MWAKORO 25

N na Kangaa ni Katoka te Anua ae Kumekumean au Bwai ni Kakariki?

“I moana kumekumean au bwai ni kakariki ngke wanua au ririki. I a ataia imwina riki bwa e kairua te anua aei. E rawawata nanou ngke I a manga karaoia naba. I titirakinai n taku: ‘E na kangaa te Atua n tangira te aomata ae aekakiu?”—Luiz.

NGKANA ko a roko n te roro n ikawai ao ane e nang bae ni korakora tangiran te kakan iein. Tao e na kona ni kairiko anne bwa ko na kumekumea am bwai ni kakariki.a A mwaiti aika a taekinna ae akea karuanikain te anua anne. A kona ni kangai: “Akea ae e ikoaki mai iai.” Ma iai riaina ngkai ti na aki karaoia. E korea ae kangai te abotoro Bauro: “Mangaia ae kam na kamate bwain rabwatami . . . ae kaineti ma . . . bwaruan te wewene ni bure.” (I-Korote 3:5) Te aomata are e kumekumea ana bwai ni kakariki, e aki kamatea mai nanona bwaruan te kan wene ni bure ma e a kaungaa riki. Iangoi baika imwina aikai:

● E karin iango ni bangaomata te anua ae kumekumean te bwai ni kakariki. N te katoto, e kona te aomata anne ni kabotoi ana iango tii i aon ana namakin rabwatana.

● E kona te aomata ae kumekumea ana bwai ni kakariki n aki kaotiota karinean raona ao n iangoia bwa kaanga tii bwaini kakukureiana n te wene n taanga.

● Kumekumean te bwai ni kakariki, e kona ni kaira temanna bwa e na tii iaiangoia i bon irouna, ao e kona anne ni karekei kangaanga ngkana a a botaki taanga.

Ngkana e roko namakinan te kani kaibwabwaru ao kakorakorako moa n taua baangim mai iai, n oneani mwin are ko a boni kumekumea naba am bwai ni kakariki. (1 I-Tetaronike 4:4, 5) Ni buokam iai, e tua te Baibara bwa ko riai moa ni kararoako ma baike a na kauekea tangiran te kani kaibwabwaru. (Taeka N Rabakau 5:8, 9) Ma tera arom ngkana ko a tautoronaki n te anua ae kumekumean am bwai ni kakariki? Tao ko a tia ni kataia ni katokia ma ko boni konaaki naba iai. E bebete iangoan ae ko aikoa kona ni bita arom iai, ao e a kangaanga maiuakinan ana kaetieti te Atua. Anne ana iango te teinimwaane ae Pedro ao e taku: “E rawawata nanou ngke I a manga karaoia naba. Irou, e a aki kona ni kabwaraa au bure te Atua. E aikoa bebete irou te tataro.”

Kaninikoriako ngkana anne am namakin. Tai kabwaraa nanom iai. A mwaiti rooro n rikirake ao bon ikawai naba, ake a a tia n tokanikai i aon te anua ae kumekumean aia bwai ni kakariki. Ko kona naba ngkoe n tokanikai!

Taobaraaean te Uringaaba Ibukin te Bure

E kaotaki i moa riki bwa a aki toki n uringaaba ibukini karaoan ae bure, te koraki ake a kukumekumei aia bwai ni kakariki. Akea te nanououa bwa “[nanokawakia] aei ae boraoi ma nanon te Atua” e kona ni kakorakoraa nanoia ni kani kanakoa anuaia anne. (2 I-Korinto 7:11) Ma e aki kona ni katokanikaiko kamaanan te uringaaba ibukin te bure. E kona ni kabwaraa nanom n te aro are ko nang rawa ni kabokorakora ni kaitaraa.—Taeka N Rabakau 24:10.

Ai ngaia are kananomatoako n ataa karuanikain te anua anne. Kumekumean te bwai ni kakariki bon te aroaro ae aki itiaki. Ko a ‘tautoronaki iai n taiani kaibwabwaru ao tangirani kakukureian te rabwata’ ao e kairiko nakon iango aika bubuaka. (Tito 3:3) Ma e aki kakaiaki mwina n aroni kakaiakin mwin te wene ni bure. (Iuta 7) Ngkana ko kukumekumea am bwai ni kakariki ao tai iangoia bwa e aikoa kona Iehova ni kabwaraa am bure. Ko riai ni kabokorakora n taobaraaea angina ngkana e roko, ao tai kabwaraa nanom ni kaitaraa!

E na bon rawawata nanom ngkana ko a manga karaoia naba. Ngkana e riki anne ao tai iangoiko bwa ko a buakaka. Tai bwarannano. Ma ukeria nako bwa tera are e kauekea kani manga karaoana ao kataia ni kararoako mai iai.

Kananoa am iango i aon ana tangira ma ana akoi te Atua. E taku te tia areru ae Tawita, are ngaia naba ngkoa te tia kakaraoi baika bubuaka: “N ai aron te karo ae nanoangaiia natina, e nanoangaiia akana maakua Iehova. Bwa e atai raoi aroni karaoara, e uringira bwa taano ngaira.” (Taian Areru 103:13, 14) E bon ataia Iehova ae ti aki kororaoi ao e “tauraoi ni kabwarabure.” (Taian Areru 86:5) Ma e tangiria bwa ti na kabanei korakorara n ongeaba nakoina. Ai ngaia are baikara mwaneka aika manena ake a kona ni katokanikaiko i aon te anua anne?

Tuoa Raoi Am Kaakibotu. Ko mamatakuakin taamnei ke kaongora i aon te TV ke n te intanete, i aoni baika a na kauekea nanom ni kani kumekumea am bwai ni kakariki? E wanawana te tia areru ngke e tataro nakon te Atua ni kangai: “Katannakoi matau man taraan te bwai ae akea manenana.”bTaian Areru 119:37.

Katabetabea am iango ni bwaai riki tabeua. E kauring n taku te tari temanna ae arana William: “Imwaini matum, wareka moa te bwai teuana ae irekereke ma bwaai n taamnei. E rangi ni kakawaki bwa ko na iangoi baika boto i aon te Baibara imwain raoi matum.”—I-Biribi 4:8.

Maroroakina am kangaanga ma temanna. Tao e na kona ni kangaanga karekeani buokam mairoun temanna ngkana ko maamaa. Ma ngkana ko ukera nako buokam ao ane ko na tokanikai i aon te anua anne! Anne ae e rinanona te tari ae arana David. E taku: “I maroro ma tamau n tii ngaia ibukin au kangaanga. I aki kona ni mwaninga te bwai are e taekinna. E karaua nanou ma te moangare n taku: ‘Ko kakukureia nanou.’ E ataia bwa e aki bebete irou tabekan te maroro aei. E rangi n unga nanou iai ao e buokai bwa N na kananomatoaai ni kanakoa anuau arei.

“E a kaotii ngkanne nakoiu kiibu tabeua ake a na buokai n iangoia bwa tiaki ngai te aomata ae ‘Í a buakaka,’ ao e a manga tibwai nakoiu imwina riki kiibu ake a na kaotaai n aroni karuanikain anuau ae kairua aei. E tuangai bwa ‘N na aki karaoia’ i nanon tabeua te tai ao ti na manga maroro imwin taai akanne. E tuangai naba bwa N na aki karawawataa nanou ngkana I a manga karaoia, ma N na kataia ni waakinako ao n aki karaoia ngkana e a manga roko angina.” Tera ana kabanea n taeka David? E taku: “E bati kakabwaiaau man ataakin ae iai ae e ataa au kangaanga ao e buokai iai.”c

[Footnotes]

[Caption on page 181]

“Birinako mani baike a bwabwarui rooro n rikirake, ao ukoukora te raoiroi, te onimaki, te tangira, ao te rau, n ikotaki ma te koraki aika wewetea te Uea ma nanoia ae itiaki.” —2 Timoteo 2:22.

BUOKAM

Tataro imwain korakoran angina. Butiia Iehova bwa e na anganiko “te korakora ae riaoni korakoraia aomata” bwa ko aonga n tokanikai i aoni kataakim.—2 I-Korinto 4:7.

KO ATAIA . . . ?

E kona ni konaaki te aomata ae mamaara n tangiran te kani wene n taanga. Ma e rabakau n taubaang nako iai ane e nanomatoa ni kan tokanikai i aona, e ngae naba ngkana akea ae e noria.

MWAKURIANA!

I kona ni kabotoi au iango i aoni baika a itiaki ngkana I ․․․․․

N oneani mwin are N na konaaki n angina, N na ․․․․․

Te bwai ae I riai n titirakinia au karo ni kaineti ma aei ․․․․․

TERA AM IANGO?

● E aera ngkai e kakawaki ururingan ae e “tauraoi ni kabwarabure” Iehova?—Taian Areru 86:5.

● E karikiko te Atua ma tangiran te kani wene n taanga ma e tua naba bwa ko riai n taubaang, are nanona bwa tera te bwai ae e ataia te Atua ae ko kona ni karaoia?

[Blurb on page 182]

“Imwin tokanikaiu n au kangaanga, I a karekea mataniwin nanou ae itiaki i matan Iehova ae te bwai ae I aki tangiria ni kabuaa!”—Sarah

[Picture on page 180]

Ngkana ko bwaka n am tai ni biri ao tiaki nanona bwa ko nangi manga oki ni biri mai moana. N aron naba anne, ngkana ko a manga kumekumea am bwai ni kakariki, tiaki nanona bwa ai akea uaan am kakorakora are ko a tia ni karaoia.