Iesu Kristo Raababan Rotakin Nanoia Aomata n Ana Rongorongo

“Ni koauana, te bwai ni kakoaua ae rangi n teimaan ibukin teuare e wanawana ae [Iesu] mai Kaberenaum, bon teimatoana ni kairi nanoia aomata ma aia iango n arona ae mwamwannano.”a​—TE TIA KOREA TE BOKI AE GREGG EASTERBROOK.

A MWAAKA taeka. Taeka ni wanawana aika rineaki raoi a kona n rotii naano, kairi iango ao ni bitii maiuia aomata. Akea te aomata ae rangi ni mwaaka riki ana taeka nakon Iesu Kristo. Rimwi riki e korea ae kangai temanna are e ongoraei ana taeka aika rangi n ataaki ngkai ake n ana Kabwarabwara i aon te Maunga: “Ngke a a bane ana taeka Iesu aikai, ao a a miroaroa te koraki n arona n angareirei.”​—Mataio 7:28.

A bati ana taeka Iesu aika rangi n ataaki ni karokoa boong aikai irouia aomata ni kabutaa te aonnaba. Iangoi katoto tabeua ni kaineti ma ana taeka aika rangi n nano nanoia.

“Kam aki kona ni kaai n toro iroun te Atua ao te Kaubwai.”​—Mataio 6:24.

Mangaia ae bwaai ni kabane aika kam tangiriia aomata bwa a na karaoi nakoimi, kam riai ni karaoi naba nakoia.”​—Mataio 7:12.

“Angan te Embera n Rom akana ana bwai te Embera n Rom, ao angan te Atua akana ana bwai te Atua.”​—Mataio 22:21.

“E kakukurei riki te anga nakon te anganaki.”​—Mwakuri 20:35.

Ma e bati riki ae karaoia Iesu nakon atongan taeka aika kai uringaki. E mwaaka te rongorongo are e tataekinna ibukina bwa e kaotiota te koaua ibukin te Atua, e reiakinia aomata aroni karekean te maiu ae manena raoi ao ni katerea raoi katokan rawawataia aomata nako man Ana Tautaeka n Uea te Atua. Ngkana ti nenera te rongorongo aei n iteraniba aika imwina, ti na nora iai bukin teimatoan Iesu ni kairi “nanoia ao aia iango n arona ni mwamwannanoia” aomata aika mirion ma mirion.

[Kabwarabwara ae nano]