Tera te Bure?

Ana kaeka te Baibara

Te bure bon te mwakuri, te namakin, ke te iango ae kaaitarai ana kaetieti te Atua. E nanonaki naba iai uruakan ana tua te Atua ni karaoan ae kairua ke ae buakaka i matan te Atua. (1 Ioane 3:4; 5:​17) E kabwarabwaraaki naba n te Baibara taekani buure aika kaineti ma aki karaoan te bwai ae ko riai ni karaoia.​—Iakobo 4:​17.

Ni moan taetae ake e koreaki iai te Baibara, ao taeka ake a kamanenaaki ibukin te bure, a nanona ae “e aki teke te bae maaireaki,” ke te taakete. N te katoto, taanga n tautia i Iteraera rimoa a rangi ni baiteke ngkana a bana n taian atibu ao “e aki kona n aki teke konaia.” Ngkana e rairaki raoi nanon te kibuntaeka anne, ao e kona ni warekaki ni kangai, a “aki kona ni bure.” (Taani Motikitaeka 20:16) Ngaia are karaoan te bure, e nanonaki iai ae e aki teke te bae ko maaireia, ae nanona bwa ko aki maiuakin ana kaetieti te Atua aika kororaoi.

Ngkai te tia Karikiriki te Atua, iai riaina ni katei kaetieti ibukia aomata. (Te Kaotioti 4:​11) Ti na bon anga taekan arora nakoina.​—I-Rom 14:12.

Ti kona n rarawa nakoni karaoan te bure n taai nako?

Ti aki. E taekinaki n te Baibara bwa “a bane ni bure aomata ao a bane ni kabwaka ni kaotiotii aroaron te Atua aika moanibaa n raraoi.” (I-Rom 3:​23; 1 Uea 8:​46; Te Minita 7:​20; 1 Ioane 1:8) Bukin tera?

A aki bure n te moantai ara moan aomata aika Atam ao Ewa ibukina bwa a karikaki ni kororaoi, ni katotongan te Atua. (Karikani Bwaai 1:​27) Ma a kabuaa kororaoia ngke a aki ongeaba iroun te Atua. (Karikani Bwaai 3:​5, 6, 17-​19) Ngke a a riki natiia, a ituaki naba n te bure ao te aki kororaoi. (I-Rom 5:​12) E taekina naba ae kangai Uean Iteraera ae Tawita, “I a tia n ituaki n te bure ngke I bungiaki.”​—Taian Areru 51:5.

Iai buure tabeua aika kakaiaki riki?

Eng. N te katoto, e taekinaki n te Baibara bwa “a buakaka . . . ao a bure kakaiaki” mwaanen Totom rimoa ao e a “rangi n rawawata” aia bure. (Karikani Bwaai 13:13; 18:20) Iangoi baika tenua aikai aika kaotia bwa rawawatara ke kakaiakira te bure.

1. Kakaiakina. E kauringira te Baibara bwa ti na rarawa nakoni buure aika kakaiaki n aron te wene ni bure, taromauriani bouannanti, te iraa, te kokoro ni manging, te aonikai ni kuribwai, te tiritiri ao te tabunea. (1 I-Korinto 6:​9-​11; Te Kaotioti 21:8) E kaotaki n te Baibara bwa a kaokoro buure aikai ma buure aika karaoaki n tiaki te nano ao n aki iangoaki raoi, n aron ara taeka ao ara mwakuri aika kammarakiia tabemwaang. (Taeka N Rabakau 12:18; I-Ebeto 4:​31, 32) Ma ti kaungaaki n te Baibara bwa ti aki riai ni kauarerekei rawawatan aeka ni bure nako, bwa a kona ni kairira nakoni karaoani buure aika kakaiaki riki aika urui ana tua te Atua.​—Mataio 5:​27, 28.

2. Bukini Karaoana. A karaoi buure tabeua aomata ibukina bwa a aki ataa te bae tangiria te Atua. (Mwakuri 17:30; 1 Timoteo 1:​13) E ngae ngke a aki tarariaoaki buure akanne n te Baibara, ma e kaotaki bwa a kaokoro ma buure aika karaoaki n oin nanon te aomata ni kan urui ana tua te Atua. (Warekaia Iteraera 15:30, 31) Karaoani buure n oin nanom, a a bon riki ibukin ‘te nano ae buakaka.’​—Ieremia 16:12.

3. Mwaitini Karaoana. E kaotaki naba n te Baibara kaokoron te bure n tii te taina ma kakaraoan te bure i nanon te tai ae maan. (1 Ioane 3:​4-8) A na karekea motikan taekaia iroun te Atua naake a “kakaraoa te bure ma te nano ni kani bure,” imwin ataakin ae eti.​—Ebera 10:26, 27.

A kona n taonakinako n rawawatan aia kairua naake a karaoa te bure ae kakaiaki. N te katoto, e korea ae kangai te Uea ae Tawita: “A riaon atuu au bure, n aron te uota ae rawawata ae I a aki kona uotau iai.” (Taian Areru 38:4) Ma e anga te kantaninga ae kangai te Baibara: “Ke e kitana arona te aomata ae buakaka ao ana iango te aomata ae aki raoiroi. Ke e okira Iehova ae e na nanoangaia, ke e okira Atuara, bwa e na kaabwabwaka kabwaraan te bure.”​—Itaia 55:7.