E A Kaan Rokon Te Aonnaba ae Akea te Bwarannano Iai

E A RIKIRAKE ni kangaanga riki rawawatan te maiu aei, ao a mwaiti bwaai aika a karika te bwarannano. Ngkana a bwara nanora, ti kona n namakina te kangaanga n aron taotaonakin nanora nakon ara namakin. Aomata aika a rangi n tangira te maiu a kona naba n taonaki n te aki-kukurei ae kakaiaki arona! Iangoi katoto tabeua.

N taai ake rimoa, e korakora namakinan te bwarannano iroun te burabeti are Mote n te aro are e taku nakon te Atua: “I butiko ba Ko na boni kamateai ngkai, ngkana tao e reke i rou te akoaki i matam; ao N na aki nora rawawatau.” (Warekaia Iteraera 11:15) E kangai Eria ngke e birinako mairouia ana kairiribai: “E a tau; Iehova, Ko na anaa maiuu ngkai.” (1 Uea 19:4) Ao e kangai te burabeti are Iona: “Ma ngaia ae I butiko ngkai, Iehova, ba Ko na anaa maiuu mai rou; ba e raoiroi riki mateu nakoni maiuu.” (Iona 4:3) Ma akea mai buakoia Mote, Eria ao Iona ae e bakaburea maiuna. A bane n ataa ana tua te Atua ae kangai: “Ko na tai kamateia aomata.” (Te Otinako 20:13) Ibukin korakoran onimakinan te Atua irouia, a ataia bwa akea te tai teuana are a na katukaki iai n akea buokaia ae kona n reke, ao a ataia naba bwa te maiu bon te bwaintangira mairoun te Atua.

Tera aron kangaanga aika ti kaitara ma ngaai ngkai? Irarikin rawawatan te nano ke kangaanga n aron aki marurungin te rabwata, ti kona naba ni kaitara ma bainikirinara irouia kaain ara utu, kaain rarikira, ke raora ni mwakuri. Te Baibara e taekinia aomata ake a “kaonaki n te buakaka ni kabanea, ma te kani buakaka, ma te kani bwaibwai ae korakora, ma te babakanikawai. A on n te bakantang, ma te kamamate, ma te kauntaeka, ma te uarao, ma te iowawa. Bon taani winanti ngaiia, taani bukibuki, taan riba te Atua, taan taetaebuaka, taani kainikatonga, taani kamoamoaia, taan ukoukori baika bubuaka, taan aki iri nanoia aia karo, taani baba, taan uru taeka ni berita, taani babakaine, taan aki nanoanga.” (I-Rom 1:28-31) Te koaua ae ti otabwaniniaki irouia aeka n aomata aikai e kona ni karika taraakin te maiu aei iroura bwa e rawawata. Ti na kanga ni kona ni buokiia aomata aika a kainnanoa kabebetean nanoia ao buokaia?

Kukurei ni Kakauongo

Kangaanga ao rawawata nako a kona ni kaira te aomata bwa e na kabua moa iangoan ae riai. E taekina ae kangai te tia rabakau: “E riki n nanobaba te aomata ae e wanawana ngkana e karawawataki.” (Te Minita 7:7, Baibara ni Katorika) Mangaia are e riai ni mutiakinaki raoi te aomata ae tataekina te bakabure. Kangaanga ake e rootaki iai, ngkana kangaanga aika a reitaki ma te nano, te rabwata, te iango, ke bwaai n taamnei, a kona ni kainnanoa buokaia n te tai ae waekoa. A kakaokoro nako bwainaoraki aika a kona ni kakabonganaki, ao te aomata e riai ni karaoa oin ana moti n nano ni kaineti ma bwainaoraki ake e na kabonganai.​—I-Karatia 6:5.

Ma n aki ongea bwa bukin tera ngkai te aomata e iangoa bakaburean maiuna, ma e kona n rangi n ibuobuoki nakoina ngkana iai te aomata ae wanawana, ae atataiaomata, ao e taotaona nanona, are e kona ni kaota ana kangaanga nakoina. Tao a kona n ibuobuoki iai kaain ana utu ke raoraona aika a kukurei ni kakauongo raoi irouna. Irarikin te atataiaomata ao te akoi, reirei aika kaunga nano man ana Taeka te Atua a kona ni buokiia akana a bwara nanoia.

Te Ibuobuoki n Taamnei Nakoia Akana A Rootaki n te Maraki n Nano

Tao ko na mimi n ataakin aron korakoran te kaunga nano ae kona n reke man te wareware n te Baibara. E ngae ngkai te Baibara bon tiaki te boki ae kaotii bwainaoraki ibukin te iango, ma e kona ni buokira bwa ti na ataa kakawakin te maiu aei. E kangai te Uea are Toromon: “I ataiia ba akea te bwai ae raoiroi riki i rouia, nakon te kimareirei, ma te karaoa ae raoiroi ni kabane aia bongi ni maiu. Ao aio ana bwai n akoi te Atua ba a na bane n amamarake ma ni momoi, ma n nonora ae raoiroi n ana makuri ni bane.” (Te Minita 3:12, 13) Irarikin te mwakuri ae raoiroi are e kabobonga raoi aron manenan te maiu, ma bwaai aika a nonoraki n taai nako—n aron te ea ae boiarara, te riringa, taian uee, kaai, ao mannikiba—bon bwaintangira mairoun te Atua aika ti kona ni kakukureira iai.

E kaungaunga riki ana berita te Baibara ngke e kangai bwa Iehova ae te Atua ao Natina ae Iesu Kristo, a boni mwamwannanoira. (Ioane 3:16; 1 Betero 5:6, 7) E riai ngke e kangai te tia areru: “E na karaoiroaki te Uea ae uouoti uotara n te bong ae koraki, ae te Atua ae ara tia kamaiu.” (Taian Areru 68:19) E ngae ngkai ti kona n taku bwa akea bongara, ao ti aki tau iai, ma te Atua e kaoira bwa ti na tataro nakoina. Karaua nanom n ataakin ae akea te aomata ae nanorinano ni bubutii buokana ma nanona ni koaua, ae e na kakeaaki bonganana.

Akea te aomata ae e riai n iangoia bwa e na maiu ngkai n akea te kangaanga teuana. (Iobi 14:1) Ma e ngae n anne, te koaua man ana Taeka te Atua e a tia ni kaotia nakoia aomata aika mwaiti bwa bakaburean maiuiia, bon tiaki ngaia te anga ae a na kona ni katoki aia kangaanga iai. Iangoa aron te abotoro Bauro ni buoka te tia kawakina te karabuti are “e uti ni matu, ao e nori mataroan te auti ni kaikain ba a uki, ao e buuta ana kabaang, ao e nangi bakabureia, ba e taku ba a biri nako ake a kainaki.” N te tai ae waekoa te mataniwi n te karabuti e iangoia bwa e raoiroi riki bakaburean maiuna, nakon ae kamateana are e na kamaamaaeaki ke ni kammarakaki iai, bwa tuuana ibukin aki kakoroan raoi tabena. E takarua ni kangai te abotoro: “Tai karaoa ae buakaka nako im: ba ti bane ni mena ikai.” Tiaki tii anne ana taeka Bauro. Ngaia ma Tira a uaia ni kabebetea nanon te mataniwi n te karabuti ngke a kaeka ana titiraki ae: “Mwaane, tera ae riai ba N na karaoia ba N na kamaiuaki iai?” A kaeka ni kangai: “Ko na onimakina te Uea are Iesu Kristo, ao ko a maiu iai, ngkoe ma am utu.” Ao ngkanne, a taekina ana taeka Iehova nakoina ma kaain batana, ao n tokina, ‘e babetitoaki ma ana koraki ni kabane.’ Te mataniwi n te karabuti aei ma kaaini batana, a kakatonga ni kimwareirei ao a namakina manenani maiuiia.​—Mwakuri 16:27-35.

Ai bebetera nanora ngkai n ataakin ae tiaki te Atua are e karika te buakaka! E kaotaki n ana Taeka, ae taekan te taamnei ae buakaka, “are arana te Riaboro ao Tatan,” bwa boni ngaia “are mamanaiia kaain aonaba ni kabane.” Ma e nang roko n tokina ana tai ni waaki. (Te Kaotioti 12:9, 12) N te tai ae kaan n roko ngkai, rawawata ni kabane ake a karikaki iroun Tatan ma ana taimonio nakoia kaain te aonnaba, a na boni katokaki n ana mwakuri te Atua. Ao ngkanne, ana aonnaba ae boou te Atua are e beritanaki ae e na mena iai te raoiroi, e na katoki n aki toki, bwaai ni kabane aika a aana te bwarannano ao te bakabure.​—2 Betero 3:13.

Kabebeteakiia Akana A Baebaeti ni Kaota Tangiran Buokaia

N te tai naba aei, aomata ake a rawawata a kona ni karekea kabebetean nanoia man te Baibara. (I-Rom 15:4) E anene ni kangai te tia Areru: “Te Atua, ko aki riba te nano ae uruaki ae raraoma.” (Taian Areru 51:17) Te koaua bwa ti na bae ni kaitara ma kataakira ma n namakina mwiin te aki-kororaoi. Ma karekean ataakin Tamara are i karawa are e akoi, e tatangira ao e kakaraoa ae riai, e na kakoaua nakoira bwa ti boni kakawaki imatana. Te Atua e kona n riki bwa Raoraora ao ara tia Reirei ae kakannato riki. Ngkana ti karikirakea te iraorao ae kaan ma Iehova ae te Atua, e aki kona ni karaoa te bwai teuana ae ti na maneang iai. “Bon Iehova ae Atuam Ngai,” e taekinna ara tia Karikiriki “ae I reireiko arom ae ko na kabaia iai, ae I kaiririko i nanon te kawai ae riai ba ko na nakonako iai.”​—Itaia 48:17.

Onimakinan te Atua e a tia ni buokiia aomata aika mwaiti. Aikai katoto tabeua: E a tia ni mamaara Nei Mara imwin rawawatan nanona n te tai ae maan ngke e mate natina te mwaane ae ana rikitemanna n te kabuanibwai n te kawai.a E a nako nanona ao e kataia ni bakaburea maiuna. Ma ngkai, e utimwaaka ni katoa bong ni karaoa tabena ni mwengana. E namakina te kukurei ae nako man te ongongora ni katangitangin te anene, ao man buokaia aomata. Te kaantaninga ae e na iai “manga-utiia akana raoiroi ao akana aki raoiroi,” e a tia ni kabebetea nanona teutana imwin kananokawakin maten natina ae tatangiraki, ma ni kakorakora riki onimakinan te Atua irouna. (Mwakuri 24:15) Kioina ngkai akea nanon Nei Mara bwa e na riki n ai aron te anera i karawa, e riingaki nanona n taeka aikai man Taian Areru 37:11: “A na abana te aba akana nimamanei; ao a na kukurei ni kabatian te raoi.”

Te aine temanna i Brazil are arana Nei Sandra, e kakorakoraa bwa e na kororaoi arona n tabeakiniia raoi natina aika teniman. E kariaia ae kangai: “I a rangi n tabetabe n te aro ae ngke e a karina ni mate tamau, ao I a kunea naba n te tai arei bwa e kinano buu ma te aine temanna, ao I bon aki iangoia bwa N na tataro nakon te Atua ni bubutii buokau mairouna.” Ibukin korakoran bwaran nanon Nei Sandra iai, e kataia ni bakaburea maiuna. Tera are e buokia bwa e na manga marurung? Tangiran bwaai n taamnei irouna. “Ni katoa tairiki imwain matuu, ao I wareka te Baibara, ao I kataia ni kaboraoa arou ma te koraki ake I wareki taekaia iai. I wareki naba maekatin aika Te Taua-n-Tantani ao Awake!, ao I kukurei riki ni wareki rongorongon maiuiia aomata, ibukina bwa a buokai bwa N na karaua nanou n aroaroni maiu ae ngkai.” E noora aron riain kamataatan bwaai ake e tataroakin ngkai e ataia bwa Iehova bon raoraona ae rangi ni kaan ma ngaia.

Te Maiu ae E na Roko ae Akea te Bwarannano Iai

Ai bebetera nanora ngkai ti ataia ae e na bon toki rawawataia aomata! A na kakatonga ni kimwareirei ataei ao ikawai ake a rootaki ngkai ni mwakuri ni kakeru, te ribuaka, ke te kairiribai, ngkana a mena i aan ana kairiri ana Tautaeka n Uea te Atua. N aron are e taetae ni burabetinaki n te areru te korana, te Uea are rineaki iroun Iehova, are Iesu Kristo, e na “kamaiua ane e kai nanona ngkana e bubuti; Ma ane akea ana bwai, ane akea te tia buokia.” Irarikin anne, “E na nanoangaiia akana mamara ma akana a kai nanoia, ao E na kamaiu tamneiia akana a kai nanoia.” Te koaua bwa “e na kamaiu tamneiia man te babakanikawai ma te tiritiri; Ao a na kakaawaki raraaia i matana.”—Taian Areru 72:12-14.

E a kaan ngkai te tai are a na kakoroaki bukin taeka ni burabeti aikai. Ko nano n te kaantaninga ae ko na kukurei ni maiu n aki toki i aon te aonnaba ae arona anne? Ngkana ko nano iai, ao iai bukina ae ko na kimwareirei ma n iangoa te maiu bwa te bwaintangira mairoun te Atua. Ao ngkana ko taekin berita man te Baibara aika kabebetei naano nakoia aomata tabemwaang, ko kona naba ni karekea te kukurei ae bati nakoia aomata aika a baebaeti ni kaota tangiran buokaia, aika a maiu n te aonnaba ae aki-atataiaomata ma n aki-tatangira aei.

[Kabwarabwara ae nano]

[Taamnei n iteraniba 6]

A mwaiti taai ni boong aikai aika ti kona ni kakukureira iai

[Taamnei n iteraniba 7]

Ko boni kariariaa te aonnaba ae akea te bwarannano iai?