“Kam Aki Kaboa are Kam Anganaki, Anga Naba n Aki Kaboaki”

“KAM aki kaboa are kam anganaki, anga naba n aki kaboaki.” (Mataio 10:8, BK) E taekina te kaetieti anne Iesu nakoia ana abotoro ngke e kanakoia bwa a na tataekina te rongorongo ae raoiroi. A ongeaba n te kaetieti aei abotoro? Eng a kakorakoraia ni karaoia, e ngae naba ngke e a nako man te aonnaba Iesu.

N aron anne, ngke e nora te kakai te tia tabunea rimoa ae Timon bwa e karaoaki irouia abotoro aika Betero ao Ioane, e tua bwa e na kabooia ngkana a anganna te mwaaka arei. Ma e takuaki Timon iroun Betero ni kangai: “Ko na maraia, ngkoe ma am mane, ngkana ko taku ba e kona ni kaboaki ana karea te Atua n te mane.”​—Mwakuri 8:18-​20, BK.

E iorooro anuan te abotoro Bauro ma katein Betero. E kona ni kariaia Bauro bwa a na karawawataki tarina ni Kristian n aia kataumwane ibukina i Korinto. Ma e aki bwa e mwakuri ni baina i bon ibukina. (Mwakuri 18:1-3) Mangaia are e kona n taekinna bwa e bon tataekina te rongorongo ae raoiroi nakoia I-Korinto “n aki kaboaki.”​—1 I-Korinto 4:12; 9:18, BK.

E kananokawaki bwa a bati ake a kan riki bwa taan rimwin Kristo aika a kaota te nano ni kani “kaboaki.” A bati mataniwin Aaro ake aongkoa Kristian ngaiia aika a “rereirei . . . ibukini boon aia makuri.” (Mika 3:11) Tabeman mataniwin Aaro, a a kaubwai man te mwane are e rikoaki mairouia aia nanai. N 1989, ao temanna mataniwin te Aro i Amerika, e kabureaki i nanon 45 te ririki. Tera bukin kabureana? E a tia n “aonikaiia kaain ana Aro n aia mwane ae mwaitina mirion ma mirion te taraa, ao e kabongana tabeua man te mwane arei ni kabooi iai mweenga, kaa, ao e mwamwananga naba iai ibukin ana motirawa, ma ni kabooa naba ana auti ana kamea ae iai bwain kamwaitorona.”​—People’s Daily Graphic, Okitobwa 7, 1989.

I Ghana, n aron ae taekinaki n te beeba ni kaongora ae te Ghanaian Times ae bwain Maati 31 1990, ao e taekinaki iai bwa e anaa te mwane te Berebitero temanna n te Aro ni Katorika i Rom ae e a tia n rikorikoaki, ao e karenakoa ni kareia kaain te ekaretia iai n tain te taromauri. E taku te beeba aei: “E karaoa anne ibukina bwa a riai ni karekea te bwaintangira ae bati riki nakon arei, kioina ngke a a bon ikawai.” Maroaka ae Aaro aika bati, a a karikirakea te nano ni kani bwaibwai irouia aia aomata ke i nanoia, ngkai a boutokai waaki n takaakaroakina te mwane ao karikirake riki tabeua.

Ni kaitaraan anne, Ana tia Kakoaua Iehova a kataia ni katotonga Iesu ao taan rimwina rimoa. Akea aia mataniwi aika a kakabooaki. Iai tabeia taani Kakoaua n tatabemania nako bwa minita aika tataekina “euangkerion uean te Atua” nakoia aomata. (Mataio 24:14) E raka i aon onoua te mirion mwaitiia ni katobibia te aonnaba ngkai ake a bekuakina uotakin te “ran ni kamaiu” ae akea boona nakoia aomata. (Te Kaotioti 22:17) N te aro aei ao a kona naba ni kakabwaia n te rongorongo man te Baibara te koraki ake ‘akea aia mwane.’ (Itaia 55:1) E ngae ngke e buti aia waaki ni katobibia te aonnaba n te bwaintangira, ma a aki kona ni bubutii te mwane. Kioina ngkai bon ana minita ni koaua te Atua ngaiia, “a aki karekemwane n ana taeka te Atua,” ma a taetae man “te nano ae itiaki, ao iroun te Atua.”​—2 I-Korinto 2:17, NW.

Bukin tera ngkai a rangi n tauraoi ni buokiia aomata Ana tia Kakoaua Iehova, ni karaoa aia ibuobuoki n oin aia kabanemwane? Tera ae kaira nanoia bwa a na karaoia? Nanona ngkai a anga ao a aki kabooaki, a na kabanea korakoraia ao akea kaniwangaia iai?

Kaekaan Ana Kabuakaka Tatan

A kairaki Kristian ni koaua ni boong aikai bwa a na beku ibukin kakukureian Iehova, ma tiaki ibukin karekean kaubwaia. Mangaia are a kona ni kaekaa ana kabuakaka Tatan te Riaboro are e abokia ngkoa n tienture aika nako. Ni kaineti ma te aomata ae raoiroi ae Iobi, ao e kabuakakaa Iehova Tatan ngke e tabeka ana titiraki ae kangai: “E mamaka te Atua Iobi n aki kani kaboaki ke e aki?” E bukina Iobi Tatan bwa e beku iroun te Atua ibukin kaakamanoana irouna. E taku Tatan bwa e na bon taetaebuakaa te Atua Iobi ngkana e anaaki kaubwaina!​—Iobi 1:7-​11.

Ni kaekaan te kabuakaka aei, e kariaia te Atua bwa e na kataaki Iobi iroun Tatan ngke e kangai: “Ko kona n taua arom n ana bai ni kabane.” (Iobi 1:12, BK) Tera mwina? E kakoauaki iroun Iobi bwa e boni kewe Tatan. E aki ongea kataakina Iobi ae bati ma e bon teimatoa naba ni kakaonimaki. E taku: “N na aki kaki au raoiroi mai rou ni karoko mateu.”​—Iobi 27:5, 6.

Taan taromauri ni koaua ni boong aikai a kaotiota naba te aeka ni maiu are iroun Iobi. A aki beku iroun te Atua ibukina bwa a mataiakina te kaubwai.

Ana Bwaintangira te Atua ae te Akoi ae Aki Kaantaningaki

Teuana te bwai ae a karaoa iai te “anga naba n aki kaboaki” Kristian ni koaua, bwa a a “aki kaboa are . . . anganaki” mairoun te Atua. A tautoronaki i aan te bure ao te mate aomata ibukin ana bure ara bakatibu are Atam. (I-Rom 5:12) E tatangira Iehova n ana babaire ae kariaia bwa e na mate Natina bwa te karea, ae te bwai ae rangi n rotaki iai te Atua. Bon tiaki te bwai ae kona ni kaantaningaki bwa e riai ni karaoaki ibukia aomata, ma bon te bwaintangira te baei mairoun te Atua.​—I-Rom 4:4; 5:8; 6:23.

N aron ae koreaki n I-Rom 3:23, 24 (BK), ao e tuangia Kristian ake a kabiraki Bauro ni kangai: “A bane ni bure ao a raroa ma te Atua ae e mimitong. A riki n raoiroi i matan te Atua n ana akoi ae akea boona, kioina ba a kamaiuaki irouni Iesu Kristo.” Te koraki ake a kaantaningaa te maeka i aon te aba n aki toki, a na boni karekea te bwaintangira ae te “akoi ae akea boona.” E reitaki naba te bwaintangira aei n te kakabwaia ae atongakim bwa ko raoiroi ao ko a riki bwa raoraon Iehova.​—Iakobo 2:23; Te Kaotioti 7:14.

A kona naba n riki Kristian ni kabane bwa minita iroun te Atua, n ana karea ni kaboomwi Kristo. E korea ae kangai te abotoro Bauro: “I a riki ngai ba te tia kabuta te Euangkerio [ibukin ana bwai te Atua ae raba], n te karea are e anganai te Atua n ana akoi.” (I-Ebeto 3:4-7, BK) Kioina ngkai weteaia nakon te mwakuri ni minita e boto i aon te bwai n tituaraoi are a aki tau n anganaki, ao e aki kona ni kabooaki irouia, minita ni koaua aikai a aki tangira kabooakia n te mwane ngkana a a manga tataekina rongorongon te bwai n tituaraoi aei nakoia aomata.

Ko Mataaiakina te Kabwaia Ngkana Ko Kakaantaninga Reken te Maiu n Aki Toki?

E nanonaki n aei bwa e tangiriia Kristian te Atua bwa a na beku irouna n aki kaantaninga kaniwangaia? Tiaki ngaia anne, bwa e tuangia raona n onimaki te abotoro Bauro ni kangai: “E aki ribuaka te Atua ni manuoki ami makuri ma ami tangira are kam kaotia nakon arana.” (Ebera 6:10) E bon aki babakanikawai Iehova. (Te Tua-Kaua 32:4) Ni kaitaraan anne, Iehova “bon te tia kabo aia onimaki akana kakorakoraia n ukoukoria.” (Ebera 11:6) Ma tiaki te koaua bwa te berita ibukin te maiu n te Baretaiti e boboto i aon kani karekean kabwaiam n te itera n rabwata?​—Ruka 23:43.

Bon tiaki. Bwa teuana bukina bwa tangiran te kani maiu n aki toki n te Baretaiti n te aonnaba, e bon nako mairoun te Atua. Boni ngaia ae karina te iango aei irouia ara moan aomata. (Karikani Bwaai 1:28; 2:15-​17) Boni ngaia naba ae e na manga kaoka te kaantaninga aei kioina ngkai a a kabuaa Atam ma Nei Ewa mairouia aia kariki. E beritanna te Atua n ana Taeka bwa “a na kanakoaki naba aika karikaki man te toronaki ni mate nako nanon te kainaaomataki are ana bwai neboakiia natin te Atua.” (I-Rom 8:21) E bon riai ngkanne irouia Kristian ni boong aikai, bwa a na katotonga naba Mote ae e “iangoa te kaniwanga are e na reke irouna.” (Ebera 11:26, BK) E aki anga te kaniwanga aei te Atua bwa e na kamaraato iai. Ma e anga ma nanona ae tatangira ni koaua nakoia te koraki ake a beku irouna. (2 I-Tetaronike 2:16, 17) Ao ibukin anne, “ti tangiria, ba E tangirira moa.”​—1 Ioane 4:19.

Te Nano ni Koaua Ibukin te Beku Iroun te Atua

A riai n tuoa raoi nanoia ni kani beku iroun te Atua Kristian ni boong aikai. Ti wareka taekan karaoan te kakai iroun Iesu ni kaamwarakeaia aomata aika nimaua te ngaa mwaitiia n Ioane 6:10-​13. Imwina, ao tabeman a a moanna n ririmwin Iesu ibukin nanoia ni kani kabwaia n te itera n rabwata. Ma ngaia are e a tuangia Iesu ni kangai: “Kam ukoukorai ba kioina ngke kam kangi berena, ao kam ngae.” (Ioane 6:26) Tao 30 te ririki imwina ao a karaoa naba aekakin anne Kristian tabeman ake a a tia ni katabui maiuia bwa a na beku iroun te Atua, ma “tiaki i bukin te nano ae e raoiroi.” (I-Biribi 1:17, BK) Tabeman ake a “aki iri nanon ana taeka ara Uea ae Iesu Kristo” a a manga kakaaei aanga ake a na karekei kaubwaia iai man aia iraorao ma Kristian.​—1 Timoteo 6:3-5, BK.

Ni boong aikai ao te Kristian are e beku tii ibukin kani karekean te maiu are aki toki irouna n te Baretaiti, e kona naba ni beku ibukin kani kakabwaiaana n te itera n rabwata. N tokina, ao e kona ni bwaka iai n te itera n taamnei. E kona n rangi n taraa n ananau ana waaki Tatan n te aonnaba aei are e nang kona ni ‘bara nanona’ iai n namakinan ae e a manga kiriaria riki rokon te toki. (I-Karatia 6:9) E kona naba n nanokawaki ibukina bwa tao e a tia n taona ngkoa nanona nakon kaubwaina. Ma e kauringira Iesu ni kangai: “Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea.” (Mataio 22:37) Eng, te aomata are e beku iroun te Atua ibukina bwa e tangiria, e na bon aki tabe ma anaun te tai are e beku iai. E a tia ni motinnanoia bwa e na beku iroun Iehova n aki toki! (Mika 4:5) E aki naba uringaba n ana mwakuri n angakarea ake e a tia ni karaoi ake a reitaki ma ana beku ibukin te Atua. (Ebera 13:15, 16) Tangiran te Atua irouna, e kaira nanona bwa e na moanibwai bwaai ake e tangiri te Atua.​—Mataio 6:33.

Ni boong aikai e a raka i aon onoua te mirion, mwaitiia taan taromauri ni koaua aika a “anga ngaiia” bwa a na beku iroun Iehova. (Taian Areru 110:3) Ngkoe naba temanna mai buakoia? Ngkana tiaki ngkoe kaaina, ao karaua iangoa raoi te bwai are e tauraoi n anga te Atua; ae ataakin te koaua n te aro ae eti; (Ioane 17:3) te kainaaomataki man aia reirei Aaro aika kewe; (Ioane 8:32) ao ai kaantaningan te maiu are aki toki. (Te Kaotioti 21:3, 4) A kona ni buokiko Ana Tia Kakoaua Iehova n reiakini bwaai aikai ni kabane mairoun te Atua, n aki kabooaki.