Te Koaua bwa bon Tii Teuana ‘te Aro ae Koaua’?

“KIOINA ngkai bon tii temanna Kristo, e na bon tii teuana naba rabwatan Kristo, ae tii temanna Buun Kristo: ‘ao ti teuana te Aro ni Katorika ae mairouia abotoro.’”​—Dominus Iesus.

Anne aron te karetinare ae te I-Tiaman ae kaain te Aro ni Katorika n Rom ae Joseph Ratzinger, ni kaota taekan reirein ana Aro are oti iai bwa bon tii teuana te Aro ae koaua. E taku, te Aro anne bon “ana Aro Kristo ae tii teuana, ae te Aro ni Katorika.”

“Tiaki Raoi Aaro ni Koaua”

E ngae ngke e kamatoaa ana taeka te Bobe Ioane Bauro II, n taekinna bwa akea n te koroboki ae te Dominus Iesus taekan “te kan rietata riki ke te aki-karinerine nakoia Aaro tabeua,” ma a rangi n un mataniwin Aaro ni Borotetanti iai. N te katoto, e taku temanna te minita n aia Botaki kaain te Aro ae te Presbyterian i Belfast, i Ireland Meang n Tun 2001, bwa e riki te koroboki anne man “te botaki teuana ae mena i nanon te Aro ni Katorika n Rom ae rangi ni mwaaka, . . . ake a rangi ni kuba ni maaku n te inaaomata n iango ae reke man te boowi are karaoaki n te Vatican II.”

E taku Robin Eames, ae mataniwin te Aro n Ireland, bwa e na bon “rangi n nanokawaki” ngkana te koroboki anne, e “na kaoki iango aika bwainaki imwain boowin te Vatican II.” Ngke e kabwarabwaraa aron ana koaua te Vatican are aongkoa Aaro ake a rawa nakon ana reirei te Aro ni Katorika, “bon tiaki Aaro ni koaua,” ao e taku teuae Eames: “Irou, e kona ni matauninga te aba n te taeka anne.”

Tera ae e kauekea korean te Dominus Iesus? E teretere bwa a aki rauaki nanoia kaain te Botaki ni Mwakuri n te Aro ni Katorika, n te koaua ae tabe n rikirake are a inaaomata aomata n iangoi aia koaua ma aia reirei ae tau ibukia ni kaineti ma te Aro. E taekinaki ae kangai n te nutibeebwa ae te Irish Times, “rikiraken te koaua ae a tau ni kawakinaki katei aika mwaiti n te aba teuana, ae e reke mai iai te iango ae a bane n raoiroi Aaro nako, . . . e aki karaua nanon te Karetinare ae Ratzinger.” E teretere bwa te iango aei e aana ana kabwarabwara te Karetinare aei ae kaineti ma te Aro ae tii teuana ae koaua.

E Kakawaki bwa Tera Am Aro ae Ko Mena Iai?

Irouia tabeman, iangoan ae a riai “aomata ni bairea aia koaua ma aia reirei aika tau ibukia,” ke a tau “aomata n tannako ma aia katei,” e raoiroi riki nakon taekinan ae bon tii teuana te Aro ae koaua. A taku i nanoia bwa e bon riai ni karekea ana Aro te aomata are e bon tangiria. ‘Ma n tokina,’ a taku bwa ‘e aki kakawaki bwa tera am Aro are ko mena iai.’

E taraa n ae e kai butimwaei aeka n reirei riki tabeua te iango anne, e ngae ngke a na riki Aaro aika bati aika kakaokoro mai iai. A taku aomata aika mwaiti bwa ‘te kakaokoro n aia Aro aomata, bon tii kaotan inaaomataia n rinea ae a tangiria.’ Ma e taku te tia koro-rongorongo ae Steve Bruce, bwa te aeka n iango ae “butimwaean Aaro nako,” e nanona raoi “aki tabeakinan taekan te Aro.”​—A House Divided: Protestantism, Schism, and Secularization.

Ma tera ngkanne te kaantaninga ae eti? Iai te Aro ae tii ngaia ae koaua? Te koaua bwa e mena te Aro anne i nanon te Aro ni Katorika n Rom? Titeboo aroni butimwaean Aaro nako iroun te Atua? Kioina ngkai a irekereke titiraki aikai ma reitakira ma te tia Karikira, e bon rangi ni kakawaki ngkanne bwa ti na nora ana kaantaninga i aon aei. Ti na kanga ni karaoa anne? Ngkana ti nenera ana Taeka te Atua ae te Baibara ae kairaki koreana iroun te Taamnei. (Mwakuri 17:11; 2 Timoteo 3:16, 17) Ti na iangoia ngkai bwa tera ae taekinaki ibukin te Aro ae tii ngaia ae koaua.