Te Maeka Ibuakon Te Maiu ae Karuanikai
“Bon akea te bwai teuana ae ko kona ni karaoia inanon te bong teuana ma teuana—ae e aki karuanikai—n ikotaki naba ma te matu, n te aro ae e kona n riki bwa te kabanea ni bwai ae ko karaoia, ao ko a mate naba.”—Te maekatin ae te Discover.
E A TIA te maiu ni kabotauaki ma te nakonako ribuakon te aba ae a taunaki ni karabaki iai boom aika mwaiti, n te aro are e kona ni karina n reke te ikoaki iai ke te mate n te taina, n akea te kauring moa. A kakaokoro aroni kangaanga aika a kona n riki, n te aba teuana ma teuana. Tabeua bon te kurati n te kawai, te buaka imarenaia kaain te aba, te rongo, te AIDS, te kaentia, aorakin te buroo, ao a mwaiti riki. N aron anne, n te aono n Aberika ae kaan ma te Sahara, te AIDS e a bon riki bwa te tia tiritiri ae bati konana ni mate, bwa n te ririki teuana ae e a tibwa nako, te AIDS e “kamateia aomata aika 2.2 te mirion mwaitiia, ae e okioki iai 10 te tai mwaitiia aomata aika a a tia ni mate ni buaka ni kabane ake a a tia n riki imarenaia kaain Aberika,” e taku te U.S.News & World Report.
Ma e ngae n anne, kaain te aonnaba a boni kabanea birion ma birion mwaitin te mwane ibukin kaananauan riki maiuia ao kauarerekean taian aoraki ao te aki konabwai are e riki mai iai. A mwaiti reirei aika a taekinaki ni kaineti ma anne, n aron te taubaang n te amwarake ao te moi, ao kamarurungan te rabwata, aika a kona ni kariki uaa aika raraoi tabeua. Ma e ngae n anne, iai riki nibwan rongorongo aika a kona n onimakinaki ni kaineti ma waakin te maiu aei ni kabane aika kakawaki, ake a kona ni buokiko bwa ko na namakina riki te mweenga raoi ma ni kararoa te kabuanibwai. Nibwan te rongorongo aei bon te Baibara.
Bon iai inanona reirei ibukin kaitaran kangaanga aika mwaiti aika a reitaki ma te marurung ao te mweeraoi. Te koaua bwa te Baibara e aki kamataatai raoi reirei ibukin kangaanga ni kabane ake a kona n riki. Ma e ngae n anne, e taekin reirei aika moanibaan te raoiroi ake a kona ni kairira ni kaineti ma arora n amwamwarake, kamarurungan rabwatara, karekean te iango ae riai, te wene n taanga, kabonganan mooi aika kamanging, kabonganan te baakee ao bwaai ni kamanging ake aongkoa bwaai n takaakaro, ao a mwaiti riki.
A karawawataki maiuia aomata aika mwaiti ni kangaanga ibukin te mwane. E kona ni buokira naba iai te Baibara. E aki tii kaungaungaa iangoan te mwane n te aro ae riai ao bairean kabonganana, ma e kaotia naba bwa e na kanga n raoiroi riki ana mwakuri te tia mwakuri ao ana tia kamwakuri. Ni kauarerekeana, te Baibara bon te bwai ni kairiri ae raoiroi, tiaki tii ibukin te kamweeraoi ibukin te kataumwane ao kamarurungan te rabwata, ma bon ibukin naba kairan te maiu. Ko tangiria n nora aron manenan te Baibara ni kaineti ma taai aikai? Ngkana ngaia anne, ao taiaoka n reita nako am wareware.