Karekea Reireiam Man Ana Taeka Te Atua

Bukin Tera Bwa Ti Riai ni Kamanena Aran te Atua?

A na rinanoaki titiraki aika ko bae n tia n tabeki n te kaongora aei, ao ni kaotaki naba kaekaaia n am Baibara. A kukurei Ana Tia Kakoaua Iehova ni maroroakini kaekaaia ma ngkoe.

1. Bukin tera bwa e kaota arana te Atua?

Ni koauana, ko bae ni kani weteaki n aram n oneani mwin “teuarei,” “naewa,” “neiko,” ke “neierei.” E ibuobuoki te ara ni kaotiko bwa antai ngkoe. E aranaki naba te Atua n nakoa aika “Te Uea,” “te Atua ae Moan te Mwaka” ao te “tia Karaoiko.” (Karikani Bwaai 15:2; 17:1, BG; Te Minita 12:1, BG) Ma e a tia naba ni kaota arana bwa ti aonga ni karekea ara iraorao ma ngaia. Aran te Atua bon Iehova n te taetae n Ingiriti.—Wareka Itaia 42:8.

E ngae ngke a a tia taan rairai n te Baibara aika bati n onea mwin aran te Atua n te nakoa ae te “Atua” ao te “Uea,” ma e kuneaki te ara anne n te mwaiti ae e kaania 7,000 te tai n te Baibara rimoa n te taetae n Ebera. E teretere n anne bwa e tangiria te Atua bwa e na ataaki arana.—Wareka Itaia 12:4.

2. Bukin tera bwa e rangi ni kakawaki ataakin aran te Atua?

E bati riki ae ko riai n ataia ibukin aran te Atua nakon tii taekinana. Ataakin aran te Atua e nanonaki iai te iraorao ae kaan ma ngaia. E kangai nanon aran Iehova: “E Karaoia bwa e na Riki.” E karaunano ataakin anne bwa e na boni karaoi baika a kainnanoaki te Atua ibukini kakororaoan ana kantaninga. Ngaia are e irekereke ataakin aran te Atua ma kakoauaan ae e na kakoroi bukin ana berita nako. (Taian Areru 9:10) A kairaki aomata ake a ataa ao ni kamanena aran te Atua man aia onimaki, bwa a na onimakinna ao ni moanibwaia ni maiuia. A na kamaiuaki aekan aomata akanne iroun Iehova ae te Atua.—Wareka Taian Areru 91:14.

3. Bukin tera bwa e tangiria te Atua bwa e na kaotiotaki arana?

E tangiria te Atua bwa a na kinaa aomata n arana bwa a kakabwaiaaki iai. A kona n riki iai bwa raoraon te Atua ao ni kantaningaa te maiu n aki toki. Maroaka ae e tangirira Iehova bwa ti na kaotiota arana!—Wareka Ioane 17:3; I-Rom 10:13, 14.

E kaotiota aran te Atua Iesu n reireinaia aomata kawain te Atua, Ana tua, ao Ana berita nako. N taai aikai, a teimatoa taan rimwin Iesu ni karaoa te mwakuri ae kaotiotan aran te Atua n aaba nako. A katiteuanaaki ni karaoan aei “te koraki ake a na uouota [aran te Atua].”—Wareka Mwakuri 15:14; Ioane 17:26.

4. E na kanga te Atua n neboa arana?

E tangira arana Iehova ae te Atua bwa e na neboaki ibukina bwa e a tia n uaraoaki. N te katoto, a taekinna tabeman bwa e aki karika te aomata ao ti aki riai n ongeaba irouna. A taekinna naba tabemwaang bwa e aki tabeakinira, ao e boni karikii rawawata. A uaraoa aran te Atua aeka n aomata akanne. Ma a na aki karaoa anne n aki toki. A na kamaunaaki iroun te Atua te koraki ake a aki karinea arana.—Wareka Taian Areru 83:17, 18.

E na neboa arana Iehova ngkana e kamaunai tautaeka nako Ana Tautaeka n Uea, ao ni manga kaoka te rau ma te mweraoi nakon te botannaomata. (Taniera 2:44) A na waekoa aomata nako n ataia ae Iehova bon te Atua ae koaua.—Wareka Etekiera 36:23; Mataio 6:9.

Tera ae ko riai ni karaoia? Kaaniko ma te Atua rinanon reiakinan ana Taeka ao te iraorao ma aomata ake a tangiria. E na bon uringia ana toro aika kakaonimaki Iehova ngkana e neboa arana.—Maraki 3:16.

Ibukin rongorongona riki tabeua nora mwakoro 1 n te Tera Ana Reirei ni Koaua te Baibara boki aei, ae boreetiaki irouia Ana Tia Kakoaua Iehova.

[Taamnei n iteraniba 10]

Aran te Atua n te Baibara n Ebera rimoa