KARAKI 97

E A Roko Iesu Bwa Te Uea

TABEUA te tai imwin kanoraabakia mataki ake uoman ake taani bububutii, ao akea bwa e a roko Iesu ma ana koraki n te kaawa ae uarereke i rarikin Ierutarem. E tuangia uoman taan rimwina ni kangai: ‘Naako n te kaawa, ao kam na kunea te taongki ae ataei. Kabwaraa ao kairiamai nakoiu.’

Ngke e a roko te taongki iroun Iesu, ao e a toka naba i aona. E tokaria nako Ierutarem ae te kaawa ae uakaan. Ngke e a kan roko n te kaawa, ao e a butimwaeaki irouia aomata aika rangi ni bati. Angiia mai buakoia, a taakini kunnikaia i nanon te kawai. Tabemwaang a korei baan te aroka ae te baam. A katikui naba mwanganikai aikai i nanon te kawai, ao a tatakarua ni kangai: ‘E na karaoiroaki iroun te Atua te uea ae nakomai n aran Iehova!’

A totoka ngkoa i Iteraera uea aika boou, i aon te taongki ae ataei rinanon Ierutarem, ni kaotiia nakoia aomata. Aio naba te bwai ae e karaoia Iesu. Ao aomata aikai a kaotiia bwa a tangira Iesu bwa e na riki bwa aia uea. Ma a aki bane aomata n tangiria. Ti kona n ataa aei, man te bwai ae riki ngke e a roko Iesu n te tembora.

N te tembora ao e kamarurungia aomata aika mataki ao aika mwauku Iesu. Ngke a nora aei ataei, ao a a tatakarua ni kamoamoaa Iesu. Ma a rangi n un ibonga iai, ao a tuanga Iesu ni kangai: ‘Ko ongo aia taeka ataei aikai?’

E kaeka Iesu ni kangai: ‘Eng, I ongo. Kam aki wawareka taekana n te Baibara are e kangai: “E karekea neboana te Atua mai nanoni wiia ataei?”’ Mangaia are a teimatoa ataei ni kamoamoaa te uea ae rineaki iroun te Atua.

Tiaki ti na kan riki n aekaia ataei aikai? Ane a na kataia n tukira tabeman aomata man tataekinan ana tautaeka n uea te Atua. Ma ti na bon teimatoa n tuangia aomata nako taekan ana mwakuri Iesu aika kamimi ake e na karaoi ibukia aomata.

E tuai ni boo ana tai Iesu n riki bwa te uea ngke e mena ngkoa i aon te aba. E na roko n ningai te tai anne? A kan ataia taan rimwin Iesu. Ti na wareka taekana n te karaki ae imwina.

Mataio 21:​1-17; Ioane 12:​12-16.