KARAKI 90
Boona Ma Neiei N Te Mwanibwa
E MOTIRAWA Iesu i etan te mwanibwa i Tamaria. Akea taan rimwina bwa a nako ni kabooi kanaia n te kaawa. Te aine ane e taetae Iesu nakoina anne, e roko n itiran. E taku nakoina: ‘Karekea nimau.’
Moan te kubanako te aine aei. Ko ataa bukina? Ibukina bwa Iesu bon te I-Iutaia, ao neiei te I-Tamaria. Ao angiia I-Iutaia a aki kan iraorao ma I-Tamaria. A aki naba kakataetaeiia! Ma e tangiriia aeka n aomata nako Iesu. Mangaia are e taku: ‘Ngkana ko kinaa te aomata ae butiiko nimana, ao ko na butiia ao e na anganiko te ran ni kamaiu.’
E taku te aine arei: ‘Nao, e nano te mwanibwa, ao akea am bwaketi. Ao e na reke iia am ran ni kamaiu anne?’
E kabwarabwara Iesu ni kangai: ‘Ngkana ko nima te ran man te mwanibwa aei, ao ko na manga taka riki. Ma te ran ae N na anga, e kona ni kamaiua te aomata n aki toki.’
E taku te aine: ‘Nao, anganai te ran anne bwa I aonga n aki manga taka! Ao I a aki naba manga nakomai n itiran.’
E taku te aine aei bwa e taekina te ran ni koaua Iesu. Ma e bon taekina taekan te koaua ibukin te Atua ma ana tautaeka. Te koaua aio, kaanga ai aron te ran ni kamaiu. E kona ni karekea te maiu are aki toki nakon te aomata.
E tuanga te aine aei Iesu ni kangai: ‘Naako wetea buum ao kam a manga nakomai.’
E kaeka neiei ni kangai: ‘Akea buu.’
E taku Iesu: ‘E eti am kaeka. Ma iai niman buum, ao te mwaane ae ko maeka ma ngaia ngkai, tiaki buum.’
E mimi te aine aei, ibukina bwa e boni koaua Iesu. E a kanga naba n atai baikai Iesu? E riki aei ibukina bwa Iesu bon Teuare Beritanaki are e kanakoaki iroun te Atua, mangaia are e anganaki rongorongo aikai iroun te Atua. N te tai aei ao a a oki taan rimwin Iesu, ao a a rangi ni mimi ngke e a taetae nakon ainen Tamaria.
Tera reireiara man te karaki? E oti iai bwa e akoi Iesu nakoia aomata nako aika a kakaokoro aia reeti. Ao ti riai ni karaoa naba anne. Ti aki riai n iangoia bwa a buakaka tabeman aomata, ibukina bwa kaain te reeti teuana. E tangiriia aomata ni kabane Iesu bwa a na ataa te koaua, are e kairiri nakon te maiu are aki toki. Ao ngaira naba ti riai ni buokiia aomata n reiakina te koaua.