E na Reke te Rau n te Aonnaba

Ti bane ni kani maeka n te aonnaba ae reke iai te rau. I nanon ririki aika bati ao a a tia taani kairiri n te aonnaba ni kakorakoraia ni katoki waaki ni kakeru ao ni karekea te rau. N tabetai ao e reke te rau ma e kananokawaki bwa e aki teimaan. E na bon reke te rau n te aonnaba? Eng! Iangoa reireiara mairoun Iesu.

Te bwai ae e na karaoia Iesu

E kaotaki n te Baibara te bwai ae e na waekoa ni karaoia Iesu ibukin reken te rau ae taabangaki n te aonnaba.

• “E na aranaki [Iesu] bwa . . . te Natinuea ae Karekea te Rau. E na akea tokin rikiraken ueana ao te rau.” (Itaia 9:6, 7) E na karika te aonnaba Iesu bwa nnen te rau ae akea tokina, kioina ngkai boni ngaia te tia Kairiri n Ana Tautaeka n Uea te Atua.

• “E na kamaiuia akana maiu ni kainnano aika tang ni kani buokaki . . . ma ane akea te tia buokia.” (Taian Areru 72:12-14) E na kabongana mwiokoana Iesu ni karekea te moti ni koaua ae raoiroi, ni katoki buaka ao karawawata ni kabane.

• “Ane e na aki manga tabeka te kabaang te natannaomata teuana n ekaanako te natannaomata teuana, ao a na aki naba manga reireinia te buaka.” (Itaia 2:4) I aan ana kairiri Iesu ao a nangi bane aomata n reiakina aroia ni karekea te rau n onean mwin te buaka.

Ngkana ko kan ota n aron Iesu ni karekea te rau nakon taai aika imwaira ao tera nanon anne ibukim, mataku n te taamnei ae Tera Ana Tautaeka n Uea te Atua?

Te bwai ae e reiakinira iai Iesu

E noraki naba ni boong aikai bwa a buokaki mirion ma mirion mwaitiia aomata n ana reirei Iesu ibukin te maeka n rau. N ana Kabwarabwara i aon te Maunga ae rangi n ataaki taekana, ao e reireinia iai aomata booto n reirei ibukini karekean te rau i marenaia ma tabemwaang. Iangoi katoto tabeua.

• “A a kukurei taani karekea te raoi.” (Mataio 5:9) E kaungaia taan rimwina Iesu bwa a na aki tii kararoaia mani mwakuri ni kakeru ma a na karekea naba te raoi.

• “Naako moa raoiakina tarim, ao imwina ko na oki n anga am karea.” (Mataio 5:23, 24) E kaumakiia taan rimwina Iesu bwa a na waekoa n raoiakina te kangaanga. E reiakinia kakawakini karekean te rau ma tabemwaang bwa e aonga n nakoraoi iai aia itoman ma te Atua.

• “Katoka ami kabuakaka bwa kam kaawa ni manga kabuakakaaki.” (Mataio 7:1) E anga ana kauring Iesu bwa ti na aki kabuakakaia tabemwaang ke ni kantaningaiia bwa a na karaoi baika ti aki kona ni karaoi, bwa e kona te anua anne ni karekea te iraraure. E reireinia taan rimwina Iesu bwa a na “teimatoa ni kabwarai aia bure aomata” n onean mwin are a na titiribureiia.—Ruka 6:37.

A maiuakin ana reirei Iesu aomata ni katobibia te aonnaba. E ngae naba ngke a rotakibuaka aomata n taabo tabeua ibukini mwakuri n iowawa ao te kakaokoroaki, ma a rabakau aroia n raoiakina aia kangaanga n akea te un, a kabwarabure ao a kaota tangiraia ake a iowawa nakoia.

Ngkana ko kan nora aron ana reirei Iesu ni buokiia tabeman ni karekea te rau, wareka te kaongora ae “Karekea te Rau n Aki Ongea te Buaka ao te Tiritiri.”