Titiraki Mairouia Taani Wareware
E a kanga te naeta are i Eten rimoa ni kaongoa Nei Ewa taekan riaoakin ana tua te Atua ibukin te kai n ataa te raoiroi ao te buakaka?
E kangai Karikani Bwaai 3:1: “E nanowanawana riki te naeta nakoia manin te tawana ni kabaneia aika E karaoiia Iehova ae te Atua. Ao e taku nakon te aine arei, E koaua ke e aki ba E kangai te Atua, Kam na tai amarake mani kaai ni kabane aika i nanon te ne n aroka aei?” Iai iango aika kakaokoro aika tabekaki ibukin kabwarabwaran ae e a kanga te naeta arei n itoman ma Nei Ewa. N te kabwarabwara teuana, aongkoa e karaoa anne rinanon kakamwakuran rabwatana. N aron anne, e kangai Joseph Benson ae te bwakuaku n te Aro teuana ae kaain Engiran: “N taraana, e [itoman] rinanon taiani kanikina. Tabeman a a tia n taekinna bwa aongkoa a kona n taetae nikawai ma n iaiango naeta, . . . ma akea kakoauan anne.”
Ma ngkana e kamwakura rabwatana n akea te taetae ni kawai, e na kona te naeta ngkanne, ni katereterea nakon Nei Ewa te iango ae ngkana e kana uaan te kai ae tabuaki arei, ao e na riki n ai aron te Atua neiei, ma ni kona ni baireia i bon irouna bwa tera ae raoiroi ao ae buakaka? Ao e taekinaki naba bwa Nei Ewa e uaia ni maroro naba, bwa e kaeka te titiraki are e tabekaki iroun te naeta. (Karikani Bwaai 3:2-5) Ngkana e iangoaki bwa e itoman te naeta rinanon kakamwakuran rabwatana, ao Nei Ewa naba e na bae ni kaeka rinanon kamwakuran bwain rabwatana. Ma te Baibara e taekinna bwa e bon taetae nikawai neiei.
E taekina te bwai ae e riki arei te abotoro Bauro ngke e kauringia Kristian ni kangai: “Ba I maku ba a kawa n anaaki nanomi man te raoiroi ma te itiaki are i nanoni Kristo, n ai aron Ewa ngke e burebureia te naeta n ana nanowanawana.” Te kangaanga are e taekinna Bauro, e a roko mairouia “taan tuatua ni kewe” ao “taani makuri aika mamana te aba.” Te kangaanga are a karikia “taan tuatua ni kewe” e aki nako man are e kaotaki n aroia ni kamwakuria bwain rabwataia n tii ngaia. Ma e nanona naba aia taetae nikawai, aia taeka n nanowanawana ake a taekinna ibukin mwamwanakiia aomata.—2 I-Korinto 11:3-5, 13.
E ngae ngkai e kabonganaki te taetae nikawai ibukin mwamwanaan Nei Ewa n te oo-n-aroka are Eten, ma akea ae e kakoauaa bwa iai iroun te naeta arei bwain buana are e kona n taetae nikawai iai. E bon aki naba kainnanoi bwaai aikai. Ngke ana anera te Atua e taetae nakon Baraam rinanon te aati-te-aine, te aati anne e aki kainnanoa bwain buana are ai aron buaia aomata are a kona n taetae iai. (Warekaia Iteraera 22:26-31) E teretere bwa ngke “te aati are babanga taetae e taetae ni bwanan te aomata,” te mwaaka ae aana te kamimi ane e a riki mairouia kaaini karawa.—2 Betero 2:16.
Te anera are e kaira te naeta arei bwa e na taetae nakon Nei Ewa, e atongaki n te Baibara bwa “te naeta nikawai, are arana te Riaboro ao Tatan.” (Te Kaotioti 12:9) Taeka ake e ongorai ao ake e kaekai Nei Ewa, a riki mairoun Tatan, are e aki toki n “onikia . . . ba kaanga te anera ae raona te ota.”—2 I-Korinto 11:14.
[Taamnei n iteraniba 21]
“Kam na riki ba kaanga te Atua n ata te raoiroi ma te buakaka”