Iehova Bon Raoraora ae Moan te Kakannato
“E atongaki iai [Aberaam] bwa raoraon Iehova.”—IAKOBO 2:23.
1. Tera ara konabwai ngkai ti karikaki bwa katotongan te Atua?
“BONI katotongan te karo te nati,” aio te taeka ae aki toki n tataekinaki. Ni koauana, a bati ataei aika a katotongia raoi aia karo. N etina, a uaia kaaro n angania natiia baika a na reke man aia genes n aron abwakia, karani kunia, aroaroia ao a a bati riki. Bon te tia Anga te maiu Iehova ae Tamara i karawa. (Taian Areru 36:9) Ao ngkai natina ngaira, ti boni katotongi naba aroarona n itera tabeua. Ngkai ti karikaki bwa katotongana, iai ngkanne ara konabwai n iaiango ike ti a karaoi iai ara motinnano ao ni karikirakea ma ni kateimatoai ara iraorao.—Karikani Bwaai 1:26.
2. E boto i aon tera rikin Iehova bwa Raoraora?
2 E kona n riki Iehova bwa Raoraora ae moan te kakannato. E boto te aeka n iraorao anne i aon tangirara iroun te Atua ao onimakinana ma Natina iroura. E taku Iesu: “E rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane onimakinna, ma e na reke irouna te maiu are aki toki.” (Ioane 3:16) A bati aia katoto naake a a tia n reke aia iraorao ae kaan ma Iehova. Ti na rinanoi uoua mai iai.
“RARAOU ARE ABERAAM”
3, 4. Taekina kaokoron ana iraorao Aberaam ma Iehova ao kanoana.
3 E taekinaki te baatua ao aia bakatibu tibun Iteraera iroun Iehova ni kangai: “Raraou are Aberaam.” (Itaia 41:8, BK) E taekinaki naba Aberaam n te boki ae te Kauoua n Rongorongo 20:7 bwa raon te Atua. E boto i aon tera ana iraorao ae teimatoa te mwaane ae kakaonimaki anne ma ana tia Karikiriki? Boni man ana onimaki.—Karikani Bwaai 15:6; wareka Iakobo 2:21-23.
4 N te moantai ao a atonga Iehova bwa Tamaia ao Raoraoia kanoan Aberaam ake a a riki bwa te natannaomata ae tibun Iteraera rimoa. Ma e kananokawaki bwa a kabuaa aia iraorao ma te Atua. Bukin tera? Ibukina bwa a kabwaka ni kateimatoa kaotiotan onimakinan ana berita Iehova.
5, 6. (a) E kanga n riki Iehova bwa Raoraom? (b) Baikara titiraki aika ti riai n iaiangoi?
5 Ngkana ko kabatiaa reiakinan taekan Iehova, e na korakora riki onimakinana iroum ao e na nene tangirana. Kaoka am ururing nakon te tai are ko a ataia iai bwa te Atua bon te Aomata ni koaua, ae ko kona ni karikirakea am iraorao ae kaan ma ngaia. Ko reiakinna naba bwa ti bane ni bungiaki n te bure ibukin ana aki ongeaba Atam. Ko a ota raoi bwa a bon ianena botannaomata ni kabane mairoun te Atua. (I-Korote 1:21) Imwin anne, ko a ataia ae tiaki te aomata ae raroa nako ma n aki tabeakinira Tamara ae tatangira are i karawa. Ngke ti reiakina ana bwaintituaraoi ae ana karea ni kaboomwi Iesu ao n onimakinna, ti a moanna ni karikirakea iai ara iraorao ma te Atua.
6 Ngkana ti ururing rikaaki ngkai, ti kona n titirakinira ni kangai: ‘I tabe ni karikirakea au iraorao ma te Atua? E korakora onimakinana irou ao e rikirake ni katoabong tangiran Raoraou ae moan te tangiraki ae Iehova?’ N taai ake rimoa, iai temanna are e iraorao n te aro ae kaan ma Iehova bwa Kiteon. Ti na rinanon ana katoto ae raoiroi ngkai ao ni mutiakinna raoi.
“BON TE RAOI IEHOVA”
7-9. (a) Tera te bwai ae kamimi ae riki nakoni Kiteon, ao tera uaana? (Nora te taamnei ni moan te kaongora aei.) (b) Ti na kanga ni karekea ara iraorao ma Iehova?
7 E beku ibukin Iehova te tia moti ae Kiteon n tain te kangaanga n rongorongoia tibun Iteraera rimoa imwin rinia n te Aba ni Berita. E taekinaki n Taani Motikitaeka mwakoro 6 bwa e kawara Kiteon ana anera Iehova i Obera. N te tai anne, boni bwaai ni kakamaaku nakoia tibun Iteraera tibuni Mirian ake a uakaan ma ngaiia. Ibukin anne, e tabe Kiteon n orei uita ao ni kaaki kunia tiaki n te tawaana ma bon i nanoni nneni taonani kureebe, ike e a kona ni waekoa ni karabaa iai te uita ae kakawaki. E mimi Kiteon bwa e a kaoti naba te anera ao e arana teuaei bwa te tia buaka ae “korakora ae ninikoria” ao e nanououa bwa e na buokia n te tai aei Iehova ke e na aki, n aron are e a tia ni kamaiuia tibun Iteraera ni kaotinakoia mai Aikubita. E taetae te anera ibukin te tia Karikiriki ni karaua nanon Kiteon bwa e boni buokia Iehova.
8 E raraoma Kiteon bwa tera arona ae e na kona iai ni “kamaiuia Iteraera mai nanoni baiia tibuni Mirian.” E mataata raoi te kaeka are e anganaki: E taku Iehova: “N na boni memena i roum, ao ko na tiringia tibuni Mirian ba kanga tiringan te aomata ae ti temanna.” (Taani Motiki-Taeka 6:11-16, BG) E bae n raraoma Kiteon bwa e na kanga ni kona ni karaoa aei, ai ngaia are e a ukera te kanikina. Noria, bwa n te maroro aei ao e a aki raraoma Kiteon, ma e iangoa Iehova bwa te Aomata ni koaua.
9 E kakorakoraaki ana onimaki Kiteon n te bwai are e riki imwina ao e a kaaniaki riki ma te Atua. E katauraoa te amwarake Kiteon ao e angan te anera. Ma ngke e kabuekaki te amwarake anne n te aro ni kakai ngke e ringnga te anera n okona, e a ataia iai Kiteon bwa e bon tei te anera anne ibukin Iehova. E mimi ma ni maaku Kiteon ao e taku: “Akea ngai, te Uea ae Iehova! ba kioina ngkai I a tia n nora aneran Iehova ni kaaitara ma Ngaia.” (Taani Motiki-Taeka 6:17-22, BG) Ma e riki te bwai ane e noria Kiteon anne bwa te bwai n tutuki i marenana ma Atuana? E bon aki! Boni kaitaraan anne ae riki. E kinaaki Iehova irouni Kiteon n te aro are e a namakina bwa e raoi ma te Atua. Ti ataa aei man te ara are e aranaki iai te baonikarea are e kateia Kiteon n te tabo anne bwa “Iehova-tiarom.” E kangai nanon te ara anne: “Bon te raoi Iehova.” (Wareka Taani Motiki-Taeka 6:23, 24, BG; te kabwarabwara mai nano.) Ngkana ti kananoi ara iango ni baike e karaoi Iehova ibukira ni katoabong, ti a ataia iai bwa bon te Rao ni koaua. Ngkana ti katoatai n tataro nakon te Atua, e na rikirake namakinan te raoi ao e kakorakoraa ara iraorao ma ngaia.
ANTAI AE E NA ‘MEMENA I NANON UMAN IEHOVA’?
10. Tera ae tangiria mairoura Iehova ngkana ti kan riki bwa raoraona n aron ae taekinaki n Taian Areru 15:3, 5?
10 Ngkana ti kan riki bwa Raoraon Iehova, ti riai ni kaotiotii aroaro tabeua aika okoro. N aron ae koreaki n Taian Areru 15, e anenei baika a riai n reke iroura Tawita bwa ti aonga ni ‘memena i nanon umwan Iehova,’ ae nanonaki iai te iraorao ma te Atua. (Taian Areru 15:1, BG) Ti na kaatuui ara iango ngkai i aon uoua mai buakoni baikanne, ae te rarawa ni winnanti ao maiuakinan te eti ao te koaua n ara mwakuri ni kabane. Ni kaineti ngkanne ma baikai, e taekina ae kangai Tawita ibukin ane e memena n umwan Iehova: “Ane aki winanti n newena. . . . ma n aki anaa te mane n anai naano ni kani kabuakaka ane akea ana bure.”—Taian Areru 15:3, 5, BG.
11. Bukin tera bwa ti riai n rarawa ni winnanti?
11 E anga ana taeka ni kauring Tawita n te areru riki teuana ni kangai: “Taua newem man te buakaka.” (Taian Areru 34:13, BG) Ngkana ti kabwaka ni mutiakina te reirei ni kairiri aei ae kairaki koreana, ti a kona ni kararoaaki iai ma Tamara ae raoiroi are i karawa. Ni koauana, te winnanti bon aroaron Tatan ae karoton te kairiribai nakon Iehova. E reke te taeka ae “Riaboro” man te taetae ni Kuriiti ae nanona “uarao.” Ngkana ti taubaang n ara taetaenikawai ibukia aomata, ti a buokaki iai ni kateimatoa kaaniakira ma Iehova. E a moamoa riki aei n aroarora ni kaineti ma mwaane aika a a tia n anganaki mwiokoaia n te ekaretia.—Wareka Ebera 13:17; Iuta 8.
12, 13. (a) E aera ngkai ti riai ni bwaina te koaua ni bwaai ni kabane? (b) Tera aron rotakia aomata ngkai ti maiuakina anne?
12 Bon anuani maiuia ana toro Iehova bwainan te koaua ma tiaki te babakanikawai. E korea ae kangai te abotoro Bauro: “Teimatoa n tataro ibukira, bwa ti onimakinna bwa a bon itiaki mataniwin nanora, ngkai ti kani bwaina te kakaonimaki ni bwaai ni kabane.” (Ebera 13:18) Ibukina bwa a matoa nanora ni kani “bwaina te kakaonimaki ni bwaai ni kabane,” ti a rarawa ngkanne ni babakanikawaia tarira ni Kristian. N te katoto, ngkana a mwakuri iroura ibukini karekean aia mwane, ti taraia raoi bwa ti na karaoa ae riai nakoia ao ni kabooia ni kaineti ma te boraraoi ae ti a tia ni karaoia ma ngaiia. Ngkai Kristian ngaira, ti kakaraoa ae eti nakoia ara tia mwakuri ao aomata nako. Ao ngkana ti mwakuri iroun raora ni Kristian, ti riai n taraia raoi bwa ti na aki babakanikawaia n tangiria bwa e na okoro arona nakoira.
13 Ai batira taai aika ti ongongo iai taeka ni kakaitau mairouia kaain te aonnaba ake a kammwakuriia Ana Tia Kakoaua Iehova! N te katoto, e noria te tarekita n te botaki ni kateitei teuana ae bubura bwa a kakakoroi bukin aia taeka Ana Tia Kakoaua Iehova. E taku: “Kam karaoa ae kam boraraoia n taai nako.” (Taian Areru 15:4, BG) E kateimatoaaki ara iraorao ma Iehova n aeka n aroaro akanne. Irarikin anne, e karekea neboan Tamara ae tatangira are i karawa.
BUOKIIA AOMATA BWA A NA RIKI BWA RAORAON IEHOVA
14, 15. Ti na kanga ni buokiia aomata bwa a na riki bwa raoraon Iehova n ara mwakuri ni minita?
14 E ngae ngkai a kakoauaa aomata bwa iai te Atua, ma a bati aika ti kaitiboo ma ngaiia n ara mwakuri ni minita aika a aki iangoia bwa Raoraoia ae moan te kakannato. Ti na kanga ni buokiia? Iangoa te kaetieti are e angania taan rimwina Iesu ake 70 ngke e kanakoia ni kakauomania bwa a na uarongorongo: “Ngkana kam moan rin n te auti ao kangai, ‘Te raoi nakoimi kaain te auti.’ Ao ngkana iai te aomata ae tangira te raoi iai ao e na roko ami raoi irouna. Ma ngkana akea ao e na manga okiringkami.” (Ruka 10:5, 6) Ti kona n anai nanoia aomata nakon te koaua mani kaotiotan te akoi ngkana ti kawariia. E kona n ibuobuoki aei ni kanakoa ribaakira irouia taani kakaaitaraira, ao ni kauka te kawai ibukin te maroro ae raoiroi riki n te tai teuana.
15 Ngkana ti kaitiboo ma aomata ake e korakora tangiran aia Aro ae kewe ke a tou mwini katei aika aki boraoi ma te Baibara, ti teimatoa ni kaotiota te tangira ao te aroaro ae rau. Ti kamauriia ma te tangira n ara bobotaki te koraki aika aki kukurei n aroaroia botannaomata ni boong aikai n te aro are a a ueke nanoia ni kan reiakina ae bati riki ibukin Atuara ae ti taromauria. A bati katoto aika manena ibukira n te kaongora ae “E Bitii Maiuia Aomata te Baibara,” teuana imwin teuana.
TI MWAKURI MA RAORAORA AE MOAN TE KAKANNATO
16. N te aro raa ae ti kona n iangoaki iai bwa raoraon Iehova ao ‘raona ni mwakuri’?
16 A aki toki ni karikirakei aia iraorao aika kaan aomata aika a kaai ni mwakuri. A bane ni kakabwaiaaki aomata ake a katabui maiuia nakon Iehova bwa a a kona n iangoaki bwa raoraona ke ‘raona ni mwakuri.’ (Wareka 1 I-Korinto 3:9.) Ni koauana, ngkai ti uataboa te uarongorongo ao karekeaia taan rimwini Kristo, a a bati riki ara atatai ni kaineti ma aroaron Tamara ae i karawa aika moan raraoi. Ti a ataa aron taamneina ae raoiroi ni kataubobongaira ibukini waakinani mwiokoara ae tataekinan te rongorongo ae raoiroi.
17. E kanga ni kaotaki bwa bon Raoraora Iehova man amwarake n taamnei aika katauraoaki n ara bwabwaro ma ruunga?
17 Ngkana e bati riki ara tai n uataboa karekeaia taan rimwini Kristo, ti na namakina iai kaaniara riki ma Iehova. N te katoto, ti nora aron Iehova ni kabwarai nanoia taani kakaaitaraira. Kaoka am ururing nakon ririki tabeua aika nako. Tiaki ngkanne nora raoi aron te Atua ni kairirira? Ti boni mimi n amwarake n taamnei aika rangi ni bati aika teimatoa n roroko. E kaotaraeaki n ara bwabwaro ao ara runga ana tangira ma ataakin ara kangaanga iroun Tamara ao baika ti kainnanoi. A korea aia reta ni kakaitau ibukin te bwabwaro te utu teuana ni kangai: “A bon rotaki nanora ni kanoan te kaetieti. Ti namakinna bwa e korakora ana tangira Iehova nakoira n tatabemanira nako ao e tangirira bwa ti na tokanikai.” Imwini kaean te bwabwaro ae okoro teuana i Ireland irouia te taanga ni mare mai Tiaman, a boni kaota nanoia ni kakaitau n aroia kaain te botaki ni butimwaeiia ma te tangira ao n tabeakinia ao a a manga kangai: “Ma e rangi ni korakora riki ara kakaitau nakon Iehova ao te Uea ae Iesu Kristo. A a tia ni kaoira bwa ti na riki bwa kaain te natannaomata aei ae katiteuanaaki ni koaua. Ti aki tii taekina aron te katiteuanaaki ma ti maiuakinna n te bong koraki. Ti kauringaki n taai nako ni bwaai aika riki nakoira aika irekereke ma te bwabwaro ae okoro i Dublin, ae taekan te mwioko ae rangi ni kakawaki, are ti riai ni kaai ni beku ma ngkami ni kabane ibukin Atuara ae kakannato.”
A REITAKI RAAO I MARENAIA
18. Tera ae ti kona n titirakinira ni kaineti ma reitakira ma Iehova?
18 E karikirakeaki te iraorao n te reitaki ae raoiroi. E a rangi ni kakabonganaaki te reitaki ao kanakoan rongorongo n te tareboon ae uouotaki n te Internet ao te maroro i aoni kukune aika boou n te roro ae ngkai. Ma ngkana ti kabotaua arora, tera aroni mwaitin ara tai n tatabemanira nako n reitaki ma Raoraora ae moan te kakannato ae Iehova? Ni koauana, boni ngaia ‘te tia Ongoraei tataro.’ (Taian Areru 65:2, BG) Ma tera aroni mwaitin ara tai ni biririmoa n taetae nakoina?
19. Tera buokara ae kona n reke ngkana ti namakinna bwa e aki bebete bunran nanora nakon Tamara are i karawa?
19 A namakinna ana toro te Atua tabeman bwa e aki bebete bunran nanoia ao kaotan aia namakin ni koaua. Ma aio ae e tangiria Iehova bwa ti na karaoia ngkana ti tataro. (Taian Areru 119:145; Baebaeti 3:41) E ngae ngkana e kangaanga iroura bunran nanora ma ti boni kona naba ni buokaki. E korea ae kangai Bauro nakoia Kristian ake i Rom: “Ngkana ti riai n tataro ma ti aki ataa te bae ti na tataroia, ao e bubutii te taamnei ibukira ni baike ti ngirangira iai ake ti aki atongi. Ma e ataa nanon te taamnei teuare tirotiroi naano, ibukina bwa e bubutii te taamnei ibukia te koraki aika itiaki, ni kaineti ma nanon te Atua.” (I-Rom 8:26, 27) Ngkana ti kananoi ara iango i aon taeka akana koreaki ni bokin te Baibara, ae Iobi, Taian Areru ao Taeka N Rabakau, ti a buokaki iai bwa ti na taekin ara namakin ni koaua nakon Iehova.
20, 21. Tera te karaunano n ana taeka Bauro n I-Biribi 4:6, 7?
20 Ngkana ti aitara ma aaro ni karawawata, ti bia mutiakin ana taeka n reirei Bauro aika kairaki koreaia nakoia I-Biribi aikai: “Tai raraomaeakina te bwai teuana, ma a na kaotaki ami bubutii ni bwaai ni kabane nakon te Atua, n te tataro ma te kakorakora n tataro ni bubutii n raonaki n te katituaraoi.” Ti na boni kabebeteaki ao ni karauaki nanora man aeka ni maroro aika akea te imamaakin iai ma Raoraora ae moan te kakannato bwa e reitia ni kangai Bauro: “Te rau are mairoun te Atua ae riaon aia iango aomata, e na kawakin nanomi ma ami iango rinanoni Kristo Iesu.” (I-Biribi 4:6, 7) E bia kakawaki iroura n taai nako te “rau are mairoun te Atua” ae akea kabotauana are e boni kawakin nanora ao ara iango.
21 E buokira te tataro ni karikirakea ara iraorao ma Iehova. Mangaia are ti bia “tataro n aki toki.” (1 I-Tetaronike 5:17) E bia kakorakoraaki ara iraorao ae kakawaki ma te Atua ao ara motinnano ae kaboraoani maiura ma ana tua aika raraoi. Ao ti bia karekei ara tai aika tau ibukini kananoan ara iango i aoni kakabwaia aika reke nakoira kioina ngkai Iehova bon Tamara, Atuara ao Raoraora.