Antai Aika A Maiuakin Ana Reirei Kristo ni Boong Aikai?
E A TAABANGAKI iangoan ae Iesu Kristo bon temanna mai buakoia aomata ake a kakannato riki ake a a tia ni maiu. A mwaiti aika iangoia bwa bon te aomata ae te kabanea ni kakannato. E a tia n rangi n rotaki maiuiia aomata n ana reirei i nanon ririki aika a a kani koro uangaa ngkai. Aikai bon “maiuia aomata aika mangori ake a karaoa ae raoiroi ma ni kaotiota te akoi, n ikotaki ma aomata ake a karaoi mwakuri n ibuobuoki aika rangi ni korakora ma n ataaki,” aikai ana taeka te tia koro-rongorongo ae te I-Engiran ae Melvyn Bragg.
Tera Aia Iango Aomata Ibukin te Aro ni Kristian?
Tera aia iango aomata ibukin te Aro ni Kristian? E kabwarabwaraki te Aro aei bwa “te rikirake ae te kabanea ni kakawaki ni kaineti ma te onimaki.” E kaota te iango teuana ni kaineti ma te Aro aei David Kelso man te Glasgow Caledonia University, i Tikaoteran: “Rongorongona i nanon uangaa te ririki, e onrake n taekan te rikirake ae akea kabotauana ni kaineti ma te korobanna, te aro ni kateitei, te rabakau ni karekeiango, te katangitang, ao te reitaki i marenaia aomata.”
Ma iai naba aomata aika mwaiti aika a kaokoro aia iango iai. Akea aia kangaanga ma te Aro ni Kristian, n aron kabwarabwarana n te rikitinare aei: “Te Aro ae boto i aon ana reirei Iesu Kristo ao kakoauan ae bon natin te Atua ngaia.” (Collins Cobuild) Ma a bon rawa nakon aroaro aika a kaotaki irouia botaki n Aro ake a taku bwa a tei ibukin te Aro ni Kristian.
N aron anne, te tia rabakau ni karekeiango n te ka-19 n tienture ae te I-Tiaman ae Friedrich Nietzsche, e kabwarabwaraa te Aro ni Kristian bwa “te waaki ae kamwaraea te botannaomata, ae akea tokina.” E korea naba taekan te Aro aei bwa bon “te waaki ae moanibaan te karuanikai, ae moan te kamwaraa . . . ae e kona naba ni kairiribai, ni babakanikawai, ni baka n raoiroi, ao ni karekekai, ngkana e kainnanoaki ibukin kanakoraoan ana waaki.” E koaua bwa e a rangi n riao ana iango Nietzsche, ma tabeman taani mataku aika wanawana a kuri n titeboo aia iango iai. Bukin tera? Ibukina bwa n taai ake rimoa ni karokoa ngkai, aroaroia te koraki ake a taku bwa Kristian ngaiia, e kanikinaeaki tiaki man aroaron Iesu Kristo, ma man taabangakin “te aroaro ni maiu ae aki riai, mwakuri n iowawa aika kakamaaku, ao kabuakakan te Atua.”
A Kaotiota Aroaron Kristo Aaro Aika A Taku Bwa A Kristian?
Mangaia are e eti ngkana ti titiraki ni kangai, “a kaotaki aroaron Kristo n Aaro aika a taku bwa Kristian ngaiia?” Tao a kona ni waekoa ni kaeka tabeman ni kangai: “E boni kaotaki iai!” “E aki ngkoa berita nakoia taan rimwina bwa e na memena irouia ‘ni karokoa tokin aonaba’?” (Mataio 28:20) Eng, e taekina anne Iesu. Ma te koaua bwa e nanonna bwa e na memena ma aomata ni kabane, aika a taku bwa taan rimwina, n aki ongea aroaron te aomata anne ae kaakaraoi?
Uringnga bwa ni menan Iesu i aon te aba, ao tabeman mataniwin Aaro a taku bwa akea bukina ae e na aki memena te Atua irouia n aki toki. Kioina ngkai e a tia te Atua n rinea Iteraera ibukin te mwioko ae okoro, a a iangoia ngkanne tabeman mataniwin Aaro bwa e aki kona ni kitania te Atua, n aki ongeia bwa tera ae a kaakaraoia. (Mika 3:11) Ma n tokina, ao e a rangi n riao aia karitei nakon ana tua te Atua ma ana kaetieti. Ibukin anne, e a taetae nakoia Iesu Kristo ni kangai: “Noria, e nang tiku maneabami i roumi ni maroaa.” (Mataio 23:38) E a kabuaa akoana iroun te Atua te waaki n Aro anne ni kabane. E kaakia te Atua ao e kariaia ana taanga ni buaka Rom bwa e na urua atun kaawana ae Ierutarem, ao temborana n 70 C.E.
E kona n riki aekan aei nakoia Aaro aika a taku bwa Kristian ngaiia? Ti na noria bwa baikara ana kaetieti Iesu aika irian ana berita, are e na memena irouia taan rimwina “ni karokoa tokin aonaba.”
[Taamnei n iteraniba 3]
A rotaki aomata aika mirion ma mirion mwaitiia ni katobibia te aonnaba, n ana reirei Iesu Kristo