Te Rau n te Aonnaba—E na Kangaa n Reke?

Ana kaeka te Baibara

E na reke te rau n te aonnaba, tiaki man aia kakorakora aomata ma man Ana Tautaeka n Uea te Atua, ae te tautaeka mai karawa ae kairaki irouni Kristo Iesu. Nora aron te Baibara n reireinira taekan te kantaninga ae tamaroa aei.

1. E “na katoki buaka ni katobibia te aonnaba” te Atua ni kakoroa bukin ana berita are e na uota te “rau nakon te aonnaba nakoia naake e kukurei irouia!”—Taian Areru 46:9; Ruka 2:14, Good News Translation.

2. E na tautaekana te aonnaba ni kabutaa Ana Tautaeka n Uea te Atua mai karawa. (Taniera 7:14) Ngkana e a tautaekana te aonnaba ni kabutaa, e na kamauna te nanonnaba, are bon oin rikin itabarara aika bati.

3. E aranaki Iesu ae te tia Kairiri n Ana Tautaeka n Uea te Atua bwa “te Natinuea ae Karekea te Rau,” ao e na taraia raoi bwa “e na akea tokin . . . te rau.”—Itaia 9:6, 7.

4. Aomata ake a imanono ni kani buaka a na aki kariaiakaki bwa a na maeka i aan te Tautaeka n Uea, kioina ngkai te Atua e “riribaa ane e tangira te iowawa.”—Taian Areru 11:5; Taeka N Rabakau 2:22.

5. E reireinia ana aomata te Atua aroia ni maeka n rau. E kabwarabwaraa mwin te kaetieti aei te Baibara ni kangai: “Ane a na ororei aia kabaang ni bitii bwa bwaai ni kamarautano, ao aia kainiwai naba ni bitii bwa bwaai ni koromwaanga. Ane e na aki manga tabeka te kabaang te natannaomata teuana n ekaanako te natannaomata teuana, ao a na aki naba manga reireinia te buaka.”—Itaia 2:3, 4.

A a tia Ana Tia Kakoaua Iehova aika mirion ma mirion ni katobibia te aonnaba n reiakina aroni karekean te raoi mairoun te Atua. (Mataio 5:9) E ngae ngke ti nako man reeti aika kakaokoro ao ti maeka n aaba aika kakaokoro aika raka i aon 230, ma ti rawa ni buakania raora n aomata.