Mwakoro 7
Tera Mwin te Karitei?
1-3. E kanga ni kakoauaki man maanin te tai bwa e eti ana kauring Iehova?
NI KAINETI ma riain te Atua n tautaeka, tera mwin aia kairiri aomata aika inaomata mairoun te Atua i nanon tienture aikai? A kakoauaa aomata bwa e raoiroi riki aia kairiri nakon te Atua? Ngkana e neneraki raoi mwin ana waaki te botannaomata, ao e teretere iai bwa e aki.
2 E riki te karuanikai imwin rawaia ara moani karo nakon ana kairiri te Atua. E a reke iai te karawawataki nakoia ma kanoaia ni kabane. Ao akea riki ae a na bukinna bwa boni ngaiia oina. E taku Ana Taeka te Atua: “A arona te aro ae buakaka nako Ina, tiaki natina ngaiia, boni buakakaia baenne.”—Te Tua-Kaua 32:5.
3 E a tia n oti koauan ana kauring te Atua nakon Atam ma Ewa ni baike a riki n te aonnaba ni karokoa ngkai, are ngkana a rawa nakon ana kairiri te Atua ao a na kekerikaki marurungia ao n tokina a na mate. (Karikani Bwaai 2:17; 3:19) A boni kitana ana kairiri te Atua, ao imwin te tai ae maan, a a kekerikaki ma ni mate.
4. E aera ngkai rikiara bon te aki kororaoi, te aoraki ao te mate?
4 E kabwarabwaraki ni kangai te bae riki imwina, nakoia kanoaia ni kabane n I-Rom 5:12: “Ai aron rokon te bure i aon te aba iroun te aomata ae ti temanna [ae Atam, ae atun te botannaomata], ma rokon te mate n te bure; ao e ituia aomata ni kabaneia.” Mangaia are ngke a karitei ara moani karo nakon ana kairiri te Atua, ao a a riki iai bwa taani bure. Ni kaineti ma te tua ibukin te kariki, a a ituaki kanoaia n te aki kororaoi. Anne bukina ae ti bane n aki kororaoi iai, ma n aoraki ao ni mate.
5, 6. Tera aron aia kakorakora aomata ni karekea te rau ni koaua ma te kaubwai, ae oti man baika riiriki n te aonnaba?
5 E a bati ngkai te tienture n nako. Iai naba tautaeka ake a a tia n tei ao ni bwaka. A a tia ni kataaki aeka n tautaeka nako. Ma e ngae n anne, a bati baika karuanikai aika riiriki nakoia aomata. E noraki imwin onoua tenga te ririki, bwa e bon aki kairua iangoan ae a riai aomata n tia ni karikirakea te rau, te kaetitaeka ae riai ao te toronibwai ni kabutaa te aonnaba. A riai naba n tia n rabakau ni kaotiota te akoi ao te nanoanga, ma te katiteuanaki.
6 Ma e ngae n anne, boni kaitaraana raoi ae riki ngkai. Akea aia tautaeka aomata ae e a tia n noraki bwa e karekea te rau ni koaua ma te kaubwai nakoia aomata nako. N te ka-20 n tienture, ti a tia n nora tiringaia aomata aika mirion ma mirion mwaitiia n tain te Holocaust ae te waaki n tiritiri ae kakaiaki, ao e raka naba i aon 100 te mirion ake a mate n taiani buaka. N taai aikai ao e a bure warekaia aomata aika kammarakaki, a tiringaki ao a kabureaki ibukin te inanonano ao kakaokoron te iango ibukin te waaki n tautaeka.
Te Waaki ni Maiu ni Boong Aikai
7. E kanga kabwarabwaran aroia utu ni boong aikai?
7 N reitaki ma anne, iangoa aroia kaain utu ni boong aikai. E a tanoata ngkai te kakeru ao te iowawa. E a rangi ni bwainaki naba kabonganan te drug n te aro ae riao. E a taabangaki aorakin te wenenibure. A a rotaki aomata aika mirion ma mirion mwaitiia n te aoraki ae te AIDS. A a mamate aomata aika tatabebwi te mirion ibukin te baki ke te aoraki ni katoa ririki, ma e ngae n anne iai aika rangi ni maiu ni kaubwai. E a kuribwaiaki te aonnaba ao e a kabarekaki irouia aomata. A a mangao utu n taabo nako ao a a kitana te aroaro ni maiu ae riai. Eng, boni bannan raoi te tia kairiri ae buakaka ae “atuan aon te aba” ae Tatan, te waaki ni maiu ni boong aikai. Bon uean te aonnaba ngaia ae aki tatangira, akea ana nanoanga ao e rangi ni babakanikawai.—2 I-Korinto 4:4.
8. E aera ngkai ti aki arana aia kakorakora aomata bwa te rikirake ni koaua?
8 E a tia ni kariaia te Atua te tai ae tau maanna bwa a na karikirakei iai rabakauia aomata ao kaubwaia. Ma iai te rikirake ni koaua, ngkai e a oneaki mwin te kainikatebe ma kanoana n te katii te bururu, tangke ma wanikiba ni buaka, ao mitiaera aika mwaakaroiroi? Iai te rikirake ngkai a a kona ni mwananga aomata nako tinanikun te aonnaba, ma e teimatoa n aki kona n rau n te aba? Iai te rikirake ngkai a a maaku aomata n ririaki n te tairiki ke n te ngaina n taabo tabeua?
Baika Oti ni Waakinakon te Tai
9, 10. (a) Tera ae rangi n teretere man tienture aika tibwa nako aikai? (b) E aera te Atua ngkai e aki taua inaomatara n rinea ae ti na karaoia?
9 E oti imwin noran baika riki n tienture aikai, bwa a bon aki kona n tokanikai aomata n aia waaki i bon irouia n akea ana kairiri te Atua. E aki riai bwa a na karaoa anne n aron ae e aki riai bwa a na aki amwarake, ni moi ao n ikeike. E teretere ngkanne te koaua aei: Ti karaoaki bwa ti riai ni mena i aan ana kairiri ara tia Karikiriki, n aron ae ti karikaki bwa ti riai n amwarake, ni moi ao n ikeike.
10 Ibukina bwa e tuai ni katoka te buakaka te Atua, e a kaotiota iai mwin aki kabonganakin raoi inaomatara n rinea ae ti na karaoia. Te inaomata n rinerine bon te bwaintangira ae kakawaki mairoun te Atua, ao n onean mwin are e na taua mairouia aomata, e kariaia bwa e na noraki mwin aki kabonganana raoi. E eti ngkanne are e taekinaki n Ana Taeka te Atua ae kangai: “Tiaki ana bwai te aomata ae nakonako te kaeti eueutakina.” E rangi n eti naba ngke e kangai: “E taua aron te aomata temanna te aomata temanna ni karekea oini kaina iai.”—Ieremia 10:23; Te Minita 8:9.
11. E toki te karawawataki n aia kairiri aomata?
11 Kariaiakaia aomata iroun te Atua bwa a na tautaeka i nanon onoua tenga te ririki, e oti iai bwa e aki kona ni katoka te karawawataki te aomata. Akea te tai ae e a tia ni katokia iai. N te katoto, e aki kona ni kaeta te karawawataki ae reke man aia kairiri aomata, Uean Iteraera ae Toromon n ana bong, e ngae ngke e rangi ni wanawana, e korakora kaubwaina ao e bati mwaakana. (Te Minita 4:1-3) N aron naba anne, a aikoa kona taan tautaeka ni boong aikai ni katoka te karawawataki, e ngae ngke e a korakora rikiraken te rabakau. Ma ae kakaiaki riki, e oti n rongorongon rimoa bwa e rikirake te karawawataki man aroia aomata n aki mena i aan ana kairiri te Atua.
E Raababa Nako Ana Taratara te Atua
12-14. Baikara kakabwaia aika reke ngkai e a kamaana moa te karawawataki te Atua?
12 Ti rotakibuaka ngkai e tuai ni katoka te karawawataki te Atua. Ma e raababa nako ana taratara, n ataakin mwina ae raoiroi ae na roko rimwi riki. A na kakabwaiaki ana karikibwai te Atua n ana babaire aei, tiaki tii i nanon ririki tabeua ke ngaa n ririki, ma i nanon ririki aika mirion ma mirion, eng n aki toki.
13 Imwin anne, ngkana iai riki temanna ae manga kabongana inaomatana ni kananououaa raoiroin ana babaire te Atua, e na aki manga anganaki ana tai ni kataia ni boutokaa ana waaki anne. Ni kamaanan te karitei i nanon ngaa ma ngaa te ririki, e a katauraoa mai iai te banna ni katoto te Atua ibukin te eti ao te buakaka ae kona ni kamanenaki n aki toki.
14 Ibukina bwa e tuai ni katoka te buakaka ao te karawawataki Iehova n te tai aei, e na teretere kakoauan ngkanne ae akea ae kona n tokanikai ngkana e aki ongeaba irouna. E na aki nanououa te aba bwa e a ataaki ae a aki kona ni karekei kakabwaia n aki toki, aia babaire aomata ke anera aika buakaka. Mangaia are e na boni karaoa ae eti te Atua ngkana e kamaunaia aomata aika manga karitei. “E na kamaunaia akana buakaka ni kabaneia.”—Taian Areru 145:20; I-Rom 3:4.
[Taamnei n iteraniba 15]
Tokia ara moani karo imwin rinean te kan inaomata mairoun te Atua bon te kara ao te mate
[Taamnei n iteraniba 16]
E kakoauaki bwa e karuanikai aia tautaeka aomata ae inaomata mairoun te Atua
[Te Kabwarabwaran te Taamnei 16]
U.S. Coast Guard photo