KARAKI 115

Te Baretaiti Ae Boou N Te Aonnaba

NORI aroka aika abwabwaki aikai, uee aika kakanikan, ao maunga aika rietata. E aki ngkanne rangi ni kan te tabo aei? Nora te ria ae amwarake ni bain te ataeinimwaane ae uarereke aei. Ao noriia raian ma aoti ake a tei i nanon te tawaana n uteute akekei. Ko aki kani maeka n te auti ae mena n te tabo ae aekakin aei?

E tangiria te Atua bwa ko na maeka n aki toki n te baretaiti n te aonnaba. Ao e aki tangiriko bwa ko na maraki ke ni kainnano n aeka ni karawawata nako ake a ituaki iai ngkai aomata. E kangai ana berita te Baibara nakoia te koraki aika a na maeka n te aonnaba ae boou: ‘E na memena te Atua iroumi. E na akea riki te mate ke te tang ke te maraki. A na maunanako bwaai rimoa.’

E na taraia Iesu bwa e na bon riki te waaki ae kakukurei aei. Ko ataia bwa n ningai? Imwin raoi kamaunan te buakaka ao aomata aika buakaka ni kabane n te aonnaba. Uringnga are ngke e mena Iesu i aon te aba, ao e katoki aeka n aoraki nako irouia aomata, ao e kautiia naba maate. E karaoa aei Iesu bwa e kaota te bwai ae e na karaoia, ngkana e a Uea n Ana Tautaeka n Uea te Atua.

Iangoia bwa e na tera aroni kakukurein te baretaiti ae boou n te aonnaba! E na tautaeka Iesu i karawa ma raona ake e rineiia. A na tabeakinia kaain te aonnaba ni kabane ma n taraia bwa a na kukurei. Ti na noria bwa tera ae ti riai ni karaoia bwa e aonga ni karekea nakoira te Atua, te maiu are aki toki n ana baretaiti ae boou.

Te Kaotioti 21:​3, 4; 5:​9, 10; 14:​1-3.