Reirei 7
Kaania te Atua n te Tataro
Bukin tera ngkai e kakawaki te taneiai n tatataro? (1)
Ti riai n tataro nakon antai, ao tera aron te tataro ae riai? (2, 3)
Baikara bwaai aika riai n tataroaki? (4)
N ningai ae ti riai n tataro? (5, 6)
E ongoraei tataro ni kabane te Atua? (7)
1. Te tataro, bon te taetae ni kawai ma te Atua ma te nanorinano. Ko riai n taneiai n tatataro nakon te Atua. N te aro aei, ko kona ni kaaniia riki, bwa kaanga raoraom ae rangi n tangiraki. Moan te kakannato ma ni mwaaka Iehova, ma e ngae n anne, e kona naba n ongoraea ara tataro! Ko tatataro nakon te Atua?—Taian Areru 65:2; 1 I-Tetaronike 5:17.
2. Te tataro, bon kanoan naba ara taromauri. Ti riai n tataro nakon te Atua ae Iehova n tii ngaia. Ngke e mena i aon te aonnaba Iesu, e tataro tii nakon Tamana, ao tiaki nakon te aomata temanna riki. Ti riai naba ni karaoa anne. (Mataio 4:10; 6:9) Ma ti riai n tataro inanon aran Iesu n taai nako. Karaoan aei, e kaotia bwa ti karinea nakoan Iesu ma n onimakina ana karea ni kaboomwi.—Ioane 14:6; 1 Ioane 2:1, 2.
3. Ngkana ti tataro, ti riai n taetae nakon te Atua mai nanora. Ti aki riai n tataro n taekin bwaai aika a tia ni mate ni kuna iroura, ke ni wareka ara tataro man te boki n tataro. (Mataio 6:7, 8) E aki akaka arora, ke tein rabwatara, ma ti riai ni kaota te karinerine, ao ti kona n tataro n taai, ao taabo nako. E kona naba te Atua n ongoraei tataro aika ti taekin inanora, n aki kanenei bwanara. (1 Tamuera 1:12, 13) E raoiroi ngkana ti kaea te tabo ae rau, ae akea aomata iai, ngkana ti tangiria n tataro nakon Iehova n tii ngaira.—Mareko 1:35.
4. Baikara bwaai aika ko kona n tataroia? Bwaai ni kabane aika iai rekerekeia ma am iraorao ma ngaia. (I-Biribi 4:6, 7) E kaotaki n te katoto ibukin te tataro, bwa ti riai n tataro ibukin aran Iehova ao ana kaantaninga. Ti kona naba ni bubuti reken bwaai aika ti kainnanoi ibukin te maiu iroura, ibukin kabwaran ara bure, ao ibukin buokara n eki nako taiani kariri. (Mataio 6:9-13) Ti aki riai n tataro, tii ibukin bwaai aika ti tangiri. Ti riai n tataro tii ibukin bwaai aika boraoi ma nanon te Atua.—1 Ioane 5:14.
5. Ko riai n tataro ngkana e tuangko nanom bwa ko tangiria ni kaitaua ke ni karaoiroa te Atua. (1 Rongorongo 29:10-13) Ko riai n tataro ngkana iai am kanganga ae kataa am onimaki. (Taian Areru 55:22; 120:1) E raoiroi naba ngkana ko tataro imwain amwarakem. (Mataio 14:19) E kaungaira Iehova bwa ti na tataro “n aki toki.”—I-Ebeto 6:18.
6. Ti rangi ni kainnanoa te tataro ngkana ti a tia ni karaoa te bure teuana ae rawawata. Aikai taai aika ti riai n onnonia Iehova bwa e na nanoangaira ma ni kabwara ara bure. Ngkana ti kaota ara bure nakoina, ma ni kakorakoraira n aki manga karaoia, e a tauraoi te Atua ni “kani kabara buure.”—Taian Areru 86:5; Taeka N Rabakau 28:13.
7. Iehova, e tii ongoraea aia tataro aomata aika raoiroi. Ngkana e na ongoraea am tataro te Atua, ko riai n tabe ni keiakina kaboraoani maium ma ana tua. (Taeka N Rabakau 15:29; 28:9) Ko riai n nanorinano ngkana ko tataro. (Ruka 18:9-14) Ko riai ni kataia ni kakoroa nanon bwaai aika ko tataroi. Ko kaotia iai bwa iai am onimaki ao iai nanon am taeka. E na kaeka am tataro Iehova, tii ngkana ko karaoi bwaai aikai.—Ebera 11:6.