KARAKI 12

A Katea Te Taua Ae Rietata

A A TIA n nako ririki aika bati. A rangi ni bati tibun Noa mairouia natina. A a ikawai ao a a manga karikiia naba aomata aika bati. N te tai ae waekoa ao a a bati aomata n te aonnaba.

Temanna mai buakoia bon tibutorun Noa ae arana Nimrota. E buakaka ao e kakaeiia maan ao aomata n tiringia. E karietataa naba Nimrota ni karikia bwa te uea bwa e aonga n tautaekania aomata. E aki tangiraki Nimrota iroun te Atua.

N te tai anne ao tii teuana te taetae ae kabonganaki irouia aomata ni kabane. E kani botiia aomata Nimrota bwa e aonga n tautaekania. Mangaia are ko ataa te bwai are e karaoia? E tuangia aomata bwa a na katea te kawa ao te taua ae rietata i nanona. Nora taamneia ni karao buriki.

E aki kukurei Iehova ae te Atua n te kateitei aei. E tangiria bwa a na maenako aomata ni maeka n taabo aika kakaokoro n te aonnaba ni kabutaa. Ma a taku aomata: ‘Banemai! Ti na katea te kaawa ao te taua ae rangi n rietata, ae e na roko taubukina i karawa, bwa e aonga n tanoata iai taekara!’ A kani kamoamoaki riki aomata aikai, nakon ae a na kamoamoaa te Atua.

Mangaia are e katoka aia waaki aomata te Atua ni katea te taua. Ko ataia bwa e kanga ni katokia? E karina ni bitii aia taetae aomata nakon taetae aika kakaokoro, ao ai tiaki tii teuana te taetae. A aikoa ota n nanon aia taeka taani kateitei aikai i marenaia. Anne bukina ae e aranaki iai aia kaawa bwa Babera, ke Baburon, ae nanona “te kamangaongao.”

A a moanna ngkai ni kitana Babera aomata. Bon te ikotaki anne ma raoia ake titeboo aia taetae ma ngaiia, ao a a nako ni maeka n iteran nako te aonnaba.

Karikani Bwaai 10:​1, 8-10; 11:​1-9.