Reirei 6
Tera Ana Tautaeka N Uea te Atua?
E mena iia Ana Tautaeka n Uea te Atua? (1) Antai te Uea iai? (2)
Iai riki aomata tabemwaang aika a ibuobuoki ma te Uea aei ntautaeka? Ngkana iai, ao iraman? (3) Tera ae kaotia bwa ti mena inanoni boong aika kaitira? (4) Tera ae na karaoia Ana Tautaeka n Uea te Atua ibukin te botannaomata, n te tai ae na roko? (5-7)
1. Ngke e mena i aon te aba, Iesu, e reireinia taan rimwina, bwa a na tataro ibukin Ana Tautaeka n Uea te Atua. Te tautaeka n uea, bon te aekan tautaeka ae atuna, te uea. Ana Tautaeka n Uea te Atua, bon te tautaeka ae kaokoro. E kateaki i karawa, ao e na taua taekan te aonnaba aei. E na katabua ke n neneboa aran te Atua. E na kakoroa nanon te Atua i aonnaba, n ai aron kakoroana i karawa.—Mataio 6:9, 10.
2. E berita te Atua bwa bon Iesu ae na riki bwa te Uea n Ana Tautaeka n Uea. (Ruka 1:30-33) Ngke e mena i aon te aba, Iesu, e kaotia bwa e na riki bwa te tia Tautaeka ae e kororaoi, ae akoi, ao ae na kaeti taeka n te aro ae riai. E aki kaueaki bwa te Uea n Ana Tautaeka n Uea te Atua n te tai are e manga okira karawa. (Ebera 10:12, 13) N 1914, Iehova, e angan Iesu te mwaaka n tautaeka are e kaman berita bwa e na anganna. Man te tai arei ni karokoa ngkai, e a tautaeka Iesu i karawa, bwa te Uea are rineaki iroun Iehova.—Taniera 7:13, 14.
3. Iehova e a tia naba n rineia mwaane ao ainen te aonnaba tabeman aika kakaonimaki, bwa a na nako karawa. A na tautaeka i aon te botannaomata ma Iesu, n aroia n uea, n taani motiki taeka, ao n ibonga. (Ruka 22:28-30; Te Kaotioti 5:9, 10) Iesu, e arania taan ibuobuoki n tautaeka n ana Tautaeka n Uea aikai, bwa “te nanai ae uarereke.” Bon 144,000 mwaitiia.—Ruka 12:32; Te Kaotioti 14:1-3.
4. Ngke e a riki bwa te Uea Iesu, e karenakoa Tatan ma ana anera aika buakaka mai karawa, nako rarikin te aonnaba. Boni ngaia anne bukin rikini bwaai aika buakaka i aon te aonnaba man 1914 ni karokoa ngkai. (Te Kaotioti 12:9, 12) Buaka, roongo, aoraki aika kamamate, rikiraken te buakaka—bwaai aikai ni kabane, bon kanoan te ‘kanikina’ ae kaotia bwa e a tabe n uea Iesu ngkai, ao e a mena inanon kabaneani bongina, te waaki ae buakaka i aon te aonnaba aei.—Mataio 24:3, 7, 8, 12; Ruka 21:10, 11; 2 Timoteo 3:1-5.
5. N te tai ae e a kaan n roko ngkai, Iesu e na motiki taekaia aomata, ma ni kaokoroiia, n ai aron te tia kawakin tiibu ae e karaureia tiibu ma kooti. “Tiibu,” bon aomata aika a tia ni kaotiia bwa ana toro aika kakaonimaki. A na anganaki te maiu are aki toki i aon te aonnaba. “Kooti,” bon aomata aika a rawa nakon Ana Tautaeka n Uea te Atua. (Mataio 25:31-34, 46) Iesu, e na kamaunaia aomata ni kabane aika ai aroia kooti, n te tai ae kaan n roko ngkai. (2 I-Tetaronike 1:6-9) Ngkana ko tangiria n riki bwa ana “tiibu” Iesu, ko riai ni butimwaea rongorongon te Tautaeka n Uea, ma n touu mwin bwaai aika ko reireiaki iai.—Mataio 24:14.
6. E bwenauaki te aonnaba ngkai nakon aaba aika mwaiti. Iai naba oin aia tautaeka aaba nako. A aki toki ni buaka imarenaia, aaba aikai. Ma Ana Tautaeka n Uea te Atua, e na onea mwin aia tautaeka aomata ni kabane. Bon tii ngaia te tautaeka ae na taua taekan te aonnaba ni kabuta. (Taniera 2:44) E na toki te buaka, te kakiriwe ao te tiritiri. A na bane aomata ni maeka n rau ma ni boo nanoia.—Mika 4:3, 4.
7. Inanon Ana Tautaeka n Uea Iesu ae Maanna Teuana Tenga te Ririki, a na bane aomata n riki bwa aomata aika kororaoi, ao e na riki bwa te baretaiti, te aonnaba ni kabuta. Imwain banen teuana tenga te ririki, e na tia Iesu ni karaoi bwaai ni kabane ake e tuangaki iroun te Atua. N te tai arei, e na manga kaoka te Tautaeka n Uea nakon Tamana. (1 I-Korinto 15:24) Bukin tera ngkai ko aki tuangia raoraom ao aomata aika a tangiraki iroum, taekan bwaai aika e na karaoi Ana Tautaeka n Uea te Atua?
[Caption on page 13]
I aan ana tautaeka Iesu, akea te kairiribai ao te nanonibwi