Te Bwaebwaeti Ibukin te Kani Buokaki

“E A TIA te Atua ni mwanuokinai!” e bwaebwaeti ainen Brazil temanna. Ngke e a karina ni mate buuna, neiei e namakinna bwa e a toki naba manenani maiuna. Ko a tia naba ni kataia ni buoka te aomata are e rootaki n te maraki n nano n ai aron anne, ke tao ae e bwaebwaeti n tangira buokana?

Tabeman a rangi n rawawata nanoia n te aro are a bakaburei maiuiia​—ao a mwaiti ibuakoia koraki aikai, aika rooro-n-rikirake. N aron are e taekinaki n te nuutibeeba ae te Folha de S.  Paulo, te ukeuke are e waakinaki i aon Brazil, e kaotia bwa “e a raka te bakabure irouia kaain te roro-n-rikirake, n te mwaiti ae 26 te katebubua.” N aron anne, iangoa taekan Walter,a ae te tei ni mwaane are e maeka i São Paulo. Akea ana karo, akea mwengana, akea oin ana tabo are e na mena n tii ngaia iai, ao akea raoraona ake e kona n onimakinia. Ibukin katokan nanokawakina ae kakaiaki aei, Walter e motika nanona bwa e na kibanako man te buriti.

Te aine ae iai natina ma akea buna, ae arana Nei Edna, e a tia ni karikia natina aika uoman imwain kaitiboona ma te mwaane temanna. Imwin te tai ae tii teuana te namwakaina, a uaia n tekateka inanon mwengan tinan teuaei, are te tia tabunea ao e kaaunganaki n te kamanging. E a manga kariki Nei Edna, e moanna ni kabatia te moi manging n te aro ae riao, ao e rangi n rawawata nanona n te aro are e a kataia ni bakaburea maiuna. N tokina, a anaaki natina mairouna.

Tera aroia kaara? Nei Maria bon te aomata ae rangi n ataaki ngkoa n arona ae kakamanga ao man kabwarariia. Ma ngke e a rikirake ni kara riki, e a moanna n tabeaianga ibukin ana mwakuri n neeti, bwa e maaka te tai are e na karaoa te kairua nakon ana aoraki iai. Ibukin rawawatan nanona iai e riki n aoraki ana iango. E kataia moa ni bwainaorakiia ibon irouna, ma imwina e kakaea buokana mairouia taokita, ao e tara n ibuobuoki bwainaorakiana anne. Ma ngke e a kakerikakaki man ana mwakuri ngke ai 57 ana ririki ni maiu, e a manga oki aorakina ma te rawawata n nano ae rangi ni korakora, n te aro ae e aki kona n nora katokana. Nei Maria e a moanna n iangoa bakaburean maiuna.

“Tao 10 te katebubua mai buakoia aomata aika a rawawata nanoia, aika a kataia ni bakaburei maiuiia,” e taku te Professor José Alberto Del Porto, man te São Paulo University. “E kangaanga kakoauan ae a mwaiti riki aomata ake a mate man te bakabure, nakon mwaitiia aomata ake a mate ngke a kamateaki irouia taan tiritiri, ma bon aio te koaua ae kananokawaki,” e ribootinna te mataniwi ibukin te kuakua n te U.  S., are arana Dr. David Satcher.

N taai tabetai, te aomata are e kataia ni bakaburea maiuna, e karaoa anne bwa kaotan ana bwaebwaeti ibukin tangiran buokana. Ao te koaua bwa kaain ana utu ma raoraona a na bon tangiria ni karaoa ae riai nakon te aomata are e a bwara nanona. E na bon aki ibuobuoki ngkana a taekinaki taeka n aron: “Tai manga nanoangaiko ibon iroum,” “A mwaiti riki aomata aika a kangaanga riki aroni maiuiia nakoim,” ke “Ti bane n namakina te kangaanga n taai tabetai.” N onean mwin anne, bukin tera bwa ko aki riki bwa te rao ni koaua ma ni kakauongo raoi iai? Eng, kataia ni buoka te aomata are e bwara nanona bwa e na nora manenan te maiu aei.

E korea ae kangai te tia oto rongorongo are te I-Buranti are arana Voltaire: “N arona, te mwaane are e bakaburea maiuna n te bong aei ibukin taonakina n te nanokawaki, e na boni bae ni mwinikora iai ngkana e kona, ngke arona bwa e kamaanna riki teuana te wiki.” Ma a na kanga ngkanne aomata ake a bwara nanoia ni kona n nora manenan te maiu aei?

[Kabwarabwara ae nano]

[Taamnei n iteraniba 3]

E a tabe n rikirake mwaitiia rooro-n-rikirake ao akana a ikawai, aika a bakaburei maiuia

[Taamnei n iteraniba 4]

Ko na kanga ni buoka te aomata are e bwara nanona?