KARAKI 98

N Te Maunga Are Oriweta

AIO Iesu ngke e mena i aon te Maunga are Oriweta. Mwaane aika aman aika i rarikina aikai, bon ana abotoro. Bon taari ake Anterea ao Betero, ao taari naba ake Iakobo ao Ioane. Ao arei ana tembora te Atua i Ierutarem, are e oti mai kiraroa arei.

Ai uabong ngkai imwin tokan Iesu i aon te taongki ae ataei, nako Ierutarem. Bon te bong ae te Kauabong te tai aei. E mena n te tembora Iesu n te moaningabong. A kataia n taua Iesu ibonga bwa a na tiringnga. Ma a maaku ni karaoa aei bwa e rangi n tatangiraki irouia aomata.

E taekinia mataniwin te Aro Iesu ni kangai: ‘Bon naeta ngkami ao natiia naeta!’ Imwina ao e a taekinna Iesu bwa a na boni katuuaeaki iroun te Atua, ibukin bwaai ni kabane aika buakaka ake a kaakaraoi. Imwin anne ao e a tamwarakea te Maunga are Oriweta, ao a a tabeka naba aia titiraki ana abotoro aika aman aikai. Ko ataia bwa tera aia titiraki nakon Iesu?

A titiraki abotoro aikai taekan te tai ae na roko. A ataia bwa e na kamaunaa te buakaka ni kabane Iesu n te aonnaba. Ma a kan ataia bwa e na riki n ningai aei. E na manga roko n ningai Iesu n tautaeka bwa te Uea?

E ataia Iesu bwa a na aki noria taan rimwina aika n te aonnaba ngkana e a manga roko. E riki aei ibukina bwa e na boni mena i karawa, ao a na aki kona n noria ikekei. Mangaia are e tuangia ana abotoro Iesu, taekan bwaai tabeua ake a na riki n te aonnaba, ngkana e a tautaeka bwa te Uea i karawa. Baikara bwaai aika tabeua aikai?

E taekinna Iesu bwa a na kaoti buaka aika kokorakora, a na bati aomata aika a na aoraki ma ni baki, e na rangi ni kabatiaaki te kakeru, ao a na kaoti mwaeiei aika bubura. E taekinna naba Iesu bwa e na tataekinaki te rongorongo ae raoiroi ibukin ana tautaeka n uea te Atua, ni katobibia te aonnaba. Tiaki ti a bon nori raoi baikai n ara tai aikai? Eng, ti a nori! Mangaia are ti kona ni koaua raoi bwa e a bon tautaeka ngkai Iesu i karawa. N te tai ae waekoa ao e nang kamaunaa te buakaka ni kabane man te aonnaba.

Mataio 21:46; 23:​1-39; 24:​1-14; Mareko 13:​3-10.