E Karika te Moani Mwaane ao n Aine te Atua

E katauraoa te onnaroka Iehova n te tabo ae arana Eten. E onrake n taian uee, aroka, ao maan. Imwina ao te Atua e karika te moani mwaane ae Atam man te tano, ao e uka te ikeike nakoni bwangabwangani bwairina. Ko ataia bwa tera ae riki? E a riki te mwaane anne bwa te aomata ae maiu! E mwiokoa Atam Iehova bwa e na tararuaa te onnaroka ao e na arania maan ni kabane.

E anga te tua ae kakawaki Iehova nakon Atam. E kangai: ‘Ko kona n amwarake mani kaai ni kabane ma tii teuana ae okoro ae ko na aki roko iai. Ngkana ko kana uaana, ko na boni mate.’

Imwina ao e taku Iehova: ‘N na karaoa te tia buoka Atam.’ E kamatunakoa Atam ao e anaa rinikaokaona teaina ni karika iai buun Atam. Aran neiei bon Ewa. A riki Atam ma Ewa bwa te moan utu. Tera ana namakin Atam ibukini buuna? E rangi ni kukurei teuaei ao e taku: ‘Nora te bwai ae e karaoia Iehova man rinikaokaou! E a reke te aomata ae ai arou!’

E tuangia Atam ma Ewa Iehova bwa a na karikiia natiia ao ni kaona te aonnaba. E tangiriia bwa a na uaia ni mwakuri ma te kukurei ni karika te aonnaba ni kabutaa bwa te bwaretaiti, ke te tabo ni kamaangang ae tamaroa kaanga aron te onnaroka are i Eten. Ma e aki koro bukin anne. Bukin tera? Ti na reiakinna riki n te mwakoro are imwina.