Reireiara Mairoun Iesu

Arora n Toua Mwini Kristo

Ngkana a onimakina Iesu aomata, ao e aki toki n taekina ae kangai nakoia: ‘Riiki bwa taan rimwiu.’ (Mataio 9:9; 19:21) Tera ae irekereke n te riki bwa taan rimwin Iesu, ke te riki bwa te Kristian? Iangoi kaekaan titiraki aika kakawaki aika tenua.

Tera arom ae riai nakoia aomata?

▪ E riai te tia rimwin Iesu n tou mwini kaetieti ibukin arona nakoia aomata. N te katoto, e taku Iesu: “Mangaia ae bwaai ni kabane aika kam tangiriia aomata bwa a na karaoi nakoimi, kam riai ni karaoi naba nakoia.” Ma tera arom ngkana e kauniko temanna? E taku Iesu: “Bareiko ni kaetii bwaai ma ane kabaea tangina ibukim.” E tuangia naba taan rimwina ni kangai: “Ngkana kam aki kabwarai aia bure, ao e na aki naba kabwarai ami bure Tamami.”​—Mataio 5:25; 6:15; 7:12.

E anga ana reirei ni kairiri Iesu nakoia taanga ni mare n tatabemania nako ae kangai: “Kam ongo bwa e taekinaki ae kangai: ‘Ko na tai wene ni kimoa.’ Ma I taku nakoimi bwa ane teimatoa n tarataraa te aine n iango i nanona bwa e kani wene n taanga ma ngaia, ao e a tia ni wene ni kimoa ma ngaia i nanona.” E kariaia te Kristian ni koaua bwa e na rota ana iango ao nanona ana reirei Iesu.​—Mataio 5:27, 28.

A kakeaa mweraoia Kristian ni koaua ibukini buokaia aomata. E anga naba boni ngaia Iesu. N te katoto, ni mwanangaia n uarongorongo teuana ae rotiia iai te kua, a aki reke aia tai Iesu ma ana abotoro ni motirawa ao n amwarake naba. Mangaia are e a kairiia Iesu n te booti nakon te tabo ae rau bwa a na motirawa iai. A ongo aomata te tabo are e na nako iai Iesu, ao a kawaekoaia n rimoana. E taekinaki n te rongorongo n te Baibara ae kangai: “Ngke e aerake Iesu man te booti ao e noriia aomata aika uanao, ao e korakora nanoangaaia bwa ai aroia tiibu aika akea te tia kawakinia ao e a reireinia baika bati.” (Mareko 6:30-34) Ko kona ni katotonga Iesu ni karaoan ae e tangiria te Atua, e ngae ngkana ko aitara ma kangaanga.

E aera bwa ko riai n tibwaa te rongorongo ae raoiroi nakoia aomata?

▪ E reireinia taan rimwina Iesu bwa a na tibwaa nako te rongorongo ae raoiroi. E tuangia ana abotoro ni kangai: “Kam na nako ao kam na uarongorongo ni kangai: ‘E a kaan te tautaeka n uea ae bwaini karawa.’” (Mataio 10:7) Iai te rongorongo ae rangi ni kakawaki irouia taan rimwin Iesu. E tataro Iesu ni kangai: “Ibukini karekean te maiu are aki toki, a riai n ataiko ae tii ngkoe te Atua ae koaua.”​—Ioane 17:3.

E a kaman taekina te mwakuri Iesu are a na uataboia taan rimwina aika mirion ma mirion mwaitiia. E taku: “E na tataekinaki te rongorongo ae raoiroi aei ae taekan te tautaeka n uea, n te aonnaba ni kabutaa bwa te bwai ni kaotioti nakoia botannaomata ni kabaneia.” (Mataio 24:14) Ngkana ko a tia n reiakina taekan Ana Tautaeka n Uea te Atua ao n onimakina ae taekinaki n te Baibara, akea te nanououa bwa ko nang tibwaa nako are ko ataia ma te kimwareirei. A bati taan rimwin Iesu ake a moana tataekinan Ana Tautaeka n Uea te Atua mairouia aia koraki.​—Ioane 1:40, 41.

E aera bwa ko riai ni bwabetitoaki?

▪ Ngke e bwabetitoaki Iesu n te karaanga ae Ioretan, ao tao e taekina ae kangai ngke e tataro: “I a roko bwa N na karaoa nanom te Atua.” (I-Ebera 10:7) Ngkana ko kani karaoa nanon te Atua, ko riai naba ni bwabetitoaki. E tua ae kangai Iesu: “Reireinia aomata mai buakoia botannaomata nako bwa a na riki bwa taan rimwiu ao bwabetitoiia.”​—Mataio 28:19.

Baikara mwioko ao kakabwaia aika reke man te bwabetito? A kabane maiuia ni beku ibukin te Atua taan rimwin Iesu ake a tia ni bwabetitoaki. E taekina Ana Tua te Atua ni kangai Iesu: “Ko riai n tangira Iehova ae Atuam ma nanom ni kabanea, [ao] maium ni kabanea.” (Mataio 22:37) E taku naba: “Ngkana iai ae kan rimwiu ao ke e kakeaa boni ngaia.” (Mataio 16:24) E kaikonakaki n te bwabetito ana motinnano te aomata ni kakeaa boni ngaia ao n riki bwa ana toro te Atua. A kona ni bubutii te koraki ake a karekea aia iraorao ae e okoro ma te Atua bwa a na anganaki mataniwin nanoia aika raoiroi.​—1 Betero 3:21.

Ibukin rongorongo riki tabeua, nora mwakoro 18 n te boki ae boreetiaki irouia Ana Tia Kakoaua Iehova ae.