Karekean Te Mweraoi I Buakoia Ana Aomata Te Atua

“N na katituaraoiko n te botaki ae ababaki.”​—TAIAN ARERU 35:18, BG.

1-3. (a) Tera ae e kona ni kairiia Kristian tabeman bwa a na ruanikai aia iraorao ma te Atua? (b) A na karekea ia kamanoaia ana aomata te Atua?

I NANON aia tai ni motirawa Joe ma buuna, ao a nako n uaua ma bwaai n tebo ni matakuakini rakai ake a rangi ni bati iai iika aika kakaokoro karaia ao buburaia. A uaua nako riki bwa a mataaiakina tamaroan te rakai are i nano. Ngke a uaua nakon te tabo are e rangi n nano, ao e taku buun Joe: “I taku bwa ti a raroa nako ma te aba.” E kaeka Joe: “Tai raraoma I ataa ae I karaoia.” Imwina riki, e uring ana taeka buuna n te tai ae waekoa ao e taku: ‘A a bane n nakea ngkai iika?’ Ao e a rangi ni maaku ngke e a ataa bukina. E a kaoti ngkai man te tabo ae rangi n nano riki te bakoa are e a kainetia. Eng, e nang bon reke ngkai iroun te bakoa. Ngke tao ai tii teuana te mita raroan te bakoa ma teuaei, e a katannako te bakoa ao e a buanako naba.

² E kona n rangi ni katikaki nanon te Kristian ni baika anainano aika n ana waaki Tatan n aron te kaakibotu, te mwakuri, ao te kaubwai n akea namakinan ae e a tabe n reke n te kangaanga. E taku Joe ae unimwaanen te ekaretia: “I kauringaki n te baere riki nakoiu bwa antai aika ti riai n iraorao ma ngaiia. Ti riai n uaua n te tabo ae ti mano ao ni kukurei iai, ae te ekaretia!” Ti aki riai n uaua n te tabo ae nano ike ti a kaokoroaki iai man te ekaretia ao n tokina ti a kabuanibwai. Ti riai ni waekoa ni manga okira ‘te ekaretia’ ngkana ti namakinna bwa ti a tabe ni kitanna ibukini waaki tabeua. Ngkana ti aki karaoa aei, e na rotakibuaka iai ara iraorao ma Iehova.

³ Bon te tabo ae karuanikai te aonnaba aio ibukia Kristian ni boong aikai. (2 Timoteo 3:1-5) E tabe ngkai Tatan ni kakaaeia aika aki taratara raoi bwa e na kabwakaia, bwa e ataia ae e a kani bane ana bong. (1 Betero 5:8; Te Kaotioti 12:12, 17) Ma e ngae n anne, ti boni kamanoaki. E a tia Iehova ni katauraoa te tabo ni katantan ibukia ana aomata ae te ekaretia ni Kristian.

4, 5. A kanga aomata aika bati n iangoi aroia nakon taai aika imwaia, ao bukin tera?

⁴ E bon aki tau aron te tararua n ana waaki ni kairiri te aonnaba aei ibukin te marurung ke te kukurei. A namakinna aomata aika bati bwa a uruanaki mweraoia n te kakeru, te iowawa, bobuakani bwaai ibukin te maiu ke waakin te aonnaba riki tabeua. A bane ni kaaitara aomata ma kangaangan te rikirake ni kara ao te aoraki. Ao tabeman riki ake a mwakuri, ake iai mwengaia, iai aia mwane ao marurungia ae tau, a tabe ngkai n iaiangoia bwa a na maanra baikai n riki.

⁵ E kakoauaaki naba irouia aika bati bwa e kangaanga reken te mweraoi n aanga riki tabeua . E kananokawaki, bwa a rangi ni bati ake a noria bwa e tuai mani kakororaoaki aia kantaninga ibukin reken te rau ao te nakoraoi n aia mare ao n aia utu. Ibukini karekean te rau n aia iraorao ma te Atua, a bati taan taromauri aika aki oota raoi ao n nanououa ni manenan te kairiri are a a tia ni karekea. A namakina naba aei ibukin aroaroia aika bubuaka mataniwi n aia Aaro ao aia angareirei aika aki boraoi ma te Baibara. Ai ngaia are, a kakoauaa aomata aika bati bwa te bwai ae a kona ni karaoia bon tii onimakinan te rabakau n aonnaba ke aia akoi ma wanawanaia raoia n aomata. Ti aki mimi ngkai aomata aika i rarikira a namakina te aki mweraoi ke a tangiria bwa a na aki kaatuua iangoan aroia nakon taai aika imwaia.

6, 7. (a) Baikara bukini kaokoron aroaroia aomata aika beku ibukin te Atua ao aika aki? (b) Tera ae ti na iangoia?

⁶ Ai kaokorora aroaroia kaain te ekaretia ni Kristian ma ake tiaki kaaina! E ngae ngkai ana aomata Iehova ngaira aika ti aitara ma aroaro ao kangaanga aika bati aika tii te arona ma kaain rarikira, ma a na kaokoro arora ni kaaitarai. (Wareka Itaia 65:13, 14; Maraki 3:18.) Bukin tera? Ibukina bwa ti kunea te kabwarabwara ae karaunano n te Baibara ibukin te aroaro ni maiu ae a waaki ngkai iai aomata, ao ti a taubobonga ni kaaitarai karuanikai ma kangaanga ni maiura. Ibukin anne, ti a aki rangi n raraoma ibukin taai aika imwaira. Ngkai taan taromauria Iehova ngaira, ti a kamanoaki man iango aika kairua ao aika aki boraoi ma te Baibara, mwakuri aika bubuaka ao kangaanga aika riki mai iai. A namakina te raunnano ae e aki ataaki irouia tabemwaang, kaain te ekaretia ni Kristian.​—Itaia 48:17, 18; I-Biribi 4:6, 7.

⁷ A kona katoto tabeua ni buokira bwa ti na iaiangoa te mweraoi ae reke irouia ake a beku iroun Iehova ni kabotauaki ma ake a aki beku irouna. A kona katoto aikai ni kairira bwa ti na tuoi ara iango ao baika ti karaoi ao n iangoia bwa ti kamanena raoi ke ti aki ana reirei te Atua are e katauraoaki ibukini kamanoakira.​—Itaia 30:21.

“A Kuri ni Bwaka Waeu”

8. Tera ae a riai ni karaoia n taai nako ana toro Iehova?

⁸ Ni moan rongorongoia aomata, a kakorakoraia te koraki ake a rineia bwa a na beku ao n ongeaba iroun Iehova bwa a na katoki aia iraorao ma te koraki ake a aki beku irouna. Ni koauana, e taekinna Iehova bwa e na riki te ikakaiwi i marenaia taan taromauria ma te koraki ake a toua mwin Tatan. (Karikani Bwaai 3:15) A rangi ni kaokoro aroaroni maiuia ana aomata te Atua ma ake a otabwaninia, ibukina bwa a teimatoa n iri nanoni booto n reirei aika kairaki koreaia iroun te Atua. (Ioane 17:15, 16; 1 Ioane 2:15-17) E bon aki bebete n taai nako irakin nanon aei. Ni koauana, tabeman i buakoia ana toro Iehova a nanokokoraki n tabetai n iangoan ae tao iai raoiroin te nano ni kan anga boni ngaiia ke akea.

9. Kabwarabwaraa te kangaanga are e kaitaraa te tia korea Taian Areru 73.

⁹ Temanna mai buakoia ana toro Iehova are e korea Taian Areru 73 ae tao kanoan Ataba, e nanokokoraki bwa tao e a tia ke e tuai ni karaoi ana babaire aika kaotiota te wanawana. E titiraki te tia areru bwa e aera ngkai n angiin te tai a taraa n nakoraoi maiuia aomata aika buakaka, a kukurei ao ni kaubwai, ma a kaaitara ma te kataaki ao te rawawata tabeman aika a kakorakoraia ni beku iroun te Atua.​—Wareka Taian Areru 73:1-13.

10. E aera bwa a kakawaki ibukim titiraki ake e tabeki te tia areru?

¹⁰ Ko a tia n titiraki n aekan ana titiraki te tia areru ake a koreaki? Ngkana ngaia anne, akea riain namakinan ae ko rangi ni bure, ke n iangoia bwa e tabe ni mamaara am onimaki. Ni koauana, a bati ana toro Iehova, n ikotaki naba ma tabeman ake e kabonganaia ni korean te Baibara aika a iaiangoa te titiraki anne. (Iobi 21:7-13; Taian Areru 37:1; Ieremia 12:1; Abakuka 1:1-4, 13) Ai ngaia are a riai te koraki ake a kani beku iroun Iehova ni bane n ota raoi ao ni butimwaea te kaeka ibukin te titiraki ae kangai: Bon te bwai ae rangi n raoiroi te beku ao te ongeaba iroun te Atua? E irekereke aei ma te titiraki are e tabekia Tatan n te onnaroka are i Eten. E rangi n irekereke te titiraki ae taabangaki aei ni kaineti ma ana tautaeka te Atua ma te beku ao te ongeaba. (Karikani Bwaai 3:4, 5) Ngaia are ti karaoa ae riai ngkana ti bane n iangoa te titiraki are e tabekia te tia areru. Ti riai ni bakantang irouia taani kainikatonga aika buakaka ibukin nakoraoini maiuia? Ti riai ni “bwaka” man ara beku iroun Iehova ao ni kakairi irouia? Bon anne ae e tangiria Tatan bwa ti na karaoia.

11, 12. (a) E kanga te tia areru n tokanikai i aon raraomana, ao tera reireiara iai? (b) Tera ae e a tia ni buokiko bwa e na titeboo am motinnano ma te tia areru?

¹¹ Tera ae e buoka te tia areru n tokanikai n raraomana? E ngae ngke e kakoauaa bwa e kuri ni bwaka man te aroaro ae raoiroi, ma e bitaki ana iango ngke e rin n “uman te Atua ae tabu” ae nanonaki iai menana i buakoia aomata aika korakora aia onimaki ake a mena n ana umwanrianna ae tabu ke ana tembora te Atua ao ni kaatuua iangoan ana kantaninga te Atua. Imwin anne, e a mataata ngkai te tia areru bwa e aki kan irekereke ma mwin aia mwakuri taani kakaraoa ae buakaka. E kona n nori kawaia ao aia rinerine ni maiuia bwa e na karokoia n “taabo aika maranran.” E ataia te tia areru bwa aomata ake a karaoi mwakuri aika rangi ni buakaka ake a kitana Iehova, a na boni kamaunaaki ni “bwaai aika kakamaaku,” ma e na boni boutokaia Iehova te koraki ake a toro irouna. (Wareka Taian Areru 73:16-19, 27, 28, BG.) Akea te nanououa bwa ko a tia n nora koauan te taeka anne. E na taraa n anainano nakoia aika bati waakinani maiuia i bon irouia n akea karinean ana tua te Atua, ma a na aki kona ni birinako mani mwin aia mwakuri aika bubuaka.​—I-Karatia 6:7-9.

¹² Tera riki ae ti reiakinna mani baike a riki nakon te tia areru? E kunea te mweraoi ao te wanawana ni menana i buakoia ana aomata te Atua. Ngke e nakon te tabo are e taromauriaki iai Iehova, ao e a moanna n oota raoi ao n eti ana iango. N aron naba anne, iai ni bobotakin te ekaretia taan angareirei aika wanawana, ao ti karekei iai amwarake n taamnei aika uaana ni boong aikai. E tuangia ana toro Iehova bwa a na kaakaei bobotaki ni Kristian bwa iai bukina ae raoiroi. A kona n namakina iai kaungaaia ao kakorakoraaia ni karaoan te mwakuri ae kaotiota te wanawana.​—Itaia 32:1, 2; I-Ebera 10:24, 25.

Bwaina te Wanawana n Rineaia Raoraom

13-15. (a) Tera te bwai are riki nakon Rina, ao tera ae kaotaki iai? (b) E aera ngkai ti kamanoaki n ara iraorao ma raora ni Kristian?

¹³ Te katoto teuana, Rina ae natin Iakoba te aine are e reke n te kangaanga ae kakaiaki ibukini karekeaia raoraona aika kaain te aonnaba. Ti ongoraea rongorongona ae taekinaki ni Karikani Bwaai bwa n angiin te tai, e iraorao ma aineni Kanaan n te tabo are a maeka iai ana utu. E bon aki boraoi maiuia ae raoiroi taan taromauria Iehova ma kaaini Kanaan. Ni kaitaraan anne, e kaotaki n aia kukune taan rabakau ni bwain aantano bwa man aroaroni maiuia kaaini Kanaan, e a kabatiaaki iai i abaia taromauriani boua, te wene ni bure, karaoan ae kammaira ni kanoan aia taromauri , ao te iowawa ae tiritiri. (Te Otinako 23:23; Nakoaia Ibonga 18:2-25; Te Tua-Kaua 18:9-12) Uringa mwin ana iraorao Rina ma aomata aikai.

¹⁴ E noraki Rina iroun Tekem ae teuare taekinaki bwa “e karineaki riki nakoia kaain ana auti tamana” “ao e weteia, ao e wene ma ngaia ao e kamaraea.” (Karikani Bwaai 34:1, 2, 19, BG) Ai boni kangaangara! N am iango e a tia Rina n iaiangoia bwa e na riki te aro aei nakoina? Tao e bon tii iangoia neiei bwa e na iraorao ma rooro n rikirake n te aba anne, ake e taku bwa a aki kona n iowawa. E ngae n anne, e rangi ni mwamwanaaki Rina.

¹⁵ Tera reireiara man te rongorongo aei? Ti aki kona n iraorao ma aika tiaki kaain te onimaki ao ni kantaningaia bwa ti na aki rotakibuaka iai. E taekinaki n te Baibara bwa “a urui aroaro aika raraoi taian iraorao aika bubuaka.” (1 I-Korinto 15:33) N te itera teuana, boni kamanoam am iraorao ma aomata aika titeboo am onimaki ma ngaiia, aroaroni maium ae moan te tamaroa, ao tangiran Iehova. E na kakorakorako te iraorao ae tamaroa nakoni kakaraoani mwakuri aika raraoi.​—Taeka N Rabakau 13:20.

“Kam A Tia n Tebokaki ni Kaitiakaki”

16. Tera ae e taekinna te abotoro Bauro ibukia tabeman kaain te ekaretia i Korinto?

¹⁶ E a tia te ekaretia ni Kristian ni buokiia aomata aika bati bwa a na kaitiakiia mani mwakuri aika bubuaka. Ngke e korea ana moan reta te abotoro Bauro nakoia kaain te ekaretia are i Korinto, e mwanewei bitaki ake a a tia ni karaoi Kristian ikekei ibukini kaboraoani maiuia ma ana kaetieti te Atua. Tabeman i buakoia bon taan wene ni bure, taan taromauri boua, taani wene ni kimoa, mwaane aika baka ni kan aine, mwaane aika wene ni bure ma raoia ni mwaane, taan iraa, taani mamanging, ao a a bati riki. Ma e tuangia Bauro ni kangai: “Kam a tia n tebokaki ni kaitiakaki.”​—Wareka 1 I-Korinto 6:9-11.

17. E kanga ni bitii maiuia aomata aika bati maiuakinan ana kaetieti te Baibara?

¹⁷ A bon aki atai booto n reirei ibukin te waaki ni kairiri aika manena aomata aika akea aia onimaki. A boni kairi aroia, ke a bae ni butimwaea te aroaro ae buakaka ae e karaoaki irouia kaain rarikia, n aron naba are a karaoia Kristian ake i Korinto rimoa imwain rikia bwa taan onimaki. (I-Ebeto 4:14) Ma te atatai ae eti ibukin Ana Taeka te Atua ao ana kantaninga nako, e mwaaka ni kona ni bitii maiuia aomata ni kabane nakon ae tamaroa riki ngkana a maiuakina ana reirei te Baibara. (I-Korote 3:5-10; I-Ebera 4:12) A mwaiti kaain te ekaretia ni Kristian ni boong aikai, ake a kona n taekinna bwa a boni maiuakin aroaro ni maiu aika aki riai imwain reiakinan ao maiuakinani kawain Iehova aika raraoi. Ma a bon aki rauaki ao n aki kukurei naba. A kunea te rau tii ngke a a moana reitakia ma ana aomata te Atua ao ni maiuakin ana boto n reirei te Baibara.

18. Tera ae e riki nakon te roro n rikirake temanna, ao tera ae kakoauaaki iai?

¹⁸ Ni kaitaraan anne, a a rangi n nanokawaki n aia motinnano tabeman ngkoa ake a rineia bwa a na kitana ‘te tabo ae rau’ ae te ekaretia ni Kristian. Temanna te tari te aine ae ti na aranna bwa Tanya, e kabwarabwaraa bwa e “kaikawaaki i nanon te koaua,” ao e kitana te ekaretia ibukin “uaiakinani baika a kakaraoaki irouia kaain te aonnaba ngke 16 ana ririki.” Ma i buakoni baike a riki nakoina, e rinanon te bikoukou ae aki kantaningaia ao kabwakaan natina. E taku: “I nanon tenua te ririki ake I kitana iai te ekaretia, ao e riki bwa rawawatan au iango ururingani baike a a tia n riki ao I aki kona ni mwanuokin. I teimatoa n raraoma n tiringan natiu are I kabwakaa. . . I kan tuangia rooro n rikirake ni kabane ake a ‘kan nora aron’ te aonnaba tii i nanon tabeua te tai bwa ‘a na bon aki.’ E kona n rangi ni kakukurei n te moantai, ma e na manga rangi ni kangaanga mwina. Akea aron te aonnaba aio, bwa bon tii te nanokawaki ae korakora iriana. I ataia, bwa I tia n rinanona. Tiku i nanon ana botaki Iehova! Bon tii aio te aroaro ni maiu ae kona ni karekea te kakukurei.”

19, 20. Tera te kamanomano ae e kona n reke n te ekaretia ni Kristian ao n te aro raa?

¹⁹ Iangoia bwa tera ae e na riki nakoim ngkana ko kitana te tabo ni kamanomano ae te ekaretia ni Kristian. A bati aika a uringi aroni maiuia ake akea uaaia imwaini butimwaean te koaua ao a a rawa n iaiangoi. (Ioane 6:68, 69) Ngkana ko bobotaki ma tarim ao mwanem aika Kristian, ko na teimatoa iai ni karekea te mweraoi ao ni kamanoaki man te nanokawaki ae korakora ao te kangaanga ae taabangaki ngkai n ana aonnaba Tatan. Ngkana ko bobotaki ma ngaiia ao ni katoatai n iriri bobotaki n te ekaretia, ane ko na kauringaki iai n taai nako taekan te rabakau are e reke man ana kaetieti Iehova aika raraoi ao ni kaungaaki iai bwa ko na maiuakin. A bati bukina ngkai ko ‘katituaraoa Iehova n te botaki ae abwabwaki’ n aron ae e karaoia te tia areru.​—Taian Areru 35:18, BG.

²⁰ Ni koauana, iai bukina aika kakaokoro ngkai a bane n rinanon te kangaanga Kristian n taai ake a taraa ni kangaanga iai kateimatoaan aia kakaonimaki. Tao a kainnanoa buokaia ni kaetani kawaia. Tera ae ko kona ni karaoia ngkoe, n ikotaki ma kaain te ekaretia ni buokiia raao n te onimaki n taai akanne? E na reiakinaki n te kaongora ae imwina aromi n ‘teimatoa ni kabebetei nanomi ao ni kateimatoaingkami’ ma tarimi.​—1 I-Tetaronike 5:11.

Ko na Kanga ni Kaeka?

• Tera reireiara ae reke mani baike a riki nakon te tia korea te Areru 73?

• Tera reireiara man te baere riki nakon Rina?

• E aera bwa ko kona ni karekea te mweraoi n te ekaretia ni Kristian?

[Taamnei n iteraniba 11]

Uaua n te tabo ae ko mano iai; ao tiku i nanon te ekaretia!