.
Noria bwa e aki taekinna te kibu anne ae e na akea nanon te aomata ni kani kaibwabwaru. Ma ngkana e kataubobongaa te aine ke te mwaane ma ana kaetieti ae raoiroi n ukeuke n reirei n te Baibara i bon irouna ao n tataro, ao ane e na korakora iai nanona n totokoi iango ni kaibwabwaru akanne.
E kakoauaa anne David, are e mwaneweaki taekana ni moan te kaongora aei—e a moamoa riki imwin te tai are e kawariia iai ana karo aika Kristian ao ni kaota ana kangaanga nakoia. E taku: “I namakina iai kabebeteau ae bati, ma ngke arona bwa I a kamani kawariia ao N na bae n rangi ni kukurei n au tai n roro n rikirake.”
Ti na boni kukurei riki ngkana ti maiuakin ana kaetieti Iehova. Ti kakoauaa bwa “a raoiroi babaire ake mairoun Iehova bwa a kakimwareireia te nano” ao “iai te kaniwanga ae bubura ngkana a kawakinaki.”—Taian Areru 19:8, 11.