E Karika Karawa ma te Aonnaba te Atua

Bon ara tia Karikiriki Iehova ae te Atua. E karikii bwaai ni kabane aika ti kona n nori ao aika ti aki kona n nori. Imwain ae e karikii bwaai aika ti kona n nori, e karikiia anera aika rangi ni bati. Ko ataia bwa antai anera? Bon aomata ake e karikiia Iehova n ai arona. Ti aki kona n noriia, n aron ae ti aki kona naba n nora te Atua. E karika Iehova te moan anera bwa te tia buokia. E buoka Iehova te anera anne ni karikii itoi, buraneti, ao bwaai ni kabane. Teuana mai buakoni buraneti akanne boni mwengara ae tikauarerei ae te aonnaba.

Imwina, e katauraoa te aonnaba Iehova ibukia maan ao aomata aika a na maeka iai. E karaoa te oota man taai bwa e na kaotaa te aonnaba. E karaoi maunga, marawa, ao karaanga.

Tera ae e karaoia imwina? E taku Iehova: ‘N na karaoa te uteute ao aroka ma kaai.’ A a tabe n rikirake uaanikai aika bati aika kakaokoro, aroka aika kakanaki, ao taian uee. Imwina ao Iehova e karikiia maan ni kabane aika iai baia ni kiba, aika mwamwae n te ran, ao aika kawakawa. E karikiia maan aika uarereke n aron te rabiti ao aika totoa n aron te erebwanti. Tera te man ae ko tatangiria?

Imwina, e taku Iehova nakon te moan anera: “Ti na karaoa te aomata.” A kaokoro aomata ma maan. A kona ni karaoi bwaai. A kona n taetae, ni ngarengare, ao n tataro. A na tararuaa te aonnaba ma maan. Ko ataia bwa antai te moan aomata? Ti na noria.