Reirei 8
Te Maiu n Utu ae Kakukureia te Atua
Tera nakoan te bu-te-mwaane n te utu? (1)
Tera aroaron te bu-te-mwaane ae riai nakoni buna? (2)
Baikara bwaai aika e mwiokoaki iai te tama? (3)
Tera ana mwakuri te bu-te-aine n te utu? (4)
Tera ana tua te Atua ibukia kaaro ao ataei? (5)
Tera ana reirei te Baibara ibukin te raure ao te buu-raure? (6, 7)
1. E taku te Baibara bwa atun te utu, te bu-te-mwaane. (1 I-Korinto 11:3) Te bu-te-mwaane, e riai ni buna te aine ae tii temanna. A riai ni karekea aia mare ae eti i aan ana tua te tautaeka.—1 Timoteo 3:2; Tito 3:1.
2. Te bu-te-mwaane, e riai n tangira buna, n ai aron tangirana ibon irouna. E riai n tabeakina buna n ai aron Iesu n tabeakinia taan rimwina. (I-Ebeto 5:25, 28, 29) E aki riai n orea buna ke ni karaoa te aro teuana ae buakaka nakoina. Ma e riai ni karinea ma n akoa buna.—I-Korote 3:19; 1 Betero 3:7.
3. E riai ni kakorakora te tama, ni mwakuri ni kawakina ana utu. E riai ni karekea kanaia, kunnikaia ao mwengaia, buna ao natina. E riai naba te tama, ni karekei bwaai aika kainnanoaki iroun ana utu n te itera n taamnei. (1 Timoteo 5:8) E biri rimoa ni buoka ana utu bwa a na reirei taekan te Atua ma Ana kaantaninga.—Te Tua-Kaua 6:4-9; I-Ebeto 6:4.
4. E riai ni buoka buna te bu-te-aine. (Karikani Bwaai 2:18) E riai ni buoka buna n reireinia natiia ma ni kataneiaia. (Taeka N Rabakau 1:8) E taku Iehova bwa te bu-te-aine, e riai n tangira ma ni mwamwannanoa ana utu. (Taeka N Rabakau 31:10, 15, 26, 27; Tito 2:4, 5) E riai ni korakora karineani buna irouna.—I-Ebeto 5:22, 23, 33.
5. E tua te Atua bwa a riai n ongeaba irouia aia kaaro ataei. (I-Ebeto 6:1-3) E tangiria kaaro bwa a na reireiniia ma ni kaeti aroia natiia. A riai ni kabanea aia tai ma natiia kaaro, ma n reirei naba n te Baibara ma ngaiia, ni buokia ni bwaai aika a kainnanoi n te itera n taamnei, ao ibukin raoiroin nanoia. (Te Tua-Kaua 11:18, 19; Taeka N Rabakau 22:6, 15) Kaaro, a aki riai n reireiia ke ni katuaeia natiia n te aro ae riaon ae riai, ke ae iowawa.—I-Korote 3:21.
6. Ngkana iai aia kanganga rao ni mare n aron aia iraorao, a riai ni kataia ni kamanena ana reirei te Baibara. E kaungaira te Baibara bwa ti na bwaina te tangira ao te kabwara bure. (I-Korote 3:12-14) E aki taekina te raure Ana Taeka te Atua, bwa te anga teuana ae e kona ni katokaki iai kanganga aika uarereke. Ma te bu-te-aine, e kona ni kitana buna ngkana (1) buna, e rawa ni karekea maiuna ma maiun natiia, (2) ngkana e rangi n iowawa buna, ao e taku te aine bwa e kona ni kabuanibwai marurungina ke maiuna irouna, ke (3) ana kairiribai te mwaane, e tuka aron taromaurian Iehova iroun te aine.—1 I-Korinto 7:12, 13.
7. A riai ni kakaonimaki imarenaia rao ni mare. Te wene ni bure, bon te bure nakon te Atua ao nakon raom ni mare. (Ebera 13:4) Te Baibara, e kariaia te buu-raure ao te manga mare, tii ngkana te bu temanna, e a tia ni wene n taanga itinanikun te mare. (Mataio 19:6-9; I-Rom 7:2, 3) E un Iehova ngkana a buu-raure aomata ni manga mare ma te aomata temanna, n akea bukina ae kariaiakaki n te Baibara.—Maraki 2:14-16.
[Caption on page 17]
A mwiokoaki kaaro iroun te Atua bwa a na reireinia natiia ma ni kaetii aroia
[Caption on page 17]
E karekei bwaai aika kainnanoaki iroun ana utu n te itera n rabwata ao te itera n taamnei, te karo ae tatangira