Tera te Rawawata ae Korakora?

Ana kaeka te Baibara

Te rawawata ae korakora bon te tai ae e na roko iai te kangaanga ae moan te korakora riki ae a tuai n rinanona aomata mai mwaina. N aron ae taetae ni burabetinaki n te Baibara, e na roko ni “kabaneani boong,” ke n “tain te toki.” (2 Timoteo 3:1; Taniera 12:4, New American Bible) Boni “bongin te rawawata ae tuai ni kaoti mangke e moani karikibwai te Atua ni karokoa te tai anne, ao e na aki manga kaoti rimwi.”—Mareko 13:19; Taniera 12:1; Mataio 24:21, 22.

Baika a na riki n tain te rawawata ae korakora

• Kamaunaakia Aaro aika kewe. A na boni kamaunaaki Aaro aika kewe n te tai ae waekoa ma ni kamimi. (Te Kaotioti 17:1, 5; 18:9, 10, 21) Naake a kairiri n te botaki ae Aia Botaki te Botannaomata ke te United Nations, a na boni kabongana mwaakaia ni kakororaoa nanon te Atua.—Te Kaotioti 17:3, 15-18.a

• Buakanakin te taromauri ae koaua. Natannaomata aika ikotaki are taekinaki n ana miitara Etekiera bwa “Koka man te aba ae Makoka,” a na kataia ni kamaunaia naake a kaaina te taromauri ae koaua. Ma te Atua e na boni kamanoia taan taromauria man te kamaunanakoaki.—Etekiera 38:1, 2, 9-12, 18-23.

• Motikan taekaia kaain te aonnaba. E na motiki taekaia aomata ni kabane Iesu ao e na “kaokoroia te korakina ma te korakina, n aron te tia kawakintiibu ngkana e kaokoroia tiibu ma kooti.” (Mataio 25:31-33) E boto ana motikitaeka i aon aron temanna ma temanna ni boutokaa ke n aki boutokaa “tarin” Iesu, ake a na tautaeka ma ngaia i karawa.—Mataio 25:34-46.

• Ikotakia taani kairiri n te Tautaeka n Uea. Naake a kakaonimaki ake a tia n rineaki bwa a na tautaeka ma te Kristo, e na toki maiuia i aon te aba ao ni manga kautaki nakon te maiu i karawa.—Mataio 24:31; 1 I-Korinto 15:50-53; 1 I-Tetaronike 4:15-17.

• Aremaketon. Aio “te buaka n te bong ae kakannato ae ana bong te Atua ae Moan te Mwaaka,” ae aranaki naba bwa “ana bong Iehova.” (Te Kaotioti 16:14, 16; Itaia 13:9; 2 Betero 3:12) Naake e motikaki taekaia Kristo bwa a buakaka, a na boni kamaunaaki. (Tebania 1:18; 2 I-Tetaronike 1:6-10) N ikotaki naba ma kamaunaakia tautaeka ngkai i aon te aba, ake a kaikonakaki n te Baibara bwa te man ae tiritiri ae itiua atuna.—Te Kaotioti 19:19-21.

Baika a na riki imwin te rawawata ae korakora

• Karabuutinakia Tatan ma taimonio. Te anera ae korakora e na karenakoia Tatan ma taimonio “i nanon te kinono,” ae kaikonaki bwa kaanga a a mate. (Te Kaotioti 20:1-3) Tikun Tatan i nanon te kinono kaanga ai aron te mena n te karabuuti; e na aki manga kona ni kariria kaain aon te aba.—Te Kaotioti 20:7.

• Moanakin Ririki ake Tenga. E na waaki i nanon 1,000 te ririki Ana Tautaeka n Uea te Atua, ike e nang karokoi kakabwaia aika rianako nakoia aomata. (Te Kaotioti 5:9, 10; 20:4, 6) “Te koraki ae uanao” ae aki kona ni warekaki mwaitiia, a na “nako . . . mai buakon te rawawata ae korakora” ao n nora aroni moanakin Ririki ake Tenga n te aonnaba.—Te Kaotioti 7:9, 14; Taian Areru 37:9-11.