Mwakoro 6
Bukina Ngkai E Tuai ni Katoka te Karawawataki te Atua
1, 2. A kanga ara moani karo n uruana raoiroin moani karikaia iroun te Atua?
TERA te kairua ae riki? Tera ae uruana raoiroin moani karikaia ara moani karo iroun te Atua n te Baretaiti are Eten? E aera ngkai e a oneaki mwin te maeka n rau ao ni kukurei n te Baretaiti ngkoa, nakon karaoan ae buakaka ao te karawawataki i nanon ririki aika ngaa ma ngaa?
2 Bon ibukina bwa a aki kabongana raoi inaomataia n rinea ae a na karaoia, Atam ma Ewa. A kakeaa iangoan te koaua are a karikaki bwa a na aki maenako ma te Atua ao ana tua. A iangoia bwa a na inaomata mairoun te Atua, n iangoan ae e na nakoraoi riki iai maiuia. Mangaia are a a riaon tian inaomataia mairoun te Atua.—Karikani Bwaai, mwakoro 3.
Te Bukibuki ni Kaineti ma te Riai n Tautaeka i Aoni Bwaai ni Kabane
3-5. E aera ngke e a aki kamaunaia naba Atam ma Ewa te Atua, ao ni manga moani karikiia aomata?
3 E aera te Atua ngke e a aki kamaunaia naba Atam ma Ewa, ao ni karikiia riki te taangana? Ibukina bwa e a tia ni kabuakakaki arona ao riaina n tautaeka i aoni bwaai ni kabane.
4 E kangai te titiraki mai iai: Antai ae iai riaina n tautaeka, ao antai ana kairiri ae eti? Bon tii te Atua ae iai riaina n tautaeka i aoni bwaai ni kabane, kioina ngkai moan te mwaaka ao bon te tia Karikiriki. Ibukina bwa moan te wanawana, e na rangi n nakoraoi ngkanne ana kairiri i aoni baike e karikii. Ma e a tia ngkai ni kabuakakaki aron te Atua n tautaeka. Irarikina, te koaua bwa iai buren karikan te aomata irouna? Ti na nenera kaekan te titiraki ae kaineti ma kakaonimakin te aomata, rimwi riki.
5 Kioina ngkai a buubai aomata man ana kairiri te Atua, e a manga rio iai te titiraki ae kangai: A kona n nakoraoi maiuia aomata ngkana a aki tautaekanaki iroun te Atua? E ataa kaekan aei te tia Karikiriki, ma te anga ae nakoraoi ae a na kona iai ni mataata aomata, boni man kariaiakaia ni bairea inaomataia i bon irouia. A a tia n rinea ae a kani karaoia ni kaineti ma inaomataia, mangaia are e kariaia te Atua.
6, 7. E aera ngkai e kariaia te Atua bwa a na inaomata aomata i bon irouia, n te tai ae rangi ni maan?
6 N anganakia aomata te tai ae tau bwa a na kabongana iai inaomataia, e na noria iai te Atua bwa a kona aomata ni kanakoraoa maiuia i bon irouia, ke a kabwaia riki n tautaekanakiia irouna. E na tau maanin te tai ibukia aomata bwa a na kona iai ni mataata n aron waakin aia tautaeka, aia bitineti, rabakauia n aonnaba ao rabakauia ni kuakua.
7 Mangaia are e angania aomata aia tai te Atua bwa a na kabongana inaomataia n aron ae a tangiria ni karokoa te tai aei, bwa e aonga n teretere iai bwa e na nakoraoi aia tautaeka aomata n akea ana ibuobuoki te Atua, ke e na aki. Mangaia are e kona te aomata n rinea te atataiaomata ke te iowawa, te tangira ke te kairiribai, ao te raoiroi ke te buakaka. Ma e na boni kaaitara ma mwin te baere e rineia, n aron te raoiroi ma te mweeraoi, ke te buakaka ma te karawawataki.
Aia Karitei Anera
8, 9. (a) E kanga ni moanaki te karitei irouia anera? (b) Antai ake a kairarangaki iroun Tatan bwa a na karitei irarikia Atam ma Ewa?
8 Iai riki te itera teuana ae riai n iangoaki. Tiaki tii ara moani karo ake a karitei nakon ana tautaeka te Atua. Ma antai naba ake iai n te tai arei? Bon anera. Imwain karikaia aomata iroun te Atua, ao e karikiia anera aika mwaitikurikuri aika kakannato riki, bwa a na maeka i karawa. A karikaki naba ma inaomataia, ao riaia n aantaeka nakon ana kairiri te Atua.—Iobi 38:7; Taian Areru 104:4; Te Kaotioti 5:11.
9 E kaotia te Baibara bwa e moanaki te karitei i karawa. Iai te anera ae kan inaomata i bon irouna, ma n tangiria bwa e na taromauriaki irouia aomata. (Mataio 4:8, 9) E a kairiia Atam ma Ewa ana karitei te anera aei bwa a na karitei naba, ni kaineti ma ana bukibuki are aongkoa e taua te bwai ae raoiroi te Atua mairouia. (Karikani Bwaai 3:1-5) Mangaia are e a aranaki bwa te Riaboro (te tia Uarao) ao Tatan (te tia Kaaitara). Imwina, e a manga kairiia anera ake tabeman bwa a na karitei naba ao a aranaki bwa taimonio.—Te Tua-Kaua 32:17; Te Kaotioti 12:9; 16:14.
10. Tera mwin aia karitei aomata ma anera?
10 A anga tauan taekaia aomata nakon Tatan ma ana taimonio, n aroia ni karitei nakon te Atua. Anne bukina ae e arana iai Tatan te Baibara bwa “atuan aon te aba,” are e “kamataki nanoia . . . aomata ake a aki onimaki.” Mangaia are e taku Ana Taeka te Atua bwa “a bane kaain aonaba ni wene i nanon teuare buakaka.” E arana Tatan Iesu bwa “uean aonaba.”—2 I-Korinto 4:4; 1 Ioane 5:19; Ioane 12:31.
Bukibuki Aika Uoua
11. Tera te bukibuki teuana riki are e kabuakakaa iai te Atua Tatan?
11 Iai riki ana bukibuki Tatan ae tabekia ae e kabuakakaki iai te Atua. Boni bukinan te Atua bwa e kairua ana waaki ni kaineti ma karikaia aomata, ao e taku naba bwa akea te aomata ae na kani karaoa ae eti ngkana e karawawataki. E taku bwa a na bon taetaebuakaa te Atua aomata ngkana a kataaki. (Iobi 2:1-5) N te aro aei ao e a kananououaa iai kakaonimakin te aomata Tatan.
12-14. E kanga ni kaotaki te koaua imwin te tai ae tau maanna ni kaineti ma ana bukibuki Tatan aika uoua?
12 Mangaia are e a tia ni kariaia te tai ae tau maanna te Atua bwa a na noria ana karikibwai aika wanawana ni kabane, bwa tera aron te bukibuki aei n ikotaki naba ma te bukibuki ibukin kanakoraoan riain te Atua n tautaeka. (Kabotaua ma Te Otinako 9:16.) A na kaotaki raoi etin bukibuki aika uoua aikai, n noran waakin maiuia aomata.
13 Te moan, tera ae kaotaki imwin te tai ae tau maanna, ni kaineti ma te bukibuki ibukin te tautaeka i aoni bwaai ni kabane ae taekan riain te Atua ni kairiri? E kona n nakoraoi aroia aomata ni kairiia i bon irouia nakon kairakia iroun te Atua? Te koaua bwa a kona aomata aika ianena ma te Atua, ni karekea te waaki ae kakukurei ae akea te buaka iai, te kakeru, ke te ribuaka? A kona ni katoka te baki ao ni kanakoraoa aia kataumwane aomata nako? A kona ni katoka te aoraki, te kara ao te mate? E baireaki bwa e kona ni karaoaki anne ni kabane i aan ana kairiri te Atua.—Karikani Bwaai 1:26-31.
14 Ni kaineti ma te kauoua ni bukibuki, tera ae kaotaki imwin te tai ae tau maanna n aron kakawakin karikan te aomata? Te koaua bwa e bure aroni karikaia aomata iroun te Atua? Iai ibuakoia aomata ae kona ni karaoa ae e eti ngkana e kataaki? Iai aomata aika a na tangira riki ana kairiri te Atua nakon te inaomata ni kairiia i bon irouia?
[Taamnei n iteraniba 13]
Shuttle: Based on NASA photo
[Taamnei n iteraniba 13]
E angania aomata te Atua aia tai ni kanakoraoa aia tautaeka i bon irouia