E Tabeakiniko Iehova

“Katikui tabeaiangami ni kabane [iroun te Atua], ba e tatabeakiningkami.”​—1 BETERO 5:7, BK.

1. Tera te bwai ae kakawaki ae e rangi n okoro iai aron Iehova ma Tatan?

E BON rangi n okoro aroaron Iehova ma Tatan. Te aomata ae namakinna bwa e kaan ma Iehova, e na bae n ribaa te Riaboro. E taekinaki te kaokoro anne n te boki ae te Encyclopædia Britannica (1970) ni kaineti ma ana mwakuri Tatan are e taekinaki ni bokin te Baibara ae Iobi: ‘Ana mwakuri Tatan bon te nanakonako i aon te aba n ukoukora kabuakakaia aomata ke kairuaia; e rangi ni kaokoro te bwai ae e karaoia ma “matan te Uea” ake a taratara ni kabuta aon te aba ni kakorakoraia aomata aika raoiroi (2 Rongorongo 16:9). E kakoauaa Tatan bwa a kaakaraoa ae raoiroi aomata ibukina bwa a kani kabooaki iai, ao e kariaiakaki i aan ana tautaeka ma mwaakan te Atua bwa e na kataa aroaroia aomata anne. Ma iai tian kataakiia aomata irouna are e kateia te Atua.’ Ai boni korakora ra te kaokoro i marenaia!​—Iobi 1:6-​12; 2:1-7.

2, 3. (a) E kanga ni kaotaki nanon te taeka ae “Riaboro” ni bwaai ake a riki nakon Iobi? (b) E kanga te Baibara ni kaotia bwa e teimatoa naba ngkai Tatan ni kakabuakakaia ana toro Iehova aika i aon te aba?

² Te taeka n Erene i bukin “Riaboro,” nanona “te bukinia aomata n te kewe,” ao “te tia uarao.” E kaotia te boki ae Iobi bwa e kabuakakaki Iobi ae ana toro ae kakaonimaki Iehova iroun Tatan, bwa aongkoa e beku iroun Iehova ibukin karekean kabwaiana, ngke e taku: “E mamaka te Atua Iobi n aki kani kaboaki ke e aki?” (Iobi 1:9) Te rongorongo are taekinaki n te boki ae Iobi, e kaotia bwa n aki ongei kariri ma kataaki ake e boo ma ngaai Iobi, ma e teimatoa Iobi ni kaania riki Iehova. (Iobi 10:9, 12; 12:9, 10; 19:25; 27:5; 28:28) E taku nakon te Atua imwin kataakina: “I ongo taekam ngkoa n ongon te taninga; Ao ngkai, e noriko matau.”​—Iobi 42:5.

³ E a tia Tatan ni kerikaki man arona ni kabuakakaia ana toro te Atua aika kakaonimaki, man ana tai Iobi ni karokoa ngkai? E tuai. E kaotaki n te boki ae Te Kaotioti bwa n tain te toki aei, e teimatoa Tatan ni kabuakakaia tarin Kristo aika kabiraki n ikotaki naba ma raoia aika kakaonimaki. (2 Timoteo 3:12; Te Kaotioti 12:10, 17) Mangaia are te bwai ae ti rangi ni kainnanoia ngaira ni kabane aika Kristian ni koaua, bon te aantaeka nakon Atuara ae tabeakinira ae Iehova ao n toro irouna ibukin ara tangira ae bati, bwa n te aro anne ti kaota iai kewen ana bukibuki Tatan. Ngkana ti karaoa anne, ti na kakukureia iai nanon Iehova.​—Taeka N Rabakau 27:11.

E Kakaai Aanga Iehova Ibukin Buokara

4, 5. (a) Tera te bwai ae tarataraia Iehova i aon te aba, ni kaitaraa are e karaoia Tatan? (b) Tera ae ti riai ni karaoia ngkana ti na karekea akoara iroun Iehova?

⁴ E nanakonako te Riaboro i aon te aba, ni kakaaea ae e na kabuakakaa ao ae e na kamwanea. (Iobi 1:7, 9; 1 Betero 5:8) Ni kaitaraa anne, Iehova e ukoukora buokaia te koraki ake a kainnanoa kakorakorakiia irouna. E tuangaki te Uea ae Ata iroun te burabeti ae Anani ni kangai: “A biribiri matan Iehova ni kabuta aonaba ni kabane, ba E na kaotia ba E korakora i bukiia akana a moa n eti nanoia nako Ina.” (2 Rongorongo 16:9) Ai boni korakora ra te okoro i marenan ana mwakuri ni kairiribai Tatan ao tabeakinara n te tangira iroun Iehova!

⁵ E aki tirobaaira Iehova ni kakaaei nako ara kairua ao mamaarara. E korea ae kangai te tia areru: “Iehova, ngkana tao Ko mutiakini buure, Ao ai antai ae na tei, te Uea?” (Taian Areru 130:3) Kaekaana raoi bon akea temanna. (Te Minita 7:20) Ngkana ti kaania Iehova ma nanora ae eti, e na mena matana i aora, tiaki ni kabuakakaira, ma e na taratarai aron ara kakorakora ao e na kaekai ara tataro ibukin buokara ao kabwaraan ara bure. E korea ae kangai te abotoro Betero: “A memena matan Iehova i aoia akana raoiroi ni kan akoiia, ao a uki taningana nakon aia wewete; ma e ekiia nako akana karaoa ae buakaka matan Iehova.”​—1 Betero 3:12.

6. E kanga ana kairua Tawita n riki bwa karauan nanora ao kauringakira naba?

⁶ E aki-kororaoi Tawita ao e rawawata ana bure. (2 Tamuera 12:7-9) Ma e kaota raoi nanona nakon Iehova ao e kaania n ana tataro n onnon. (Taian Areru 51:1-​12) E ongo ana tataro Iehova ao e kabwaraa ana bure, e ngae ngke e a tuuraki Tawita n uaan ana bure ae aki-raoiroi. (2 Tamuera 12:10-​14) E riai n riki aei bwa karauan nanora ao kauringakira naba. E karaunano ataakin ae e kukurei Iehova ni kabwarai ara bure ngkana ti raraoma ni koaua, ma e riai naba n uringaki bwa n taai aika mwaiti bon iai uaan te bure ae rawawata. (I-Karatia 6:7-9) Ngkana ti kani kaania riki Iehova, ti riai ni kabanea ara konaa n teiararoa man bwaai aika aki kakukureia nanona.​—Taian Areru 97:10.

E Katikiia Ana Aomata Iehova Nakoina

7. Aekan aomata raa ake e tarataraiia Iehova, ao e kanga ni katikiia nakoina?

⁷ E korea ae kangai Tawita n teuana mai buakon ana areru: “E bon rietata Iehova, ma E tarataraiia naba akana nanorinano: Ao E ataiia mai kiraroa akana kainikatonga.” (Taian Areru 138:6) E taku te areru teuana ni boutokaa aei: “Ai antai ae ai aron Iehova are Atuara, Are tekateka i eta, Are kananorinanoa ba E na tarai bwaini karawa ma aonaba? E kateirakea ane akea ana bwai mai buakon te tano.” (Taian Areru 113:5-7) Eng, te tia Karikiriki ae moan te mwaaka i aon bwaai ni kabane e nanorinano n tarataraa te aonnaba, ao matana a nora ‘ane e nanorinano,’ ma “ane akea ana bwai,” ao aomata naba ake a “ikenrawa ma n tang i bukini bwaai ni kabane akana riai ni bati n ribaki akana karaoaki i nanona.” (Etekiera 9:4) E katikiia aekan aomata aikai nakoina rinanon Natina. Ngke e mena i aon te aba Iesu ao e taekina ae kangai: “Akea ae e kona n nakoiu ngkana e aki katikia te Tama are e kanakoai . . . Akea ae e kona n nakoiu ngkana e aki buokia te Tama.”​—Ioane 6:44, 65, BK.

8, 9. (a) Bukin tera bwa ti riai ni bane ni kakoauaa Iesu? (b) Tera te bwai ae kamimi ni kaineti ma te babaire ibukin te kaboomwi?

⁸ A riai aomata ni kabane ni kakoauaa Iesu ao n onimakina ana karea ni kaboomwi, ibukina bwa a bungiaki n aki-kororaoi, ao a raurenako ma te Atua. (Ioane 3:36) A kainnanoa raoiakinaia ma te Atua. (2 I-Korinto 5:20) E aki tataningaia taani bure te Atua bwa a na bubutiia bwa e na karaoi babaire tabeua, ike a na kona iai n raoiakinaki ma ngaia. E korea ae kangai te abotoro Bauro: “E kakoauaki ana tangira te Atua i bukira n aei: ba e mate Kristo i bukira ngke bon tani bure ngaira. Ti a tia n raoiakinaki ma te Atua ni maten Natina, ngke bon ana kairiribai ngaira. Ngkai ti a tia n raoiakinaki ma te Atua, ao ti kai kamaiuaki riki ni maiun Natina.”​—I-Rom 5:8, 10, BK.

⁹ E korea ae kangai te abotoro Ioane ni kamatoaa iai koauan te kaantaninga are te Atua boni ngaia ae e na raoiakinia aomata nakoina: “E kaotaki tangirara i roun te Atua n aei, ngke E kanakomaia Natina are te riki-temanna te Atua nako aon te aba, ba ti aonga ni maiu i Rouna. Aio te tangira, tiaki ngke ti tangira te Atua, ma E tangirira, ao e kanakomaia Natina ba te kareanraoi ni kabara ara bure.” (1 Ioane 4:9, 10) Bon te Atua are e moani karaoa te bwai teuana ibukia aomata, ma tiaki aomata. Ko aki namakina atikan nanom nakon te Atua ae kaotiota te tangira ae bati nakoira ngaira aika tiaki tii “taani bure,” ma bon taani “kairiribai” naba?​—Ioane 3:16.

Ti Kainnanoa Ukoukoran Iehova

10, 11. (a) Tera ae ti riai ni karaoia ibukin ukoukoran Iehova? (b) Tera arora ni kaineti ma ana waaki Tatan?

¹⁰ N aron ae ti ataia, e aki kairoroira Iehova bwa ti na kaania. Ti riai n ukoukoria, ao ni ‘kunea ngkai ti kakaaea; bwa E aki raroa mairoura n tatabemanira nako.’ (Mwakuri 17:27) Ti riai n ataa riain Iehova ni kaantaninga ara ongeaba nakoina. E korea ae kangai te tia rimwin Iesu ae Iakobo: “Ma ngaia ae kam na irira nanon te Atua; ma kam na rarawa nakon te riaboro, ao ane e na biri nako mai roumi iai. Kam na kaania te Atua, ao ane E na kaaningkami. Kam na kaitiaki baimi, ngkami aika taani bure; ao kam na kaitiaki nanomi, ngkami aika kam nanououa.” (Iakobo 4:7, 8) Ti riai n aki tabwarabwara n tei n nene ni kaitaraa te Riaboro ao n tei ibukin Iehova.

¹¹ E nanonaki n aei, kararoaan ana waaki aika buakaka Tatan. E korea naba ae kangai Iakobo: “Kam aki ata te raoraona te aba ba bon ribaan te Atua? Ma ngaia aei, ba ane kan raona te aba, ao e riki ba ana kairiribai te Atua.” (Iakobo 4:4) Ni kaitaraan anne, ngkana ti kan riki bwa raoraon Iehova, ti riai ni kaantaningaa ana aonnaba Tatan bwa e na riribaira.​—Ioane 15:19; 1 Ioane 3:13.

12. (a) Baikara taeka ni kaunganano ake e korei Tawita? (b) Tera te kauring are e anga Iehova rinanon te burabeti ae Ataria?

¹² Ngkana e totokoira ana aonnaba Tatan n aanga tabeua, ti kainnanoa ngkanne kaaniakin Iehova n te tataro ao ni butiia buokara. Tawita are e a mwaiti ana tai n namakina ana kakamaiu Iehova, e korea ae kangai ibukin karauan nanora: “E a kaan Iehova nakoia akana weteia ni kabaneia. Nakoia akana weteia n te koaua ni kabaneia. E na karekea ae a tangiria akana makua; Ao E na ongo tangia, ao E na kamaiuia. E kawakinia Iehova akana tangiria ni kabaneia; Ma E na kamaunaia akana buakaka ni kabaneia.” (Taian Areru 145:18-​20) E kaotia te areru aei, bwa e kona Iehova ni kamaiuira ngkana ti kaririaki n tatabemanira nako, ao e na kamaiuia ana aomata n tain “te rawawata are korakora.” (Te Kaotioti 7:14) E na kaanira Iehova ngkana ti kaania naba. E kairaki iroun “tamnein te Atua” te burabeti are Ataria bwa e na korea taekan te bwai ae ti bane ni kona n iangoia bwa te koaua ae manena n taai nako: “E boni mena Iehova i roumi, ngkai kam mena i Rouna; ao ngkana tao kam ukoukoria, ao E na reke i roumi; ma ngkana tao kam kitanna, ao E na kitaningkami.”​—2 Rongorongo 15:1, 2.

E Bon Riai ni Koaua Iehova Iroura

13. Ti na kanga ni kona ni kaotia bwa e boni koaua Iehova iroura?

¹³ E korea aei te abotoro Bauro ni kaineti ma Mote, “e taotaona nanona ngke kaanga e nora Teuare aki nonoraki.” (Ebera 11:27) Ni koauana, e bon aki nora Iehova Mote. (Te Otinako 33:20) Ma e bon rangi ni koaua Iehova irouna n te aro are kaanga, e a bon noria. N aron naba anne, e nora Iehova Iobi ni matan ana onimaki imwin kataakina, bwa te Atua ngaia ae kariaia ana toro aika kakaonimaki bwa a na rinanon taiani kataaki, ma e aki mwanuokina taekaia. (Iobi 42:5) E taekinaki bwa ‘a nakonako ma te Atua’ Enoka ao Noa. A karaoa aei rinanon ukoukoran kakukureian te Atua ao n ongeaba naba irouna. (Karikani Bwaai 5:22-​24; 6:9, 22; Ebera 11:5, 7) Ngkana ngaia bwa e boni koaua Iehova iroura n aron naba are a iangoia Enoka, Noa, Iobi, ao Mote, ti riai ngkanne n ‘ataia n nakonakora ni kabane ao e na kaeti kawaira nako.’​—Taeka N Rabakau 3:5, 6.

14. Tera ae nanonaki n ‘nimtan’ Iehova?

¹⁴ Imwain raoi rinia I-Iteraera n te Aba ni Berita, ao e reireinia Mote ni kangai: “Kam na nakonako n ira nanon Iehova ae Atuami, ao kam na makua, ma ni kakawakin ana tua, ma n ongo bwanana, ma n toro i Rouna, ma n nimtia.” (Te Tua-Kaua 13:4) A riai n ira Iehova, ni maakua, n ongotaeka irouna, ao n nimtia. Ni kaineti ma te taeka ae rairaki ikai bwa “nimtia,” e taku te tia rabakau temanna i aon te Baibara, bwa “te taeka n Ebera aei e katereterea taekan te itoman ae rangi ni kaan.” E taekina ae kangai te tia areru: “E mena nanon Iehova ae raba irouia akana makua.” (Taian Areru 25:14) Te itoman ae kakawaki aei ae kaan ma Iehova, e na riki bwa irian maiura ngkana e boni koaua Iehova iroura, ao ngkana e bati naba tangirana iroura. N te aro anne e na kangaanga iroura karaoan mwakuri nako aika aki-kakukureia nanona.​—Taian Areru 19:9-​14.

Ko Ataa Tabeakinam Iroun Iehova?

15, 16. (a) E kanga ni kaotia Taian Areru 34 bwa e tabeakinira Iehova? (b) Tera ae ti riai ni karaoia ngkana e kangaanga iroura ururingan mwakuri ngkoa tabeua aika raraoi ake e karaoi Iehova ibukira?

¹⁵ Ana bwai n nanowanawana Tatan teuana, boni kabuaan te kaantaninga iroura, are e na teimatoa Atuara ae Iehova n tabeakinia ana toro aika kakaonimaki. E rangi n ataa bain Iehova ni kamanomano Uean Iteraera are Tawita, e ngae ngke e kaaitara naba ma taai aika karuanikai. E otea te kuna Tawita ngke e kairoroaki bwa e na baka n riki bwa te rangirang i matan te Uea are Akiti are uean Kate, ae te areru ae moan te tamaroa ae irianaki ni kabwarabwaran te onimaki ae kangai: “Kam na buokai n neboa Iehova, ao ti na bane ni karietata arana. I ukoukora Iehova, ao E ongo i rou, ao E kamaiuai mani bwaai ni kabane aika I maku iai. E katea umana ni buaka ana anera Iehova i rarikiia akana makua ni kawakinia, ao E kamaiuia. Kam na kata Iehova ma n noria ba E raoiroi: E a kabaia te aomata ae onimakinna. E a kaan Iehova ma akana a uruaki nanoia, ao E kamaiuia akana a raraoma tamneiia. A bati karawawatan te aomata ae raoiroi: ma Iehova E na kamaiua mani baikai ni kabane.”​—Taian Areru 34:3, 4, 7, 8, 18, 19; 1 Tamuera 21:10-​15.

¹⁶ Ko boni kakoauaa raoi mwaakan Iehova ni kakamaiu? Ko ataa aron aia kamanomano ana anera? Ko a bon tia ni kataia ao n noria bwa e raoiroi Iehova? N ningai te kabanea n tai are ko namakinna iai bwa e a tia ni karaoa ae raoiroi nakoim Iehova? Kataia n uringnga. Ko kakoauaa bwa n te kabanea n auti are ko kawaria ngkoa n am mwakuri ni minita, n te tai are ko a bon namakina iai te kua ao ko a aki kona ni manga reitia nako riki? Tao e kakukurei am maroro ma kaain te auti anne, ma ko uringnga ni kaitaua Iehova ibukin kakorakorakim riki are ko kainnanoia, are e a tia n anganiko ao kakabwaiakin am mwakuri irouna? (2 I-Korinto 4:7) N te itera teuana, tao e kona ni kangaanga iroum ururingan mwakuri ngkoa tabeua aika raraoi ake e karaoi Iehova ibukim. E kona n ae ko ururing rikaaki teuana te wiki n nako, te namwakaina, te ririki ke e nako riki. Ngkana ngaia anne, ao bukin tera bwa ko aki kakorakorako ni kaania riki Iehova ao ni kataia n nora arona ni kaiririko? E kaungaunga te abotoro Betero nakoia Kristian ni kangai: “Kam na nanorinano i ani bain te Atua ae e mwaka . . . Katikui tabeaiangami ni kabane irouna, ba e tatabeakiningkami.” (1 Betero 5:6, 7, BK) Ko na boni mimi n arona n tabeakiniko!​—Taian Areru 73:28.

Teimatoa n Ukoukora Iehova

17. Tera te bwai ae riai ibukira ngkana ti na teimatoa n ukoukora Iehova?

¹⁷ Kateimatoan te iraorao ma Iehova bon te bwai ae riai ni waakinako. E taku Iesu n ana tataro nakon Tamana: “Ao aio te maiu are aki toki, te ataiko ae te Atua ae ti temanna ae koaua, ao Iesu Kristo, ae Ko kanakomaia.” (Ioane 17:3) Karekean ataakin Iehova ao Natina, e kainnanoa ara kakorakora ae teimatoa. Ti kainnanoa te ibuobuoki ae reke man te tataro ao te taamnei ae raoiroi bwa ti aonga n ota n “ana bwai te Atua ake a nano.” (1 I-Korinto 2:10; Ruka 11:13) Ti kainnanoa naba ana kairiri “te toro ae kakaonimaki ae wanawana” bwa e na kanuaira n amwarake n taamnei ake ti anganganaki ‘n te tai ae riai.’ (Mataio 24:45) E a tia Iehova rinanon te toro aei n reireinira bwa ti na wareware n ana Taeka ni katoa bong, n aki toki ni kaei ara bobotaki ni Kristian, ao ni buoka naba kabutan “euangkerion uean te Atua” ma te nano ni koaua. (Mataio 24:14) Ngkana ti karaoa aei, ti na teimatoa iai n ukoukora tabeakinara mairoun Atuara ae Iehova.

18, 19. (a) Tera ae ti riai ni nanomwaaka ni karaoia? (b) Ti na kanga ni kakabwaiaki ngkana ti teimatoa ni kaitaraa nakon te Riaboro, ao n ukoukora Iehova?

¹⁸ E tabe ngkai Tatan ni kakorakoraa ni karokoa te bwainikirinaki, te kairiribai ao te kairoro, nakoia ana aomata Iehova man itera aika kakaokoro nako. E kataia n urua mweeraoira ao arora aika raraoi i matan Atuara. E aki tangirira bwa ti na kateimatoaa ara mwakuri ni kakaaia aomata aika raoiroi nanoia, ao ni buokiia bwa a na tei n ana itera Iehova ni kaineti ma te kauntaeka ae irekereke ma te mwaaka n tautaeka i aon bwaai ni kabane. Ma ti riai n nanomwaaka ma n teimatoa ni kakaonimaki nakon Iehova, ao n onimakinna bwa e na kainaaomataira mairoun teuare buakaka. Ngkana ti kariaia ana Taeka te Atua bwa e na kairira, ma ni kakaonimaki n tiku n ana botaki i aon te aba, ao ti kona ni kakoauaa iai bwa e na bon tatauraoi ni boutokaira.​—Itaia 41:8-​13.

¹⁹ Ti bia bane n teimatoa ni kaitaraa te Riaboro ma ana mwakuri nako n nanowanawana, ao n ukoukora Atuara ae Iehova are e kona ni ‘kateimatoaira ma ni kakorakoraira.’ (1 Betero 5:8-​11) Mangaia are ti na ‘kawakinira n tangirara iroun te Atua, ao ni kaantaningaa nanoangakira iroun ara Uea are Iesu Kristo, ni kaineti ma te maiu are aki toki.’​—Iuta 21.

Ko na Kanga ni Kaeka?

• Tera ae nanonaki n te taeka ae “Riaboro,” ao e kanga te Riaboro ni kakoroa nanon anne?

• E kanga Iehova ni kaokoro ma te Riaboro n arona n taraia kaain te aonnaba?

• Bukin tera bwa e riai te aomata ni kariaia te karea ni kaboomwi ngkana e kaania Iehova?

• Tera ae nanonaki n ‘nimtan’ Iehova, ao ti na kanga ni kona ni kateimatoaa ukoukorana?

[Taamnei n iteraniba 25]

E kakaitau Iobi n ataakin ae e tabeakinaki iroun Iehova, e ngae ngke e kataaki

[Taamnei n iteraniba 26]

Te katoa bong ni wareware n te Baibara, te katoatai n iri bobotaki ni Kristian, ao te botumwaaka n te mwakuri n uarongorongo, a kauringira taekan are e bon tabeakinira Iehova