A “Warekaki Iranatumi” Iroun Iehova

“E bon aki bwaka i aontano temanna [te tibaaro] n aikai ngkana e aki ataki iroun Tamami: ma a bane naba ni warekaki iranatumi.”​—MATAIO 10:29, 30.

1, 2. (a) Bukin tera ngke e namakinna Iobi bwa e a kitanaki iroun te Atua? (b) Te koaua bwa nanon ana bwaebwaeti Iobi, e a tia ni karaoa ae aki-riai nakon Iehova? Kabwarabwaraa.

“I WETEIKO, Atuau, ma ko aki kaekai; ao ngkana I tataro nakoim, ko aki kakauongo. Ko karaoa ae aki-riai nakoiu; ko bwainikirinai ni mwaakam.” Te aomata ane e taekin taeka akanne e rangi n rotaki n te maraki. Maroaka ae e a rangi n rotaki iai, bwa e a tia ni bua kaubwaina, a mate natina n te kabuanibwai ae karina, ao e a tabe n rikirake mamaaran rabwatana n aorakina ae kakaiaki. Aran te mwaane anne bon Iobi ao e koreaki rongorongon korakoran rawawatana n te Baibara ibukin reireiara.​—Iobi 30:20, 21, Today’s English Version.

² Man ana bwaebwaeti Iobi ao e kona n ae e teretere iai bwa e a tia ni karaoa ae aki-riai nakon te Atua, ma tiaki anne te bwai ae riki. E taetae Iobi man korakoran rawawatan nanona. (Iobi 6:2, 3) E aki ataia bwa Tatan ae karika kataakina, mangaia are e a kairua n iangoia bwa e a tia ni kitanna te Atua. N te tai teuana ao e kangai naba Iobi nakon Iehova: “Ko aera ngkai Ko karaba matam nako iu, ma n atongai ba te tia ribaiko?”a​—Iobi 13:24.

3. Tera ae e kona n rio n ara iango ngkana ti taonaki n te rawawata?

³ Ni boong aikai, a mwaiti ana aomata Iehova aika teimatoa ni karawawataki ni kangaanga, ngkana a rinanon kataaki aika riki imwin te buaka, waaki n tautaeka ke bitaki aika korakora ake a karekea te kangaanga ae bati, kabuanibwai aika riki i bon irouia, te kara, te aoraki, korakoran te maiu-ni-kainnano, katokan aia mwakuri n uarongorongo iroun te tautaeka. Ko bae naba n rinanon kataaki n aron akanne ke aeka ni kataaki tabeua riki. N tabetai tao ko kona n iangoia bwa e a karabaa matana Iehova mairoum, ma ko riai n atai taeka ake a kangai n Ioane 3:16: “E tangiriia aomata te Atua n te aro are E anga Natina ae te riki-temanna iai.” Ma ngkana ko teimatoa ni karawawataki n akea kabebeteam ae reke, tao ko kona n iangoa aei: ‘E bon tangirai raoi te Atua? E nora te bwai ae I rinanona ngkai? E bon tabeakinai?’

4. Tera te bwai ae teimatoa rikina are e riai n nanomwaaka ribuakona Bauro, ao baikara aanga ake a na rotaki iai maiura?

⁴ Iangoa are e riki nakon te abotoro Bauro. E korea ae kangai: “I anganaki te bwai ni kateketeke n irikou, are ana anera Tatan ba e na oreai.” E a manga kangai riki: “I katenua au butiia te Uea i bukin te baei ba e na nako mai rou.” E ongo ana bubutii Iehova. Ma e ngae n anne, e kaotia nakon Bauro bwa e na aki katoka ana kangaanga anne. N onean mwin anne, e riai Bauro n onimakina mwaakan te Atua, bwa e na buokia n nanomwaaka ribuakon ‘te kateketeke n irikona.’b (2 I-Korinto 12:7-9) N aron Bauro, ko kona naba n rinanon te kataaki ae teimatoa rikina. Tao ko kona n iangoa aei: ‘Ngkana e taraa n akea te bwai ae karaoia Iehova ni kaineti ma kataakiu, e nanonaki iai bwa e aki ataa te bwai ae I rinanona ke e aki tabeakinai?’ Kaekana bon tiaki ngaia anne! Korakoran nanon Iehova n tabeakinia ana toro aika kakaonimaki, e teretere n te bwai are e tua Iesu nakoia ana abotoro teutana te tai imwin rineakiia. Ti na nora aron ana taeka ni kona ni kaungaira ni boong aikai.

“Tai Maku”​—Bukin Tera?

5, 6. (a) E kanga Iesu ni buokiia ana abotoro bwa a na aki maaka te bwai are a nang kaitaraa? (b) E kanga Bauro ni kaota onimakinan are e bon tabeakinna Iehova?

⁵ A karekea korakoraia ae raka abotoro mairoun Iesu, n ikotaki naba ma “te mwaka i aoia tamnei aika kamwara ba a na kanakoia, ao a na katoki aoraki ni kabane ma mamara ni kabane.” Ma e aki nanonaki n aia mwakuri anne, bwa a nang aki boo iai ma kataaki ao kangaanga. Ni kaitaraan anne, e kabwarabwaraa raoi Iesu bwa baikara bwaai tabeua ake a na rotaki iai. Mangaia are e kaumakiia ni kangai: “Tai makuia akana kamatea te rabata, ma a aki kona ni kamatea te tamnei: ma kam na maka teuare kona ni kamatea te tamnei ma te rabata i Keenna.”​—Mataio 10:1, 16-22, 28.

⁶ E taekin riki kabotau aika uoua Iesu, ibukin buokaia ana abotoro bwa a na ota bwa bukin tera ngkai a aki riai ni maaku. E taku nakoia: “Tiaki a kaboaki uoman te tibaaro n te aba-bene? Ao e bon aki bwaka i aontano temanna n aikai ngkana e aki ataki iroun Tamami: ma a bane naba ni warekaki iranatumi. Ma ngaia ae kam na tai maku; ba kam bongana riki nakoia tibaaro aika bati.” (Mataio 10:29-31) Noria bwa e kairekerekea ikai te aki-mamaaku Iesu ni kaitaraan te kairiribai, ma onimakinan raoi ae e bon tabeakinira Iehova n tatabemanira nako. E teretere bwa iai iroun Bauro te aeka n nano anne. E korea ae kangai: “Ngkana tao E tauu bukira te Atua, ao ai antai ae kona n ekira nako? Teuare aki taua ae bon Natina, ma E anga i bukira ni kabaneira, ao E na iranna n aki anganira bwaai n akoi ni kabane ma Ngaia?” (I-Rom 8:31, 32) N aki ongei kataaki ake ko kaaitara ma ngaai, ma ko kona naba ni kakoauaa raoi bwa e bon tabeakiniko Iehova, ngkana ko teimatoa ni kakaonimaki nakoina. E na teretere riki aei ngkana ti nenera raoi ana kaungaunga Iesu nakoia ana abotoro.

Kakawakin te Tibaaro

7, 8. (a) Tera aron iangoakin tibaaro n ana bong Iesu? (b) Bukin tera bwa Mataio 10:29 e kabongana te taetae n Erene ae katereterea uangingin te “tibaaro”?

⁷ Ana taeka ni kabotau Iesu, a kabwarabwaraa raoi aron ana mwamwannano Iehova ibukia Ana toro n tatabemania nako. Iangoa moa taekaia taian tibaaro. A kakanaki tibaaro n ana bong Iesu, ma ibukina bwa a kona n urubwai nakon kaai-n-amwarake, a rangi n iangoaki ngkanne bwa maan aika urubwai. A rangi ni bati tibaaro ao a boraoi n te aro are a kona ni kabooaki uoman n te mwaiti ae titeboo ma tao nimaua te tianti. Uoua te tai okiokin te mwaiti anne ae e kona ni kabooaki iai tiaki aman te tibaaro ma bon niman, bwa e ikotaki temanna nakon are aman bwa kanga akea boona!​—Ruka 12:6.

⁸ Iangoa naba abwakin te mannikiba aei. Ngkana e kabotauaki ma mannikiba riki tabeua, ao te tibaaro ae e a toki ikawaina e bon uarereke naba abwakina. Ma e ngae n anne, te taeka n Erene ae rairaki bwa “tibaaro” ni Mataio 10:29, e bon nanoni tibaaro aika uarereke. E teretere iai bwa e bon tangiriia ana abotoro Iesu bwa a na iangoa te mannikiba ae moan te mangori. E taekinaki aei n te boki teuana: “E taekina te mannikiba ae moan te uarereke Iesu ao e kabongana te taeka ae katereterea uangingina!”

9. Tera te reirei ae moan te kakawaki are e taekinna Iesu n ana kabotau ibukia tibaaro?

⁹ E kangai te reirei ae moan te kakawaki n ana kabotau Iesu ibukia tibaaro: Te bwai ae e taraa n akea bongana irouia aomata, bon te bwai ae kakawaki iroun Iehova ae te Atua. E a manga katereterea riki te koaua aei Iesu rinanon taekinan, ae te tibaaro ae uarereke e na “aki bwaka i aontano” n akea ataakina iroun Iehova.c E teretere iai te reirei ae ngkana e ataa aron te mannikiba ae moan te uarereke ao ae moan te mangori Iehova ae te Atua, e na mwaiti ra riki ngkanne tabeakinan aron te aomata are e toro irouna!

10. Tera kakawakin te kibuntaeka ae: “A bane naba ni warekaki iranatumi”?

¹⁰ E taku riki Iesu irarikin ana kabotau ibukia tibaaro: “A bane naba ni warekaki iranatumi.” (Mataio 10:30) Te kibuntaeka ae kimototo ma n nano aei, e katereterea ana kabotau Iesu ibukia tibaaro. Iangoa aei: Mwaitin iraia aomata e nakon 100,000. N angiin te tai, teuana te burae n ira, e bon titeboo ma are teuana, ao akea te ira teuana ae ti katuuaa ara iango iai. Ma a noraki ni kabane irara ao a warekaki iroun Iehova ae te Atua. Ibukin aei, iai riki rongorongon maiura ae e aki ataia Iehova? Ni koauana e ataa aron karaoaia ana toro n tatabemania nako. E bon “tarataraa te nano Iehova.”​—1 Tamuera 16:7.

11. E kanga Tawita ni kabwarabwaraa onimakinan are e bon tabeakinna Iehova?

¹¹ Tawita are e a ngae i nanon te kataaki, e onimakinna bwa e bon noraki arona iroun Iehova. E korea ae kangai: “Iehova, Ko tirotiroai, ao Ko ataai. Ko ata tekatekau ma teirakeu, Ko ata nanou mai kiraroa.” (Taian Areru 139:1, 2) Ko kona naba ni kakoauaa raoi bwa e ataa arom Iehova. (Ieremia 17:10) Tai waekoa ni motikia bwa ko a aki tau n noraki ni matan Iehova ae nori bwaai nako!

“Kaki Rannimatau i Nanon Am Batoro”

12. Ti kanga n ataia bwa e atai raoi taiani karawawataki Iehova ake a rotaki iai ana aomata?

¹² E aki tii atai aroia ana toro n tatabemania nako Iehova, ma e bon atai raoi karawawata ake a rotaki buaka iai n tatabemania nako. N te katoto, ngke a karawawataki tibun Iteraera n tautoronakiia, ao e taku Iehova nakon Mote: “I bon nori rawawataia au aomata ake a mena i Aikubita, ao I ongo tangia i bukiia tan teinia; ba I atai raraomaia.” (Te Otinako 3:7) Ai karaunano ra ataakin ae ngkana ti nanomwaaka i aan taiani kataaki, ao e nora te bwai ae riki nakoira Iehova ma n ongo tangira! E bon tabeakinira n tain rawawatara.

13. Tera ae e kaotia bwa Iehova e bon tabeakinia raoi ana toro?

¹³ Ana mwamwannano Iehova ibukia te koraki ake a a tia ni karekea te iraorao ma ngaia, e noraki riki n ana namakin ibukia tibun Iteraera. E ngae ngke a rotaki buaka ibukin rawaia ni kairaki, ma e korea ae kangai Itaia ni kaineti ma Iehova: “N taai ake a karawawataki iai ao e rawawata naba iai.” (Itaia 63:9, NW) Kioina ngkai ngkoe temanna ana toro Iehova ae kakaonimaki, ko kona ni kakoauaa raoi bwa ngkana ko maraki ao e maraki naba Iehova. Tiaki te koaua bwa e kairiko anne bwa ko na kaitaraa kataakim n aki maaku, ao n teimatoa ni karaoa am kabanea n raoiroi ni beku irouna?​—1 Betero 5:6, 7.

14. Baikara aroaro ake a kaira oteakin te Areru 56?

¹⁴ Nanomatoan te Uea are Tawita ni kakoauaa are e tabeakinaki iroun Iehova ao e kammarakaki naba ngke e maraki, e kaotaki raoi n te Areru 56, are e oteia Tawita ngke e karabarabaa man tiringana iroun te Uea are Tauro. E biri nako Kate Tawita, ma e maaka tauakina ngke e a kinaaki irouia I-Biritia. E korea ae kangai: “A kan ongai taan ribaai ni kabongnga: Ba a bati akana buakanai ma te kainikatonga.” Ibukin karuanikain aei ao e a tataro nakon Iehova. E taku: “A kabaoa au taeka ni kabongnga: A bane nanoia ni kani karekea kaiu.”​—Taian Areru 56:2, 5.

15. (a) Tera ae e nanonna Tawita ngke e butiia Iehova bwa e na kawakina rannimatana n te bwatoro ke n te boki? (b) Ngkana e kataaki ara onimaki, tera ae ti kona ni koaua raoi iai?

¹⁵ N aron ae e koreaki n Taian Areru 56:8, ao e korei taeka aika kakannongora aikai Tawita: “Ko wareki tiotiou nako: Ko na kaki rannimatau i nanon am batoro; Tiaki a mena i nanon am boki?” Ai ringaki ra nanora ni kabwarabwaran ana mwamwannano Iehova! Ngkana ti taonaki n te korakai, ti kona n tang nakon Iehova ma rannimatara. E karaoa naba anne te aomata ae kororaoi are Iesu. (Ebera 5:7) E kakoauaa raoi Tawita bwa e tarataraki iroun Iehova ao e na uringa korakain nanona, kanga ai aron kawakinan rannimatana n te bwatoro ke koreakin taekana n te boki.d Tao ko namakinna naba bwa e na kan on te bwatoro n rannimatam ke ni kaon iteraniba aika bati n te boki. Ngkana anne ae riki, ao kabebetea nanom. E karau nanora te Baibara ni kangai: “E a kaan Iehova ma akana a uruaki nanoia. Ao E kamaiuia akana a raraoma tamneiia.”​—Taian Areru 34:18.

Riki Bwa Raon te Atua

16, 17. (a) Ti kanga n ataia bwa e tabeakin kangaanga Iehova ake a kaaitara ma ngaai ana aomata? (b) Tera are e a tia ni karaoia Iehova bwa a aonga ni karekea te iraorao ae kaan aomata ma ngaia?

¹⁶ Ataakin are e a tia Iehova ni wareki ‘irannatura,’ e karekei ara iango tabeua ibukin aroaron te Atua n tarataraira raoi ma n tabeakinira, are ngaia ae ti a kakabwaiaki n taromauria. E ngae ngke ti na tataninga ni karokoa rokon te aonnaba ae boou are beritanaki ike e nang mauna iai te maraki ao te karawawataki, ma e karaoa te bwai ae kamimi Iehova ibukia ana aomata n te tai aei. E korea ae kangai Tawita: “E mena nanon Iehova ae raba irouia akana makua; Ao ane E na kaota ana berita nako ia.”​—Taian Areru 25:14.

¹⁷ “Nanon Iehova ae raba.” Eng, te iango are e kona n ataaki nanon Iehova ae raba, e taraa ni kangaanga rekena irouia aomata aika aki-kororaoi! Ma e kaoia te koraki ake a maakua Iehova, bwa a na riki bwa ana iruwa n umwana. (Taian Areru 15:1-5) Ao tera ae e karaoia Iehova ibukia ana iruwa? E kairiia bwa a na ataa ana berita, n aron are e taekinna Tawita. E onimakinia burabeti ma ni kaota “nanona ae raba” nakoia bwa a aonga n ataa ana kaantaninga ao tera are a riai ni karaoia, bwa a aonga ni kaboraoi maiuiia ma nanona.​—Amota 3:7.

18. Ti kanga n ataia bwa e tangirira Iehova bwa ti na karekea ara iraorao ae kaan ma ngaia?

¹⁸ E koaua bwa e kakukurei ataakin ae ngaira aika aomata aika aki-kororaoi, ti kona n riki bwa raoraon teuare Moan te Rietata ae Iehova ae te Atua. Ni koauana, e boni kaumakira bwa ti na karaoa anne. E taku te Baibara: “Kam na kaania te Atua, ao ane E na kaaningkami.” (Iakobo 4:8) E tangirira Iehova bwa e na kaan ara iraorao ma ngaia. Ni koauana, e a tia ni kamani karaoi bwaai ake a na kona ni kabebetea aron karekean ara iraorao ae kaan. Ana karea ni kaboomwi Iesu, e kauka te mataroa nakoira bwa ti aonga ni karekea te iraorao ae kaan ma Atuara ae Moan te Mwaaka. E taku te Baibara: “Ti tangiria, ba E tangirira moa.”​—1 Ioane 4:19.

19. E a kanga te nanomwaaka ni karaoiroa riki ara iraorao ma Iehova?

¹⁹ E a kanakoraoaki riki te iraorao ane kaan anne, ngkana ti nanomwaaka i aan aroaro aika karawawata. E korea ae kangai te tia rimwin Iesu are Iakobo: “E na katia raoi ana makuri te nanomwaka, ba kam aonga ni moaniba n raoiroi, ma ni koro raoi, n aki kai nanomi n te bwai teuana.” (Iakobo 1:4) Te “makuri” ra ae e kakoroaki bukina rinanon te nanomwaaka i aan kangaanga? Uringa ‘te bwai ni kateketeke n irikon’ Bauro. Tera are e kakoroaki bukina n nanomwaakana? E taku Bauro ibukin kataakina: “Ma ngaia ae moan te kukurei ngai ni kamoamoaai ni mamarau, ba e aonga ni memena mwakani Kristo i aou. Ma ngaia ae I kukurei n taiani mamara, ma taian taetaebuakaki, ma taiani kai n nano, ma taiani bainikirinaki, ma taiani maraki, i bukini Kristo: ba ngkana I mamara, ao I a korakora iai.” (2 I-Korinto 12:9, 10) Te bwai are e riki nakon Bauro, e na anganaki te korakora are e kainnanoia iroun Iehova, ae taekan “te mwaka ae moan te korakora” ngkana e riai karekeana, bwa e aonga ni kona n nanomwaaka. Ibukin anne ao e a kaan riki ma Kristo ao Iehova ae te Atua.​—2 I-Korinto 4:7; I-Biribi 4:11-13.

20. Ti kanga ni kakoauaa raoi, ae e na boutokaira Iehova ao ni kabebeteira ngkana ti rinanon te kataaki?

²⁰ Tao e a tia Iehova ni kariaia bwa e na waaki nako kataakim. Ngkana ngaia anne, ao uringa ana berita nakoia te koraki ake a maakua: “I bon aki kakiko, ao I bon aki kitaniko.” (Ebera 13:5) Kam kona n namakina te boutoka ao te kabebeteaki anne. E a tia Iehova ni wareki “irannatumi.” E nori nanomwaakami ao E namakina marakimi. E tabeakiningkami raoi. Ao e na bon aki “manuoki ami makuri ma ami tangira are kam kaotia nakon arana.”​—Ebera 6:10.

[Kabwarabwara ae nano]

Ko Uringnga?

• Baikara bwaai ake a kona ni kaira te aomata bwa e na namakinna bwa e a kitanaki iroun te Atua?

• Tera reireiara man ana kabotau Iesu ibukia tibaaro ao warekan iran atura?

• Tera ae e nanonaki ni kawakinan rannimatan te aomata n ana “batoro” Iehova ke n ana “boki”?

• Ti na kanga ni karekea ataakin “nanon Iehova ae raba”?

[Taamnei n iteraniba 24]

E aera Iehova ngke e aki kanakoa ‘te kateketeke n irikon’ Bauro?

[Taamnei n iteraniba 25]

Tera reireiara man ana kabotau Iesu ibukia tibaaro?

[Te Kabwarabwaraan te Taamnei]

© J. Heidecker/VIREO

[Taamnei n iteraniba 27]

Warekan te Baibara ni katoatai, e kona ni karau nanora ma n tuangira bwa e bon tabeakinira te Atua n tatabemanira nako