A Rotaki Aromi N Tataro N Ana Taeka N Reirei Iesu?
“Ngke E a tia n atong taeka aikai Iesu, ao a mimi aomata n ana reirei.”—MATAIO 7:28.
1, 2. E aera ngke a mimi aomata aika bati ake a ikoikotaki n aron ana angareirei Iesu?
TI RIAI ni butimwaei ana taeka n reirei Natin te Atua ae ana rikitemanna ae Iesu Kristo ao ni maiuakin. Bon akea te aomata ae e a tia n taetae n aron aei. Ni koauana, a rangi ni mimi aomata n arona n angareirei n ana Kabwarabwara i aon te Maunga!—Wareka Mataio 7:28, 29.
2 E aki angareirei Natin Iehova n aroia taani koroboki ake a boto aia kakarabakau aika reeanau i aon aia reirei aomata aika aki kororaoi. E angareirei Kristo “n ai aron ae mwaka” ibukina bwa e tuatuangaki ana taeka iroun te Atua. (Ioane 12:50) Ngaia are ti na nori ana taeka n reirei Iesu riki tabeua n ana Kabwarabwara i aon te Maunga, ake a kona ao n riai naba n rooti arora n tataro.
Tai Tataro n Aroia Taani Mwamwanaa te Aba
3. Taekini baika a nanonaki raoi n ana taeka Iesu ake ni Mataio 6:5 ni kakimototoi.
3 E kakawaki te tataro bwa boni kanoan naba te taromauri ae koaua ao ti riai ni katoatai n tataro nakon Iehova. Ma a riai n rotaki arora n tataro n ana taeka n reirei Iesu ake n te Kabwarabwara i aon te Maunga. E taku: “Ngkana kam tataro, ao tai kakairi irouia taani mamana-te-aba: ba a kan tei ni maneaba ao i tutani kawai n tataro, ba a aonga n noraki irouia aomata. E koaua ae I a tuangngkami ba e a tia n reke i rouia booia.”—Mataio 6:5.
4-6. (a) E aera ngke a tangiria Baritaio bwa a na “tei ni maneaba ao i tutani kawai” n tataro? (b) A kanga taani mwamwanaa te aba akekei n “tia n reke i rouia booia”?
4 Ngkana a tataro taan rimwin Iesu, a riai n aki kakairi irouia “taani mamana-te-aba” ake Baritaio ake a kamoamoai raoiroiia ao ni kataia ni mwamwanaa te aba n aroia ni baka n taua te Aro i mataia aomata. (Mataio 23:13-32) A tangiria taani mwamwanaa te aba akanne bwa a na “tei ni maneaba ao i tutani kawai” n tataro. Bukin tera? Bwa a aonga n “noraki irouia aomata.” A taneiai I-Iutaia ake n te moan tienture n tataro ni botaki n te ekaretia n aia tai n angakarea aika kabuekaki n te tembora (tao te aoa ruaiwa n te ingabong ao te aoa tenua n te bwakantaai). A mwaiti taani maeka i Ierutarem aika a kaai n tataro ma taan taromauri aika bati n oon te tembora. A aki toki I-Iutaia aika a taua te Aro aikai n “tei ni maneaba” n tataro i tinanikun te kaawa anne uoua te tai n te bongina.—Kabotaua ma Ruka 18:11, 13.
5 Kioina ngkai angia aomata a aki uakaan ma te tembora ke te tinakoka ibukin tataro aika tibwa tia n taekinaki, tao a bae ngkanne n tataro n taabo nako ake a mena iai n aua n tataro aikai. Tabeman a baireia raoi bwa a na mena “i tutani kawai” n aua n tataro aikai. A tangiria bwa a na “noraki irouia aomata” ake a nakonako n tutani kawai akanne. A “kaananaui aia tataro ni kan noraki” taani mwamwanaa te aba ake a baka n taua te Aro bwa a aonga ni kamoamoaaki irouia ake a matakuakinia. (Ruka 20:47) Ti aki riai ni bwaina te aroaro anne.
6 E kaotia raoi Iesu bwa e a “tia n reke i rouia booia.” E korakora nanoia ni kani kinaaki ao ni kamoamoaaki irouia raoia n aomata ao bon tii anne ae kona n reke irouia. E a tia n reke irouia booia ae tii ngaia kaniwangaia bwa e na bon aki kaekai aia tataro aomata aika mwamwanaa te aba Iehova. N te itera are teuana, e na boni kaekai aia tataro taan rimwini Kristo ni koaua te Atua, n aron ae kaotaki n ana taeka Iesu ake imwina i aon te reirei aei.
7. Tera ae nanonaki n te reirei ae ti na tataro n ara “ru” i bon iroura?
7 “Ao ngkoe, ngkana ko tataro, ao ko na rin n am ru, ao ngkana ko a tia ni bonota am mataroa, ao ko na tataro nakon Tamam ae raba, ao E na anganiko am bwai Tamam ae nora ae raba.” (Mataio 6:6) E aki nanonaki n ana kaungaunga Iesu ae kaineti ma te tataro n te ruu i bon iroum imwini kainan te mataroa, bwa e a aki kona temanna n tataro ibukin te ekaretia. Ma te bwai ae nanonaki n te reirei aei, bwa e aki kaungaaki te tataro i mataia aomata n te aro are e na anaaki iai nanoia aomata bwa a na kamoamoaa are e tataro. Ti riai n ururinga aei ngkana ti anganaki te mwioko ae okoro bwa ti na tataro ibukia ana aomata te Atua i mataia aomata. Ti bia ongeaba nakon ana kaungaunga Iesu aika imwina riki ni kaineti ma te tataro.
8. Ni kaineti ma Mataio 6:7, tera te aro n tataro ae aki riai ae ti na rarawa iai?
8 “Ngkana kam tataro, ao tai barantiko n ai aroia Tientaire: ba a taku i nanoia ba e ongo te aba i rouia n aia taeka ngkae e bati.” (Mataio 6:7) Ma e a manga taekina te aro n tataro teuana ae aki riai Iesu ae boni kaokiokan taeka. E aki nanonna bwa ti na aki kaokioki ara bubutii aika nako mai nanora ao ara kakaitau n ara tataro. N te onnaroka are i Ketetemane n te tairiki are imwaini maten Iesu, ao e kaokioki naba ‘ana taeka’ n ana tataro.—Mareko 14:32-39.
9, 10. N te aro raa ae ti riai iai n aki kaokioki ara taeka n ara tataro?
9 Ti boni kairua ngkana ti katotonga aia tataro “Tientaire” ake a kaokioki mwanewen aia tataro. A “barantiko” n te aro are a a kaokioki taeka ake a kamatenanoi aika aki rangi ni kainnanoaki. Akea naba buokaia taan taromauria Baara ake a wewetea aran te atua ni kewe anne “man te ingabong ma ni katawanoua, ao a kangai; Baara, ko na kaekaira.” (1 Uea 18:26) A kabatiai aia taeka ma ni kaokioki aia tataro mirion ma mirion aomata ni boong aikai n te aro are e “na ongo te aba irouia,” ma bon akea uaan aia iango aei. Ma e buokira Iesu bwa ti na ataia ae n ana taratara Iehova, bon akea manen taekinan ‘taeka aika bati’ n tataro aika reeanau ao ni kaokiokaki. E a manga taku riki Iesu:
10 “Ma ngaia ae tai kakairi i rouia: ba E atai baika riai ba kam na anganaki Tamami, ngkana kam tuai ni butia.” (Mataio 6:8) A bati mataniwi n te aro n I-Iutaia ake a kabwararia ngkana a tataro ao n tokina ai titeboo aia tataro ma Tientaire. E kakawaki te tataro ae nako man te nano ae irianaki n taeka n nebonebo, te kakaitau ao te bubutii bwa boni kanoan naba te taromauri ni koaua. (I-Biribi 4:6) Ma ti boni kairua ngkana ti okioki n taekini bwaai tabeua i aan te kantaninga are ti riai ni kauringa iai te Atua baika ti kainnanoi. Ngkana ti tataro, ti riai n uringnga ae ti taetae nakon Teuare e ‘atai baika ti riai n anganaki ngkana ti tuai ni butiia.’
11. Tera ae ti riai n uringnga ngkana ti mwiokoaki bwa ti na tataro i mataia aomata?
11 E riai ni kauringira ana taeka n reirei Iesu ni kaineti ma tataro aika aki butimwaeaki, bwa e aki kukurei te Atua ni kamanenaan taeka aika e kangaanga te ota iai ao aika rangi ni bati aika aki manena. Ti riai naba n ataia bwa te tataro i mataia aomata bon tiaki te tai ibukin anaan nanoia ake a ongora, ke tao ti na kamimiia n reanaun ara tataro n te aro are a aikoa kakauongo nakoni baika taekinaki ma a a boni babareka atongan “Amene.” Ngkana ti kamanena te tataro bwa ara tai ni katanoatai bwaai tabeua ke ara tai n reireiia ake a ongora, e na bon aki boraoi ngkanne ma are e nanonaki n ana taeka n reirei Iesu ake n te Kabwarabwara i aon te Maunga.
E Reireinira Iesu Arora n Tataro
12. Ko na kanga ni kabwarabwaraa nanon te bubutii ae “e na tabuaki aram”?
12 E ngae ngke e kauring Iesu ibukin aki kamanenaan raoi te aro n tataro ae rine ao n okoro aei, ma e bon reireiia naba taan rimwina aroia n tataro. (Wareka Mataio 6:9-13.) Tiaki nanona bwa e na kamatenanoaki te tataro ni katoto bwa e aonga ni kaokiokaki n taekinaki. Ma n oneani mwin anne, e boni karaoaki bwa te banna ni katoto ibukin ara tataro. N te katoto, e moanibwaiaki te Atua iroun Iesu ni moan taeka ake iai ni kangai: “Tamara are i karawa, E na tabuaki aram.” (Mataio 6:9) Ti riai ni wetea Iehova bwa “Tamara” ibukina bwa boni ngaia ara tia Karikiriki ae maeka “i karawa,” ae rangi n raroa ma te aonnaba. (Te Tua-Kaua 32:6; 2 Rongorongo 6:21; Mwakuri 17:24, 28) Kamanenaan te taeka ae “Tamara” ae tei ibukin tamaia aomata aika bati, ti a riai ni kauringaki iai bwa e boni kaan naba aia iraorao ma te Atua raora n te onimaki. “E na tabuaki aram” bon te bubutii nakon Iehova bwa e na karaoa te bwai teuana ibukini katabuana, rinanoni kaitiakan arana mani kabuakakaana ni kabane, man itera aika rangi ni bati ni moa man te karitei are i Eten. Ni kaekaan te tataro anne, e na boni kamauna te buakaka Iehova mai aon te aba ao ni katabua i bon irouna.—Etekiera 36:23.
13. (a) E na kanga ni kakoroaki bukin te bubutii ae “e na roko ueam”? (b) Tera ae irekereke ma tauan ana taeka te Atua i aonnaba?
13 “E na roko ueam. E na tauaki am taeka i aonaba n ai aron tauana i karawa.” (Mataio 6:10) Ni kaineti ma te bubutii aei ae n te tataro ni katoto, ti riai n uringnga bwa te taeka ae “ueam” bon te tautaeka iroun te Mesia i karawa, ae mena mwiokona irouni Kristo ao te koraki ake a a tia ni kautaki “ake a itiaki” ake a raonna. (Taniera 7:13, 14, 18; Itaia 9:6, 7) Te tataro ibukin ‘rokona’ bon te bubutii bwa e na roko Ana Tautaeka n Uea te Atua ni kamaunaia taani karitei nakon ana kairiri te Atua. E na waekoa n riki anne bwa e nang katauraoaki iai te bwaretaiti ae katobibia te aonnaba are e mena iai te raoiroi, te rau ao te mweraoi. (Taian Areru 72:1-15; Taniera 2:44; 2 Betero 3:13) E a kaman tauaki ana taeka Iehova i karawa, ma te bubutii ibukin tauana naba i aon te aba ai bon te onnon nakon te Atua bwa e na kakoroi bukin ana kantaninga ibukin ara aonnaba. Ao e irekereke naba ma kamaunaia te koraki ake a karitei nakoina ni boong aikai n aron naba are e karaoia rimoa.—Wareka Taian Areru 83:1, 2, 13-18.
14. E aera ngkai ti riai ni bubutii “karara ae ti a tau iai n te bong aei”?
14 “Ko na anganira karara ae ti a tau iai n te bong aei.” (Mataio 6:11; Ruka 11:3) Ngkana ti taekina te bubutii aei n ara tataro, ti a butiia iai te Atua bwa e na anganira karara ae tau “n te bong aei.” E kaotaki n aei bwa ti onimakina Iehova bwa e kona n tabeakini baika ti kainnanoi ni katoa bong. Tiaki te tataro aei ibukin anganakira baika rangi ni bati. Te bubutii ibukini baika ti kainnanoi ni katoa bong, tao e na kauringira bwa e anga ngkoa ana kaetieti te Atua nakoia tibun Iteraera bwa a na rikoa te manna ae “tibangan te bong n te bong ae koraki.”—Te Otinako 16:4.
15. Kabwarabwaraa nanon te bubutii ae “kabara ara bure mai roura, n ai arora ngkai ti kabara aia bure akana bure nakoira.”
15 E kairii ara iango nakon te bwai ae ti riai ni karaoia n te bubutii are imwina ae n te tataro ni katoto. E taku Iesu: “Ko na kabara ara bure mai roura, n ai arora ngkai ti kabara aia bure akana bure nako ira.” (Mataio 6:12) Ti kona ni kantaningaa kabwaraan ara bure iroun Iehova tii ngkana ti a kaman “tia ni kabwarai aia bure” te koraki ake a bure nakoira. (Wareka Mataio 6:14, 15.) Ti riai n tauraoi ni kani kabwarai aia bure aomata nako.—I-Ebeto 4:32; I-Korote 3:13.
16. Ti na kanga n ota raoi ni bubutii ake a kaineti ma te kariri ao te kamaiuaki mairoun teuare buakaka?
16 “Ao tai taonira n te kaririaki, ma kawakinira mairoun Teuare e buakaka.” (Mataio 6:13, BK) Ti na kanga n ota raoi ni bubutii aika uoua aika kuri n titeboo nanoia aika n ana tataro ni katoto Iesu? Aio te bwai ae mataata iai: E aki karirira Iehova bwa ti na karaoa ae bure. (Wareka Iakobo 1:13.) Bon “te tia kariri” ni koaua Tatan are “Teuare e buakaka.” (Mataio 4:3) Ma e ngae n anne ao e taekinaki n te Baibara taekan te Atua bwa e karaoi baike e tii kariaia. (Ruta 1:20, 21; Te Minita 11:5) Ngaia are “tai taonira n te kaririaki” bon te bubutii nakon Iehova bwa e na aki kariaia bwakara ngkana ti kaririaki bwa ti na aki ongeaba irouna. Te kabanea n onnon ae “kawakinira mairoun Teuare e buakaka” bon te bubutii nakon Iehova bwa e na aki kariaia tokanikain Tatan i aora. Ao ti kona ni kakoauaa raoi bwa e na ‘aki kariaia te Atua bwa ti na kaririaki n ae riaon ara kona.’—Wareka 1 I-Korinto 10:13.
‘Teimatoa ni Bubutii, n Ukeuke ao ni Karebwerebwe’
17, 18. Tera ae nanonaki n te ‘teimatoa ni bubutii, n ukeuke ao ni karebwerebwe’?
17 E kaumakia raao n te onimaki te abotoro Bauro ni kangai: “Botumwaka n tataro.” (I-Rom 12:12) E anga te reirei ae matoatoa Iesu ae ai aron naba anne ngke e kangai: “Kam na bubuti, ao ane kam na anganaki; kam na ukeuke, ao ane e na reke i roumi; kam na karebwerebwe, ao ane e na kaukaki nako imi: ba ane bubuti ao e anganaki; ao ane ukeuke ao e reke i rouna; ao ane karebwerebwe ao e kaukaki nako ina.” (Mataio 7:7, 8) E bon riai te teimatoa ni “bubutii” bwaai ni kabane aika boraoi ma nanon te Atua. E korea ae kangai te abotoro Ioane ni kaineti ma ana taeka Iesu: “Aio onimakinana [te Atua] i roura, ba ngkana ti bubuti te bwai teuana n ai aron nanona, ao E bon ongo i roura.”—1 Ioane 5:14.
18 Te bwai ae nanonaki n ana reirei Iesu ibukin te ‘teimatoa ni bubutii ao n ukeuke’ bwa ti riai ni kakorakoraira n tataro ao n aki bwarannano e ngae ngkana e aki kaekaaki n te tai naba arei. Ti riai n teimatoa naba “ni karebwerebwe” bwa ti aonga ni kariaiakaki bwa ti na riki bwa kaain te Tautaeka n Uea ao ni karekei kakabwaiaara, buokara ao kaniwangara mai iai. Ma ti kona ni kakoauaa raoi bwa e na boni kaekai ara tataro te Atua? Eng, ti kona ngkana ti kakaonimaki nakon Iehova bwa e taku Kristo: “Ane bubuti ao e anganaki; ao ane ukeuke ao e reke i rouna; ao ane karebwerebwe ao e kaukaki nako ina.” A bati rongorongoni baika a a tia ni kaaitara ma ngaai ana toro Iehova aika kakoauaa bwa te Atua bon ‘te tia Ongo tataro.’—Taian Areru 65:2.
19, 20. N iangoan ana taeka Iesu ake ni Mataio 7:9-11, e kanga n riki Iehova bwa kaanga te tama ae tatangira?
19 E kabotaua te Atua Iesu ma te tama ae tatangira ae katauraoi baika raraoi ibukia natina. Iangoia bwa aongkoa ko mena i buakoia aomata ake a ongora n te Kabwarabwara i aon te Maunga ao ko ongo ana taeka ae kangai: “Antai te aomata i roumi, ae angan natina te atibu, ngkana tao e butia te berena? Ao ngkana tao e butia te ika, ao e anganna te naeta? Ao ngkai kam ata te angania natimi baika raraoi, ngkami akana kam buakaka, ao tiaki e maiti riki iroun Tamami are i karawa te kan anga baika raraoi nakoia akana butia?”—Mataio 7:9-11.
20 E ngae ngke e riai n atongaki te karo bwa e “buakaka” ibukin rikiana ae te bure, ma bon iai naba tangiraia natina irouna. E na bon aki kewea natina ma e na kekeiaki ni katauraoi “baika raraoi.” Kioina ngkai e arona aron te tama nakoira Tamara ae tatangira are i karawa, e a katauraoi ngkanne “baika raraoi,” n aron taamneina ae raoiroi. (Ruka 11:13) E kona ni kakorakoraira ni karaoi mwakuri ake e kukurei iai Iehova, ae te tia Katauraoi “angabwai aika raraoi ma bwaai n tituaraoi.”—Iakobo 1:17.
Teimatoa ni Karekei Kakabwaiam Man Ana Taeka n Reirei Iesu
21, 22. Tera te bwai ae riai n ataaki ibukin te Kabwarabwara i aon te Maunga, ao tera am namakin ni kaineti ma ana taeka n reirei Iesu?
21 Bon te kabwarabwara ae te kabanea ni kakawaki te Kabwarabwara i aon te Maunga ae e a tia ni karaoaki i aon te aba. E rangi ni kamimi ibukini baika e reiakin ni kaineti ma te Atua ao aroni kamataataia raoi. N aron ae oti man reirei aika a anaaki mani kaongora aikai teuana imwin teuana, ti kona ni karekei kakabwaiara aika bati ngkana ti maiuakin reirei aika n te kabwarabwara aei. A kona ni kanakoraoaki maiura ngkai n ana taeka n reirei Iesu aikai ao ti karekea naba iai kantaningaan taai aika kakukurei n taai aika imwaira.
22 Ni kaongora aikai ao ti a tia n neneri tii tabeua mai buakoni bwaai n taamnei aika a moani kakawaki n te Kabwarabwara i aon te Maunga are e karaoia Iesu. Maroaka are a a boni ‘mimi n ana reirei’ te koraki ake a ongora. (Mataio 7:28) Akea te nanououa bwa bon anne naba ae ti na namakinna ngkana ti kaonrakei ara iango ao nanora n ana taeka n reirei aika moani kakawaki te tia Reirei ae Kakannato ae Iesu Kristo.
Baikara Am Kaeka?
• Tera are e taekinna Iesu ni kaineti ma taian tataro aika mwamwanaa te aba?
• E aera ngkai ti riai n rarawa ni kaokioki ara taeka n ara tataro?
• Baikara bubutii ake n ana tataro ni katoto Iesu?
• Ti na kanga n ‘teimatoa ni bubutii, n ukeuke ao ni karebwerebwe’?
[Taamnei n iteraniba 20]
E kabuakakaia taani mwamwanaa te aba Iesu ake a tataro tii ibukini kan norakia ao ongoraeia aomata irouia
[Taamnei n iteraniba 22]
Ko ataia bwa e aera ngkai ti riai n tataro ibukini karara ni katoa bong?